ފޭސްބުކް މާކެޓްޕްލޭސްގައި ތަކެތި ވިއްކާކަމަށް ބުނެ އެކި މީހުންގެ އަތުން ފައިސާ ހޯދަމުންދިޔަ މީހަކު ހައްޔަރުކޮށްފިއެވެ.

މި މައްސަލާގައި ހައްޔަރުކޮށްފައިވަނީ ސ. މީދޫ / ފުނޯސް، ޢަބްދުﷲ މިލްހާނު (33އ)އެވެ.

ކޯޓު އަމުރެއްގެ ދަށުން އޭނާ ހައްޔަރުކޮށްފައި ވަނީ، އެންޓި-ސްކޭމް ސެންޓަރާއި ހުޅުމީދޫ ޕޮލިސް ގުޅިގެން ހިންގި ޚާއްޞަ އޮޕަރޭޝަނެއްގައި، މި އޮގަސްޓް މަހުގެ 23 ވަނަ ދުވަހު ސ. މީދޫން ކަމަށާއި، މި އޮޕަރޭޝަނަކީ، އެ ޚިދުމަތަށް އެކި ދުވަސް މަތިން ހުށަހަޅާފައިވާ ހީލަތް ހެދުމުގެ މައްސަލަތަކަކާ ގުޅިގެން ހިންގި އޮޕަރޭޝަނެއް ކަމަށް ދިވެހި ފުލުހުންގެ ޚިދުމަތުން ބުނެއެވެ.

ފުލުހުން ބުނީ، މި މައްސަލަތަކުގެ ތަޙުޤީޤުގައި މިހާތަނަށް ބެލިބެލުމުން، އޭނާއަކީ ފޭސްބުކް މާކެޓް ޕްލޭސްގައި އެއްޗިހި ވިއްކާކަމަށް ބުނެ އެކި ދުވަސް މަތިން އެކި މީހުންގެ އަތުން އެކި އަދަދުތަކަށް ފައިސާ ހޯދުމާއި، މިފަދަ ކަންކަން ސްކޭމް ރާވައި ހިންގާފައިވާ މީހެއްކަން އެނގިފައި ވާކަމަށެވެ. 

އަދި މިގޮތަށް ހޯދި ފައިސާ އެކި މީހުންގެ އެކައުންޓަށް ޖަމާކޮށް، އެ މީހުންނަށްވެސް ފައިދާއެއް ދީ މި ކަންކަމުގައި ބައިވެރިކުރުވާފައި ވާއިރު، މިފަދަ ތިން މައްސަލައެއްގައި އޭނާ 16,000 ރުފިޔާ ހޯދާފައި ވާކަންވެސް މިހާތަނަށް އެނގިފައިވާކަމަށް ފުލުހުން ބުނެއެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުގައި ބެހެއްޓުމަށް އަމުރުކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެއެވެ.

ފޭސްބުކް މާކެޓްޕްލޭސް މެދުވެރިކޮށް، ޞައްޙަނޫން ޕޯސްޓުތައް ޖަހައިގެން ހިންގާ މިފަދަ މުޢާމަލާތްތައް އިތުރުވަމުން އަންނައިރު، އޮންލައިންކޮށް ވިޔަފާރިކުރާއިރު، މުދާ ލިބުމުން ނޫނީ ފައިސާގެ މުޢާމަލާތް ނުކުރުުމަށް ފުލުހުންގެ ޚިދުމަތުން އިލްތިމާސްކުރެއެވެ. 

އަދި ފައިސާ ޓްރާންސްފަރ ކުރުމުގެ ކުރިން އެކައުންޓުގެ ޞައްޙަކަން ކަށަވަރު ކުރުމަށްވެސް ދިވެހި ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.