ގާނޫނީ ވަކީލުކަމުގެ ވަގު ހުއްދައެއް ތައްޔާރުކޮށްގެން ގެންގުޅުނު އަންހެނަކު ފަޅާއަރައި، އެ މައްސަލަ ބާ ކައުންސިލުން ފުލުސް އޮފީހަށް ހުށަހަޅައިފިއެވެ.

މި މައްސަލަ ފަޅާއަރާފައިވަނީ، މޯލްޑިވްސް ޕޯޓްސް ލިމިޓެޑް (އެމްޕީއެލް)ގައި މަސައްކަތްކުރާ ލ. ފޮނަދޫ، ހަވޭލި، ފާޠިމަތު ޠޫބާ ޢަބްދުﷲގެ ވަކީލުކަމުގެ ހުއްދައަކީ ބާ ކައުންސިލުން ދޫކޮށްފައިވާ ހުއްދައެއްތޯ ބެލުމަށް ހުށަހެޅުމުން، އެކަން ބެލިބެލުމުގެ ތެރޭންނެވެ.

މިކަމާ ގުޅޭގޮތުން ބާ ކައުންސިލުން ނެރުނު ނޫސްބަޔާނެއްގައި ބުނެފައިވަނީ، އޭނާއަކީ ބާ ކައުންސިލުން އެއްވެސް އިރެއްގައި ވަކީލުކަމުގެ ހުއްދަ ދޫކޮށްފައިވާ ފަރާތެއް ނޫންކަމަށެވެ.

އަދި މި މައްސަލަ އިތުރަށް ބެލިބެލުމުގައި، ފާޠިމަތު ޠޫބާ ޢަބްދުﷲ އަށް ދޫކޮށްފައިވާކަމަށް ބުނާ ”ވަކާލާތުކުރުމުގެ ހުއްދަ“އަކީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ނަމާއި، ދިވެހިރާއްޖޭގެ ސުޕްރީމްކޯޓުން ނަމާއި ލޯގޯ ބޭނުންކޮށްގެން، ވަކާލާތުކުރުމުގެ ހުއްދަ ނަންބަރު 2020/22 ”ދިވެހިރާއްޖޭގެ ގާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދަ“ގެ ގޮތުގައި ތައްޔާރުކޮށްފައިވާ ލިޔުމެއް ކަމާއި، އެ ލިޔުމުގައި ހިމަނާފައިވާ ސޮޔަކީ، އެ ތާރީޚުގައި ދިވެހިރާއްޖޭގެ ސުޕްރީމްކޯޓުގެ ފަނޑިޔާރުކަމުގައި ހުންނެވި ފަނޑިޔާރެއްގެ ސޮއި ނޫންކަން އެ ކައުންސިލަށް ފާހަގަކުރެވިފައި ވާކަމަށެވެ.

ގާނޫނު ނަންބަރު 5/2019 (ދިވެހިރާއްޖޭގެ ގާނޫނީ ފަންނުގެ ގާނޫނު)ގައި ވާގޮތުގެ މަތިން، ދިވެހިރާއްޖޭގެ ބާ ކައުންސިލް ވުޖޫދުވުމަށްފަހު، އެ ގާނޫނުގައިވާ ގޮތުގެ މަތިން ވަކާލާތުކުރުމުގެ ހުއްދަ ދިނުމުގެ ބާރާއި ޒިންމާ މަތިކުރެވިފައިވާ ހަމައެކަނި އިދާރާއަކީ ދިވެހިރާއްޖޭގެ ބާ ކައުންސިލް ކަމަށްވެސް އެ ކައުންސިލުގެ ނޫސްބަޔާނުގައި ބުނެފައިވެއެވެ.

އެހެންނަމަވެސް ބާ ކައުންސިލުގެ ދަފުތަރުގައި އޭނާގެ ނަން ހިމެނިފައި ނުވާތީއާއި، ސުޕްރީމްކޯޓުގެ ރިޓަޔަރ ކުރައްވާފައިވާ ފަނޑިޔާރެއްގެ ސޮއި ބޭނުންކޮށްގެން 20 ސެޕްޓެންބަރު 2020ގައި ތައްޔާރުކޮށްފައިވާ ލިޔުމުގެ ޞައްޙަކަން ކަށަވަރުކުރުމަށްޓަކައި އިތުރަށް ބެލިބެލުމުން، ޠޫބާއަކީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ވަކާލާތުކުރުމުގެ ހުއްދަ ދޫކޮށްފައިވާ ފަރާތެއް ނޫންކަން ކަށަވަރުވެފައިވާތީ، އެ މައްސަލަ ތަޙުޤީޤުކޮށްދިނުމަށް އެދި ފުލުހުންގެ އިދާރާއަށް ހުށަހަޅާފައި ވާނެކަމަށެވެ.

ގާނޫނީ ވަކީލުކަމުގެ ހުއްދަ ނެތި ރާއްޖޭގައި އެ މަސައްކަތް ކުރުމަކީ ގާނޫނީ ކުށެކެވެ. އެހެންކަމާއެކު ގާނޫނީ ވަކީލުންގެ ޚިދުމަތް ހޯދާއިރު، އެ ވަކީލަކީ ހުއްދަ ދޫކޮށްފައިވާ ވަކީލެއްކަން ކަށަވަރުކުރުމަށް ބާ ކައުންސިލުން ވަނީ އިލްތިމާސްކޮށްފައެވެ.

ރާއްޖޭގައި ގާނޫނީ ވަކީލުކަމުގެ ހުއްދަ ދީފައިވާ ފަރާތްތަކުގެ މަޢުލޫމާތު ބާ ކައުންސިލުގެ ވެބްސައިޓުން ބެލޭނެކަމަށް އެ ކައުންސިލުން ވަނީ ބުނެފައެވެ.