އަރިއަތޮޅު އުތުރުބުރީ ތޮއްޑޫގައި އިމާރާތްކުރަން ފަށާފައިވާ 30 އެނދުގެ ޞިއްޙީ މަރުކަޒު ހޮސްޕިޓަލެއްގެ ގޮތުގައި ތަރައްޤީކުރުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
އަރިއަތޮޅު އުތުރުބުރިއަށް ކުރައްވާ ދަތުރުފުޅުގައި ތޮއްޑޫ ރައްޔިތުންނާ ބައްދަލުކުރައްވައި އެމަނިކުފާނު ވިދާޅުވީ، މިހާރު މަސައްކަތް ފެށުމަށް ތައްޔާރުވެފައިވާ ޞިއްޙީ މަރުކަޒުގެ ބަދަލުގައި ދެން ކުރިއަށްގެންދާނީ ހޮސްޕިޓަލެއްގެ މަސައްކަތް ކަމަށެވެ.
މި މަސައްކަތް ކުރިއަށްގެންދިއުމަށް ޞިއްޙީ ވުޒާރާގެ ލަފާވެސް ހޯއްދަވާފައި ވާކަމަށް އެމަނިކުފާނު ވިދާޅުވިއެވެ.
އެގޮތުން، ޞިއްޙީ މަރުކަޒު ހޮސްޕިޓަލަކަށް ބަދަލުކުރުމަށް ބޭނުންވާ އޮޕަރޭޝަން ތިއޭޓަރާއި އައިސީޔޫ ހިމެނުމުގެ ފުރުސަތު އެބައޮތްކަމުގެ ޔަގީންކަން، ޞިއްޙީ ވުޒާރާގެ ކަމާގުޅޭ ފަންނީ ބޭފުޅުން އެމަނިކުފާނަށް އަރުވާފައިވާކަމަށް ވާކަމަށްވެސް ރައީސް ވިދާޅުވިއެވެ.
އަރިއަތޮޅަށް ކުރައްވާ ދަތުރުފުޅުގައި އެމަނިކުފާނު ތޮއްޑުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވީ މިއަދުގެ މެންދުރުފަހުއެވެ.
