ވަގު ކަލޭގެ މިފަހަރު ސީދާ ގުޅީ އަހަންނަށެވެ. ލާރި ގެންގުޅޭ މީހެއްހެން އޭނާއަށް ހީވާން ޖެހޭ އެއްވެސް ސަބަބެއް ނެތެވެ.

ވަގު ކަލޭގެ: ”މީ ބޭންކް އޮފް މޯލްޑިވްސްއިން އަޝްފާން އިނގޭތޯ؟ އަޅުގަނޑުމެން ކުރިއަށްގެންދިޔަ 5 ލައްކަ ރުފިޔާ ލިބޭ ޕްރޮމޯޝަންއެއްގަ ތިޔަ ބޭފުޅާގެ ނަންބަރު ވަނީ ހޮވިފަ.“ 

މަ: (އުފާވެފައި) ”ދެން ލަހެއް ފަހެއް ކުރާނެ ކަމެއް ނެތެއްނު. އިނާމު ބަލާ ދާންވީ ތަން ބުނޭ!“

ކުރިން އަހަރެންނަށް ވިސްނުނީ ގޯސް ކޮށެވެ. އަސްލު އެމީހާ އެ އުޅެނީ ފަގީރެއް ފާޑު ޖަހާތީ ރަނގަޅު އެއްޗެއް ދޭން ވެގެންނެވެ.

ވަގު ކަލޭގެ: ”އަދި އިނާމު ލިބެން 1 މަރުހަލާ އެބައޮތް އިނގޭތޯ!“

މަ: ”ތި ގޯސްވީއޭ. އަވަހަށް ބުނޭ ވާންވީ ގޮތެއް. އެކައުންޓްގަ ހުރި ލާރި ޓްރާންސްފަރ ކުރަން ނުބުނާތި“

ވަގު ކަލޭގެ؛ ”އާދެ! އެ ވާހަކަ ދަންނަވާލަން މި އުޅެނީވެސް. ވަރަށް ގިނަ ފަރާތްތަކުން އެފަދަ ނޭއްގާނީ ކަންތައްތައް ހިނގާ ކަމުގެ ޝަކުވާ ލިބޭ. އެހެންވެ ތި ފަރާތުންވެސް ވަރަށް ސަމާލުވުން އެދެން.“

މަ: ”ދެން ބުނެބަލަ އަވަހަށް ހަދަންވީ ގޮތެއް؟“

ވަގު ކަލޭގެ: ”އަޅުގަނޑުމެން ލަކީ ޑްރޯ ގުރުނެގިއިރު 2 ނަންބަރެއް ވާނީ ނަގާފަ. އެ ދެ ނަންބަރުގެ ވެރި ފަރާތަށް ހަވާލުކުރާ މަސައްކަތެއް އެންމެ އަވަހަށް ނިންމާ ފަރާތަކަށް 5 ލައްކަ ލިބޭނީ.“

މަ: ”ކޮންއިރަކު ކޮންތާކު ނެގި ގުރެއް؟“

ވަގު ކަލޭގެ: ”ރޭގަ ޓީވީއެމް ރާއްޖެ މިއަދު ޕްރޮގްރާމްގަ.“

މަ: ”ކުރިން އެއީ މެެހެމާނުން އަރުވައިގެން މަޢުލޫމާތު ގެންނަ ޕްރޮގްރާމެއް. މިހާރު ގުރުލާ ޕްރޮގްރާމަކަށް ބަދަލުވީ ދޯ! މައްސަލައެއް ނެތް. ކޮބާ އަނެއް މީހާ؟“

ވަގު ކަލޭގެ: ”އެއީ އިދުރީސް. އޭނަ މިވަގުތު މި ފޯނުގަ އެބައިން. މިތަނުގަ ފަނޑިޔާރުކަން ކުރަންވެސް 3 ބޭފުޅުން އެބަތިއްބެވި.“

އެއާއެކު އެ މީހުންވެސް ތަޢާރަފެއް ދިނެވެ.

އަހަރެން ހިތަށް އެރިއެވެ. ބަޔަކަށް ކަމެއް މޮަޅަށް ކުރެވޭނީ މިހާ ވަރަށެވެ. ހާދަ އޯގަނައިޒެވެ.

ވަގު ކަލޭގެ: ”އަޅުގަނޑުމެން 1އިން 10އަށް ނަންބަރުތަކެއްގަ ހުންނާނެ ދިމާވާ ފަރާތުން ކުރަން ޖެހޭ ކަމެއް. އެހެންވީމަ ނަންބަރުން ދިމާވި ކަމެއް ކުރަން ޖެހޭނީ.“

މަ: ”ވަރަށް ސަޅި. އަހަރެން ތައްޔާރު.“

ވަގު ކަލޭގެ: (އުންމީދީ ގޮަތަކަށް) ”ފުރަތަމަ އިދުރީސް ނަންބަރެއް ނަންގަވާ!“

އިދުރީސް: ”ފަހެއް“

ވަގު ކަލޭގެ : ”އިދުރީސްއަށް މި ދިމާވީ މުނިހޯމްކެއާރގަ ހުންނާނެ މީހަކު ނަގާފަ ހުރި ބެޑްރޫމް ސެޓެއް. އެ ގެންގޮސް ރާވާލަން ޖެހެނީ. އޭރުން މަސައްކަތް ނިމުނީ.“

އަސްތާއެވެ! ސަހަލު ކަމެއް ނުޖެހޭނެއެވެ. ތިލަފުށީގައި އޮތް ބޯޓެއް އެހެލައި ފައިބަރު ކުރަން އަހަރެންނަށް ނުޖެހުނިއްޔާ ރަނގަޅެވެ.

ވަގު ކަލޭގެ: ”އަވަހަށް ނަންބަރެއް ނަންގަވާ!“

މަ: ”ހަތެއް“

ވަގު ކަލޭގެ: ”އެންމެ ކައިރީގަ ހުރި އޭޓީއެމަކުން ސްލިޕް ކޮޅެއް ނަގާފަ އޭގަ އިންނަ ނަންބަރު ކިޔާލަދިނީމަ ތި ބޭފުޅާގެ މަސައްކަތް ފުރިހަމަ ވީ. އެންމެ އަވަހަށް މަަަސައްކަތް ނިންމާ ފަރާތްކަށް ވަގުތުން 5 ލައްކަ ރުފިޔާ ހަވާލު ކުރެވޭނެ.“

އަހަރެން ގާތަށް އައީ އަމަށަކު ރުޅިއެއް ނޫނެވެ.

މަ: ”ތީ އެއްވެސް އިންސާފެއް ނޫން. އޭނާއަށް ބެޑްރޫމް ސެޓް ރާވަން. މަށަށް ސްލިޕް ނަގަން. ނޫޅެން ތީގަ ބައިވެރިވާކަށް.“ 

ވަގު ކަލޭގެ: ”ގުރުން ދިމާވި ގޮތެއް ނޫންތޯ! މީގަ އަޅުގަނޑުމެއް ކީއްތޯ ކުރާނީ؟“

މަ: ”ކަލޭމެންދޯ ތިޔަށް މަސައްކަތް ލާނީ. ލާއިރުވެސް އެނގެންވާނެ ދޯ މަ ސްލިޕް ނަގާއިރު އޭނައަށް އަދި ބެޑްރޫމް ސެޓް ނުވެސް ފެންނާނެކަން. މިހާ ހަމައެއް ލަމައެއް ނެތް ކަމެއްގަ ބައިވެރިވާކަށް ނޫޅެން. އަހަރެން ބިޒީވެއްޖެ.“

ވަގު ކަލޭގެ: ”ކިހާ އިރަކުންތޯ ފްރީ………“

ވާހަކަ ދައްކަދައްކާ ހުއްޓައި ފޯނު ކަނޑާލައިފީމެވެ.

2 ގަޑިއެއްހާއިރު ފަހުން އަނެއްކާވެސް އެ ނަންބަރުން އެ މީހާ ގުޅިއެވެ.

ވަގު ކަލޭގެ: ”މިހާރު ފްރީ ވެއްޖެތޯ ޓާސްކް ފުރިހަމަ ކޮށްލެވޭ ވަރަށް؟“

މަ: ”ކޮން ޓާސްކެއް؟ މިހާރު އޭނަ ބެޑްރޫމް ސެޓް ރާވާ ނިންމަފާނެ އެއްނު. އޭނައަށް އިނާމު ދީ!“

ވަގު ކަލޭގެ އަރައިގަތް ރުޅީގައި ފޯނު ބާއްވައިފިއެވެ.

(މިއީ މުޙައްމަދު ޝަނޫން ލިޔުއްވާފައިވާ، އޭނާއަށް ދިމާވި ޙަޤީޤީ ހާދިސާއެކެވެ.)