ދެވަނަ ބޮޑު ހަނގުރާމައިގާ ނާޒީންގެ އަނިޔާވެރިކަން ޔަހޫދީންގެ މައްޗަށް ހައްދުފަހަނަޅާދިޔަ  ޒަމާނަށްފަހު ޖަރުމަނުން ގެންދަނީ އެދުވަސްވަރު ކިލަނބު ވެފައިވާ އެ ގައުމު ނަމަށް ބައިނަލް އަގްވާމީ ރުހުން ހޯދުމަށްޓަކައި އިސްރާއީލާއެކު ވަރަށް ގާތް ގުޅުމެއް ދަމަހައްޓަމުންނެވެ.

އެކަމަކު ކޮންމެ ކަމަކަށްވެސް ހުދޫދަކާއި އުސޫލުތަކެއް އޮންނަން ޖެހޭނެކަމަށް ޖަރުމަނުގެ ވެރިންވެސް ގަބޫލު ކުރެއެވެ. ނަތީޖާއަކަށް ވެގެން މިދިޔައީ އިސްރާއީލާއެކު ޖަރުމަނުން ގެންގުޅޭ ގާތް އެކުވެރިކަމުގެ ސިޔާސަތު އެ ގައުމުން އަލުން މުރާޖިއާ ކުރަން ގަސްދުކުރާކަން ހާމަކުރުމެވެ. ޖަރުމަނުގެ ޗާންސެލަރ ފްރެޑްރިކް މާރޒް ވިދާޅުވެފައިވަނީ އިސްރާއީލުން ގައްޒާގައި ހިންގަމުންގެންދާ އަނިޔާވެރިކަން ޖަރުމަނުން ގަބޫލު ނުކުރާ ކަމަށާއި އެހެންނަމަވެސް މިވަގުތު އަދި ގުޅުން ކަނޑާލަން ބޭނުންފުޅު ނުވާކަމަށެވެ.                                            

ގައްޒާގައި އިސްރާއީލު ސިފައިން އެއްވެސް ބެލުމެއް ނެތި އާންމު ރައްޔިތުންނަށް ކުރަމުންގެންދާ އަނިޔާއާއި ވަރުގަދަ ހަމަލާތަކުން ހާސިލުކުރަން ބޭނުންވާ ނަތީޖާއަކީ ކޮބައިކަން އަހަރެންނަކަށް ނުވިސްނެއެވެ. އަދި އެއީ ރުހިގަބޫލު ކުރެވޭނެ ކަމެއްވެސް ނޫނެވެ. ގައްޒާއަށް އިސްރާއީލުން ދެމުންގެންދާ ހަމަލާތައް ފެށުނު ފަހުން ފުރަތަމަފަހަރު އިސްރާއީލާ ދެކޮޅަށް ޖަރުމަނުގެ ޗާންސެލަރ ވާހަކަފުޅު ދައްކަވަމުން ވިދާޅުވެފައި ވެއެވެ.   

ޔުނައިޓެޑް ނޭޝަންސްގެ އިންސާނީ ހައްގުތަކާބެހޭ އިދާރާގެ ތަފާސްހިސާބުތަކަށް ބަލާއިރު ބައިނަލް އަގްވާމީ ގާނޫނުތަކާ ޚިލާފަށް އިސްރާއީލުން ގައްޒާއަށްދެމުން ގެންދާ ހަމަލާތަކުގައި މިހާތަނަށް 62000 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ގިނައަދަދަކަށް އަންހެނުންނާއި ކުޑަކުދިންވެސް ހިމެނޭކަމަށް ބުނެފައި ވެއެވެ.  އަދި ބައިނަލް އަގްވާމީ އޭޖެންސީތަކުން ފޯރުކޮށްދޭ ކާބޯ ތަކެތީގެ މަދު އެހީއެއް ލިބިގަތުމަށްޓަކައި މިއަހަރު ޖުލައި އާ ހަމަޔަށް އެހީފޯރުކޮށްދޭ ސަރަހައްދުތަކަށް ދިޔަ 800 އަށްވުރެން ގިނަ ކުޑަކުދިންވެސް ވަނީ ޝަހީދު ކޮށްލާފައެވެ.                                                    

ބައިނަލް އަގްވާމީ ދުނިޔެއިން އިސްރާއީލް ބާކީވެ ޕެރައިއާ ސްޓޭޓަކަށް ބަދަލުވަމުންގޮސް ގައުމުގެ ރައްޔިތުން ގައުމުގެ ތެރޭގައި ނިކަމެތިވެ އަދި އެހެން ގައުމުތަކުގައި ނުރުހުމުގެ އިނގިލި ދިމާކުރަމުން ގެންދާއިރުވެސް ނަތަންޔާހޫ އެހުންނަނީ ގޮތް ދުނުކޮށް އޭނާގެ ކިބުރުވެރިކަން މަތީގައެވެ. އިސްރާއީލުގެ އެންމެ އެކުވެރި ގައުމުތައް ކަމަށް ބެލެވޭ ޖަރުމަނާއި އިނގިރޭސި ވިލާތާއި އޮސްޓްރޭލިއާއިންވެސް ފެންނަމުންދަނީ އިސްރާއީލާ ފެޔަށްޖެހި އަދި ފަލަސްތީނުގެ މިނިވަން ދައުލަތަކަށް ރަސްމީ ހައިސިއްޔަތުން އިއުތިރާފު ވުމަށް އިޚްތިޔާރު ކުރަން ތައްޔާރުވަމުންދާ މަންޒަރެވެ. އޮކްޓޯބަރ 7 ގައި އިސްރާއީލުން ގައްޒާއަށް ހަމަލާ ދޭން ފެށުމާއެކު ބައިނަލް އަގްވާމީ މުޖުތަމާގައި އިސްރާއީލް އަރިއަޅާލައިފިއެވެ. އެ ހަމަލާތަކުގައި އިންސާނިއްޔަތުކަން ނެތިދާން ފެށުމާއެކު ބައިނަލް އަގްވާމީ ދުނިޔޭގައި އިސްރާއީލް އެކަހެރި ވުމުގެ ފެށުމާ ކުރިމަތިލާން އޮތީ ޖެހިފައެވެ. އެންމެފަހުން މިހާރުމިއޮތީ އެންމެ ގާތް އެކުވެރިންވެސް ސަލާމަށް އަތް ދިއްކޮށްލަން ލަދުގަންނަ މިންވަރަށް އިސްރާއީލް މުޅި ދުނިޔެއިން އެކަހެރިވެ އިސްރާއީލުގެ އެތެރޭގައި ބޮޑުވަޒީރު ނަތަންޔާހޫގެ އިތުބާރުވެސް ގެއްލިފައެވެ. އިސްރާއީލުގެ ރައްޔިތުންގެ ތެރެއިން %70 އަށްވުރެން ބޮޑު އަޣްލަބިއްޔަތުން ގަބޫލުކުރާ ގޮތުގައި ގައްޒާގެ ހަނގުރާމަ ދެމެހެއްޓުމަކީ ބޮޑުވަޒީރު ނަތަންޔާހޫގެ އަމިއްލަ އެޖެންޑާއެކެވެ. އެކަމުގައި އިސްރާއީލުގެ އެއްވެސް މަސްލަހަތެއް އޮތްކަމަށް ގަބޫލެއް ނުކުރެއެވެ.                  

ބައިނަލް އަގްވާމީ ސަފުން އިސްރާއީލް އެކަހެރިވެގެން ދިއުމަކީ ނަތަންޔާހޫގެ ސަރުކާރުން ކަންބޮޑުވާ ކަމަކަށް ނުވެއެވެ. ނަތަންޔާހޫ ބުނަމުންގެންދަނީ ގައްޒާގައި ފަލަސްތީނުގެ ކުޑަކުދިންނަށް ދާންދެން ބަނޑުހައިހޫނު ކަމުގައި މަރުވަމުން ދާ ކަމަށް މީޑިއާތަކުން ހާމަކުރަމުން ގެންދަނީ ހަގީގަތާ ޚިލާފް މައުލޫމާތު ތެކެކެވެ. ނަތަންޔާހޫ ކޮންމެފަދަ ބަހަނާއެއް ދައްކައި ހަގީގަތް އޮޅުވާލަން މަސައްކަތް ކުރަމުން ގެންދިޔަ ކަމުގައި ވިޔަސް ދުނިޔޭގެ ހުރިހާ ގައުމެއްގައިވެސް އިސްރާއީލުގެ ރައްޔިތުންނާމެދު ނުރުމުގެ ލޮލުން ބަލަން ފަށެމަކީ ހަގީގަތެކެވެ. މިއަދާ ހަމަޔަށްވެސް އިސްރާއީލާއެކު އެންމެ ގާތް ގުޅުމެއް ބާއްވަމުންގެންދާ އޮސްޓްރޭލިޔާއަށް ޒިޔާރަތްކުރި އިސްރާއީލުގެ ފާރ-ރައިޓް ޕާރލަމެންޓް މެމްބަރަކު އެ ގައުމަށް އެތެރެވުން ދާދިފަހުން ވަނީ މަނާކޮށްފައެވެ. އަދި އިނގިރޭސި ވިލާތުގެ 2300 ސްޓޯރަކުން އިސްރާއީލުގެ އުފެއްދުންތައް ނުވިއްކާގޮތަށްވަނީ ނިންމާފައެވެ. އިސްރާއީލުގެ ޓީމްތަކުން ކުޅޭ ފީފާގެ ފުޓްބޯޅަމެޗްތައް ޔޫރޕްގެ ކެޕިޓަލް ސިޓީތަކުގައި ނުބޭއްވުމަށް ފިއްތުން ކުރިމަތި ކުރުމާއެކު އިސްރާއީލު ފީފާއިން ބޭރު ކުރުމުގެ އަޑުތައްވެސް ވަނީ ގަދަވެފައެވެ.                                                          

ދުނިޔޭގެ ބޮޑެތި އިލްމްވެރިން ގެންދަނީ އިސްރާއީލުގެ ތަޖްރިބާކާރުންނާއެކު މައުލޫމާތު ހިއްސާކުރުމަށް އިންކާރު ކުރަމުންނެވެ. ޔޫރަޕްގެ މަޝްހޫރު ހޮރައިޒަން ޔޫރަޕްގެ ރިސާރޗް ޕްރޮގްރާމްތަކުން އިސްރާއީލް އެކަހެރިކުރުމާ ދޭތެރޭވެސް ގެންދަނީ ވިސްނަމުންނެވެ. އިސްރާއީލުގައި ބޭއްވުމަށް އިންތިޒާމްކުރެވިފައިވާ ދުނިޔޭގެ ނަން މަޝްހޫރު އާރޓިސްޓުންގެ ކަލްޗަރަލް ޝޯތައްވެސް ވަނީ ކެންސަލް ކޮށްފައެވެ. މިއިން އެއްވެސް ކަމަކާ ދޭތެރޭ އިސްރާއީލުގެ މިއަދުގެ ސަރުކާރުން ކުޑަކޮށްވެސް ފިކުރުކުރާ ކަމަކަށް ނުވެއެވެ.