ނޫސްވެރިކަމުގެ މިނިވަންކަން ގެއްލޭ ބިލެއް ހުށަހެޅުމަކީ ކަންބޮޑުވާކަމެއް: ފައިޞަލް ނަސީމް

Loading

August 19, 2025
profile
Facebook
Twitter
WhatsApp

ނޫސްވެރިކަމުގެ މިނިވަންކަން ގެއްލޭގޮތަށް ރައްޔިތުންގެ މަޖިލީހަށް ބިލެއް ހުށަހެޅުމަކީ ކަންބޮޑުވެވަޑައިގަންނަވާ ކަމެއް ކަމަށް، ކުރީގެ ނައިބު ރައީސް ފައިޞަލް ނަސީމް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ، ޑިމޮކްރަސީއަށް މުހިންމު ބާރެއް ކަމަށްވާ ނޫސްވެރިކަމުގެ މިނިވަންކަން ނަގައިލުމަށްޓަކައި، މީޑިއާތަކުގެ ރަޖިސްޓްރީ ބާތިލުކޮށް، މީޑިއާތަކުން ބްރޯޑްކާސްޓުކުރުން ހުއްޓުވޭގޮތަށް ކޮމިޝަނެއް އުފައްދަވައި، އެ ކޮމިޝަނަށް ގިނަ މެންބަރުންތަކެއް އައްޔަންކުރެއްވުމުގެ ބާރު ރައީސުލްޖުމްޙޫރިއްޔާއަށް ލިބިވަޑައިގަންނަވާ ގޮތަށް މަޖިލީހަށް ބިލެއް ހުށަހެޅުމަކީ އެމަނިކުފާނު ވަރަށް ކަންބޮޑުވެވަޑައިގަންނަވާ ކަމެއް ކަމަށެވެ.

”ރަނގަޅު ވެރިކަމެއް ކުރުމަށްޓަކައި، ނޫސްތައް ހުއްޓުވުމުގެ ބަދަލުގައި އިސްކަންދޭންވާނީ ޖަވާބުދާރީވުމަށް. ތަހުޒީބީ ޤައުމުތަކުގައި މީޑިއާތައް ރެގިއުލޭޓްކުރަނީ ސެލްފް ރެގިއުލޭޓެޑް ބޮޑީތަކުން. އެކަން ކުރަންޖެހޭނެ ގޮތަކީ އެއީ. މި ބިލު މަޖިލީހަށް ބަލައިނުގަތުމަށް ގޮވާލަން.“ ފައިޞަލް ވިދާޅުވެފައިވެއެވެ.

އެމަނިކުފާނު މިހެން ވިދާޅުވެފައި ވަނީ، ނޫސްވެރިިކަމުގެ މިނިވަންކަން ކުރިއަރުވައި، ތަރައްޤީކޮށް، ރާއްޖޭގައި ނޫސްވެރިކަމުގެ މިނިވަންކަން ދަމަހައްޓައި، (ބްރޯޑްކާސްޓް ކުރުންވެސް ހިމެނޭގޮތަށް) މީޑިއާގެ ކަންކަން ރެގިއުލޭޓްކުރާނެ ވަކި މުއައްސަސާއެއް އުފެއްދުމަށް، ތުޅާދޫ ދާއިރާގެ މެންބަރު ޢަބްދުލްޙަންނާން އަބޫބަކުރު ހުށަހެޅުއްވި ބިލާ ގުޅިގެންނެވެ.

މި ބިލުގައި ވާގޮތުން، މި ކޮމިޝަނުގެ މަސްއޫލިއްޔަތުތަކުގެ ތެރޭގައި:

* ދޮގު ޚަބަރު ފަތުރާ ވަސީލަތްތައް ހުއްޓުވުމަށް އަޅަންޖެހޭ ފިޔަވަޅުތައް އެޅުމަށް، ކަމާބެހޭ ފަރާތްތަކަށާއި ޚިދުމަތް ފޯރުކޮށްދޭ ފަރާތްތަކަށް އެންގުން.

* ދޮގު ޚަބަރު ފަތުރައި، ރައްޔިތުންގެ ހިތްތަކުގައި ބިރުވެރިކަމާއި ނަފުރަތު އުފައްދައި، ޤައުމުގެ މަސްލަހަތު ނަގައިލަން މަސައްކަތްކުރާކަން ފާހަގަކުރެވިއްޖެނަމަ އެ މީހަކު ނުވަތަ ބަޔަކާމެދު ފިޔަވަޅު އަޅަން ކަމާބެހޭ ފަރާތްތަކަށް އެންގުން.

ހަތް މެންބަރުންގެ މައްޗަށް އެކުލެވޭ މި ކޮމިޝަނުގައި ރައީސުލްޖުމްހޫރިއްޔާ އައްޔަންކުރައްވާ ތިން މެމްބަރުންނާއި، މީޑިއާތަކުން އިންތިޚާބުކުރާ ހަތަރު މެންބަރުން ތިބޭނެއެވެ. އަދި ކޮމިޓީގެ ރައީސް އައްޔަންކުރައްވާނީ ރައީސުލްޖުމްހޫރިއްޔާއެވެ.

މި ބިލު ގާނޫނަކަށް ވުމުން، ރާއްޖޭގައި އެއްވެސް ނޫހެއް ނުވަތަ މަޖައްލާއެއް ޝާއިޢުކުރަންވާނީ އެ ކޮމިޝަނުގައި ރަޖިސްޓްރީ ކޮށްގެންނެވެ.

މީގެ އިތުރުން، މީޑިއާގެ ވަސީލަތެއްގައި ޝާއިޢުކުރި އެއްޗަކާ ގުޅިގެން ވަކި ފަރާތެއް ނުވަތަ ބައެއްގެ ޙައްޤަށް އުނިކަމެއް ލިބުނުކަމުގެ ޝަކުވާ ހުށަހަޅައިފިނަމަ އެ މައްސަލަ ބެލުމުގެ ބާރު ކޮމިޝަނަށް ލިބޭނެއެވެ.

މި ބިލު ގާނޫނަކަށް ވުމުން، މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން އުވިގެންދާނެއެވެ. އެއަށްފަހު މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ނަމުގައި ރައީސުލްޖުމްހޫރިއްޔާ ކޮމިޝަނެއް އުފައްދަވަންވާނެއެވެ.

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް