މަޝްހޫރު 12 ދުވަހުގެ ހަނގުރާމައިގާ އެމެރިކާއިން އީރާނުގެ ނިއުކްލިއަރ ސައިޓްތަކަށް ދިން ހަމަލާތަކުން އީރާނަށް ލިބިދީފައިވާ ކަމަށް އެމެރިކާއިން ބުނާ ގެއްލުންތަކުގެ ހަގީގަތް ހޯދައި ބަލައި ހާމަކުރުމުން ރައީސް ޓްރަމްޕް ކޯފާ އިސްކުރައްވައި އެ ދިރާސާތަކާއި ތަހްގީގުތައްކުރި އޭޖެންސީގެ ވެރިޔާ އެމެރިކާ ސިފައިންގެ އެންމެ އިސް ޖެނެރަލުންގެ ތެރޭގައި ހިމެނޭ ލެފްޓިނެންޓް ޖެނެރަލް ޖެފްރީ ކުރޫސް ވަޒީފާއިން ވަކިކޮށް ގެއަށް ފޮނުވާލައިފިއެވެ. ހުކުރުދުވަހު ވަޒީފާއިން ވަކިކުރި ޖެނެރަލް އާ ބެހޭގޮތުން ދިފާއީ ވަޒީރު ހެގްސެތު ވިދާޅުވެފައިވަނީ އެމެރިކާގެ ދިފާއީ އިންޓެލިޖެންސްގެ ވެރިއަކަށް ހުންނެވި ޖެނެރަލް ޖެފްރީ ކުރޫސް ދެން އެ ވަޒީފާ އަދާ ނުކުރައްވާނެ ކަމަށެވެ. 

ޖެނެރަލް ޖެފްރީ ކުރޫސްއެކު އެމެރިކާ ސިފައިންގެ އެހެން އިސް އޮފިސަރުންތަކެއްވެސް ވަނީ ވަޒީފާއިން ވަކިކޮށް ގެއަށް ފޮނުވާ ލާފައެވެ. އޭގެ ތެރޭގައި ކަނޑު ސިފައިންގެ ރިޒާވްގައި ހުންނެވި އެންމެ އިސް ވެރިޔާ ވައިސް އެޑްމިރަލް ނޭންސީ ލެކޯރ އާއި ކަނޑު ސިފައިންގެ ހަނގުރާމައާމައާއި ބެހޭ ޚާއްސަ ކޮމާންޑްގެ ސީލް އޮފިސަރ ރެއަރ އެޑްމިރަލް މިލްޓަން ސްޓޭންޑް ހިމެނެއެވެ. އަދި ގިނަ އަދަދެއްގެ ސެކިއުރިޓީ އޮފިޝަލުންނަށް ލިބިދީފައިވާ އިނާޔަތްތައްވެސް ވަނީ އުވާލައްވާފައެވެ.                         

މިއިން އެއްވެސް އޮފިޝަލް އަކު ވަޒީފާއިން ވަކި ކުރެއްވި ސަބަބު އަންގަވާފައި ނުވާކަމަށް މައުލޫމާތު ހިއްސާކުރި ސިފައިންގެ އޮފިޝަލުން ބުނެފައިވެއެވެ. އެހެންނަމަވެސް މިއީ ސިފައިންގެ އިސް ސަފުގައި ތިއްބެވި ބޭފުޅުންގެ ތެރެއިން ރައީސް ޓްރަމްޕް ހިތްޕުޅު ހަމަ ޖެހިވަޑައި ނުގަންނަވާ ބޭފުޅުންގެ ކުނި ހޮވާލުމަށް އަޅުއްވަމުންގެންދަވާ ފިޔަވަޅުތަކުގެ ބައެއް ކަމަށް ބުނެފައި ވެއެވެ.                              

އެމެރިކާއިން އީރާނަށް ދިން ހަމަލާގެ ތަފްސީލުތައް ހާމަކުރުމުން ޖެފްރީ ކުރޫސް ނިސްބަތްކުރެވޭ އިންޓެލިޖެންސް އޭޖެންސީ އާދޭތެރޭ ރައީސް ޓްރަމްޕް ހުންނެވީ ކޯފާ ވެފައެވެ. އަދި އެ ހާދިސާގެ 2 މަސްދުވަސްފަހުން ލެފްޓިނެންޓް ޖެނެރަލް ޖެފްރީ ކުރޫސް ވަޒީފާއިން ވަކިކުރުމަކީ ޓްރަމްޕް ރުހިވަޑައި ނުގަންނަވާ ފަރާތްތަކަށް ފޮނުވި ވަރަށް ނުރައްކާތެރި މެސެޖެކެވެ.                            

މިލިޓްރީގެ ތެރެއިން ފީ ހޮވާލަން ހިންގަމުންގެންދާ ހަރަކާތުގައި ސަރުކާރުގެ ވިސްނުމާ ދެކޮޅުކަމަށް ބެލެވޭ އިންޓެލިޖެންސް އޮފިސަރުން އަދިވެސް މަދުކޮށް ސެކިއުރިޓީ އިނާޔަތްތައް އުވާލައި ބަޖެޓް އުނި ކުރާނެކަން ނޭޝަނަލް އިންޓެލިޖެންސް ޑިރެކްޓަރގެ އިދާރާއިން ވަނީ ހާމަކޮށްފައެވެ. އެއަރފޯސްގެ އެންމެ އިސްވެރިޔާ ޖެނެރަލް ޑޭވިޑް އޯލްވިން ވެސް ކުރިން ރިޓަޔަރ ކުރައްވަން ހަމަޖެހިފައިވާ ތާރީޚަށް ވުރެން 2 އަހަރު ކުރިން ރިޓަޔަރ ކުރައްވާނެ ކަން ޕެންޓަގަން އިންވަނީ އިއުލާން ކޮށްފައެވެ. މިލިޓްރީގައިތިބި އިސްބޭފުޅުން ސަބަބު ބަޔާންކުރުމަކާ ނުލައި ވަޒީފާއިން ކުރަން ރައީސް ޓްރަމްޕް އާއި ދިފާއީ ވަޒީރު ހެގްސެތު ގެންގުޅުއަވާ ސިޔާސަތުގެ ތެރެއިން މީގެކުރިން އެއަރފޯސްގެ އެންމެ އިސް ވެރިޔާ ޖޮއިންޓް ޗީފް އޮފް ސްޓާފް ޖެނެރަލް ބްރައުން ޖޫނިއަރ އާއި ނޭވީންގެ އެންމެ އިސްވެރިޔާ އަދި އެއާރފޯސްގެ ދެވަނައަށް އެންމެ އިސްވެރިޔާއާއި މިލިޓްރީ ސަރވިސްގެ 3 ބައިގެ އެންމެ އިސް ގާނޫނީ ބޭފުޅުން ވަނީ ވަޒީފާއިން ވަކިކޮށް ގެއަށް ފޮނުވާލާފައެވެ. އަދި ނޭޝަނަލް ސެކިއުރިޓީ އޭޖެންސީގެ އެންމެ އިސްވެރިއަކަށް ހުންނެވި ޖެނެރަލް ޓިމް ހިއޫ އާއި ނޭޓޯގެ ވަރަށް އިސް މަގާމެއްގައި ހުންނެވި ވައިސް އެޑްމިރަލް ޝޮޝާނާ ޗެޓްފީލްޑް ވަނީ މިދިޔަ އޭޕްރިލްމަހުގެ ތެރޭގައި ވަޒީފާއިން ވަކިކޮށް ގެއަށް ފޮނުވާލާފައެވެ.                                    

ކުރޫސް ނިސްބަތްކުރެވޭ އޭޖެންސީން ހާމަކުރި ރިޕޯރޓް ގައި އެމެރިކާއިން ދިން ހަމަލާގެ ސަބަބުން ރައީސް ޓްރަމްޕް އާއި ބޮޑުވަޒީރު ނަތަންޔާހޫ ބުނެފައިވާފަދައިން އީރާނުގެ ނިއުކްލިއަރ ޕްރޮގްރާމް އަހަރުތަކަކަށް ފަހަތަށް ޖައްސާލެވިފައެއް ނުވެއެވެ. އެ ޕްރޮގްރާމް ފަސްކުރެވުނީ ގިނަވެގެން ދެ ތިން މަސްދުވަހުގެ މުއްދަތަށެވެ. އެހެންނަމަވެސް ޓްރަމްޕް ވިދާޅުވަމުން ގެންދަވަނީ ޑިފެންސް އިންޓެލިޖެންސް އޭޖެންސީގެ އެ ރިޕޯރޓަކީ ދޮގެއް ކަމަށެވެ. އަދި އެމެރިކާއިން އީރާނުގެ ނިއުކްލިއަރ ޕްރޮގްރާމް ހިންގާ ސަރަހައްދުތަކަށް ދިން ހަމަލާއަކީ ހީރޯޝީމާއާއި ނާގަސާކީއަށް ދިންފަދަ ކާމިޔާބު ހަމަލާއެއްކަމަށްވެ.                   

ޚަބަރުތަކުންއެނގިފައިވާގޮތުގައި އީރާނަށް ދިން ހަމަލާގައި އެ ގައުމުގެ ނިއުކްލިއަރ ޕްރޮގްރާމް ވާނީ ނައްތާލާފައިކަމަށް އެމެރިކާ ސަރުކާރުން ދީފައިވާ ރިޕޯރޓްގެ ސައްހަކަން ކަށަވަރުކުރުމަށް ޓަކައި ޑީ އައި އޭ ވެސް ހިމެނޭ ގޮތުގައި 12 އިންޓެލިޖެންސް އޭޖެންސީ އަކުން ކުރިދިރާސަތަކުން އެ ރިޕޯރޓްއާ ދޭތެރޭ ބޮޑެތި ޝައްކުތަކެއް ވަނީ އުފެދި ފައެވެ. ޖޫންގައި އެމެރިކާގެ ބަންކަރ ބަސްޓަރ ތަކުން ހަމަލާދީގެން އީރާނުގެ ނިއުކްލިއަރ މަޝްރޫއު ވީރާނާ ކޮށްލައިފިން ކަމަށް ވިދާޅުވުން ފިޔަވައި ހެގްސެތުވެސް ތަފްސީލެއް ނުދެއްވައެވެ. ނިއުސް ކޮންފަރެންސްގައި އެ ދުވަހު ފަޚުރުވެރިކަމާއެކު ހެގްސެތު ވިދާޅުވެފައިވަނީ އީރާނުގެ ނިއުކްލިއަރ މަޝްރޫއު ނެތިކޮށްލެވިއްޖޭ ބުނާށެވެ. ވީރާނާ ކޮށްލައިފިއޭ ބުނާށެވެ. ބޭނުން އިބާރާތެއް އިޚްތިޔާރު ކުރާށެވެ. އީރާނުގެ ނިއުކްލިއަރ މަޝްރޫއު ވުޖޫދުން ފޮހެލައިފީމެވެ.                         

މިހާތަނަށް ވަޒީފާއިން ވަކިކޮށް ގެއަށް ފޮނުވާލެއްވި އެއްވެސް މިލިޓްރީ އޮފިޝަލަކު ވަޒީފާއިން ވަކިކުރި ސަބަބު އާންމުކޮށް ހާމަކޮށްފައިނުވާތީ ޑެމޮކްރެޓުން ގެންދަނީ ކަންބޮޑުވުން ފާޅުކުރައްވަމުންނެވެ.