ގެދޮރުވެރިޔާ ސްކީމުގެ ދަށުން ފުލެޓު ލިބޭނެކަމަށް ކުރީ ސަރުކާރުން އިޢުލާންކުރި ލިސްޓުގައި ހިމެނޭ މީހެއްގެ ޝަރުތު ހަމަނުވާކަމަށް، މި ސަރުކާރުން ނެރުނު ލިސްޓުގައި ކަނޑައަޅާފައިވާތީ އެ މައްސަލަ ސިވިލް ކޯޓަށް ހުށަހަޅައިފިއެވެ.
އެ މީހާގެ ފަރާތުން އޭނާގެ ވަކީލު ހުށަހެޅި މި މައްސަލާގައި އެދިފައިވަނީ އޭނާގެ މުވައްކިލަށް ލިބޭނެކަމަށް ލިސްޓުގައި ކަނޑައެޅި ފުލެޓު އެހެން މީހަކާ ހަވާލުކުރުން ހުއްޓުވުމުގެ ވަގުތީ އަމުރެއް ނެރެދިނުމަށެވެ.
ނޫސްވެރިންނަށް މަޢުލޫމާތު ދެމުން، އޭނާގެ ވަކީލު މުޙައްމަދު ނިޝާން އިބްރާހީމް ބުނީ، އެ މައްސަލަ ހުށަހެޅީ ފްލެޓް ލިސްޓު މިހާރު އޮތް ގޮތުން އެތައް ބައެއްގެ ޙައްޤު ގެއްލޭތީ ކަމަށެވެ.
މި މައްސަލާގައި، މާލޭ ސިޓީ ކައުންސިލުގެ މެންބަރު ސައިފް ފާތިޙު ވިދާޅުވީ، އެގޮތަށް ދިމާވެފައިވާ ވަކިވަކި މީހުންގެ މައްސަލަތަކަށް ކޯޓު މެދުވެރިކޮށް ޙައްޤު ހޯއްދަވައިދެއްވުމަށް މަސައްކަތް ކުރައްވާނެ ކަމަށެވެ.
ނިމިދިޔަ ސަރުކާރުން އެކުލަވައިލި ލިސްޓު މި ސަރުކާރުން އަނެއްކާވެސް ރިވިއުކުރުމަށްފަހު އަލުން ވަނީ ލިސްޓެއް ކަނޑައަޅާފައެވެ.
އަދި މި ލިސްޓުގައި ހިމެނޭ މީހުންނާއެކު ފުލެޓުގެ އެއްބަސްވުމުގައި ސޮއިކުރުމުގެ މަސައްކަތްވެސް މިހާރު ދަނީ ކުރިއަށެވެ.