ދުނިޔޭގެ ބޮޑެތި ބާރުތަކުގެ ނުފޫޒުގައި ފަލަސްތީނުގެ ދައުލަތެއް ރަސްމީގޮތުން މިވަގުތު އިއުލާން ކުރެވިފައިނެތް ކަމުގައި ވިޔަސް އެ ދައުލަތް އޮންނަން ޖެހޭނެކަމަށް ދުނިޔޭގެ ގިނަ ޤައުމުތަކުން ގަބޫލުކުރެއެވެ.

ހައިރާންވެ އަންތަރީސް ވަނީ ދުނިޔޭގެ އެންމެ ބާރުގަދަ މުއައްސަސާއިން ފަލަސްތީނުގެ މިނިވަން ދައުލަތެއްގެ އިންފާރު ކަނޑައަޅައި ނިންމުމަށްފަހު އެހެންބަޔަކު އެތަނަށް ވެރިވެ ގަނެ އާބާދު ކުރަމުން ދާއިރު އެކަން ހުއްޓުވަން އެ ބާރުގަދަ މުއައްސަސާއިން ނުކުޅެދިފައިވާ ކަމެވެ.
ފަލަސްތީނުގެ ދައުލަތަކަށް މަސައްކަތް ކުރަމުން ގެންދާއިރު ފަލަސްތީނަށް ނިސްބަތްކުރެވޭ ބިމުގައި އެހެން ބަޔަކު ވަޒަންވެރިވެގަނެގެން އުޅުނު ގޮތުގެ ކުރު ތަޢާރުފެއް ހިމަނާލާނަމެވެ.
ފަލަސްތީނުގެ ބިމުގައި އެންމެފުރަތަމަ ދިރިއުޅުނުކަން ތާރީޚުން އެނގިފައިވަނީ ކަންއާނީ ދަރިފަސްކޮޅުގެ މީހުން ކަމަށެވެ. ކަންއާނުގެ އަހުލުވެރިން ނިސްބަތް ކުރެވެނީ ސްޓޯން އޭޖް އޭ މިކިޔާ ޒަމާނުގައި ދިރިއުޅުނު މީހުންގެ ތެރެއަށް މީގެ ފަސްހާސް ވަރަކަށް އަހަރުކުރިން އީރާން ސަރަހައްދުން އައިސް ވަޒަންވެރިވި މީހުންވެސް ހިމެނޭގޮތުގައި ކަމަށް ގަދީމީ ތާރީޚުން އެނގެއެވެ.
ތައުރާތު ފޮޮޮތުގެ އަހުލުވެރިން ގަބޫލުކުރާ ގޮތުގައި ކަންއާނުގެ ބިމަކީ އިބްރާހިމް ގެފާނާއި އެކަލޭގެފާނުގެ ދަރިފަސްކޮޅަށް މާތް ﷲ ދެއްވާފައިވާ ބިމެކެވެ. ފަހުގެ ތާރީޚް ތަކުގައި ބައިޒަންޓައިނުންނާއި ރޯމަނުންނާއި ކުރުސޭޑަރުންނާއި އުސްމާނީ ދައުލަތާއި އަދި މުސްލިމުންގެ ބާރުގެ ދަށުގައި އެ ބިން އޮތް ޒަމާންތަކެއްވެސް ފާހަގަކުރެވިފައި ވެއެވެ.
އެންމެ ފަހުން ފުރަތަމަބޮޑު ހަނގުރާމައިގެ ދުވަސްވަރު އިނގިރޭސީންގެ ބާރުގެ ދަށަށް އެ ބިން ގެނެވިފައިވަނީއެވެ. އެއަށްފަހު ބެލްފޯރ ޑިކްލަރޭޝަންގެ ދަށުން އެބިމުގެ ބޮޑު ބައެއް އިސްރާއީލަށް އިނގިރޭސީން އިސްވެތިބެ ދިނީއެވެ.
ފަލަސްތީނުގެ މިނިވަން ދައުލަތެއް އޮންނަންޖެހޭ ކަމަށް ގަބޫލު ނުކުރާ ގައުމުތަކުގެ ލިސްޓް ކުރުވަމުން ކުރުވަމުން ދިޔަނަމަވެސް އެމެރިކާއާއި ޖަޕާނާއި ދެކުނު ކޮރެއާ އިން އަދިވެސް ފަލަސްތީނުގެ މިނިވަން ދައުލަތަކަށް ތާއީދު ކުރުމުގެ ވިސްނުމެއް ނުގެންގުޅޭކަމަށް ބެލެވެއެވެ.
ފަލަސްތީނުގެ މިނިވަން ދައުލަތަކަށް ރުހުންދޭނެ ޖީ-7 ގައި ހިމެނޭ ފުރަތަމަ ގައުމަކަށް ވެގެންދާނީ ފަރަންސޭސި ވިލާތެވެ. ފަލަސްތީނުގެ މިނިވަން ދައުލަތް މި އަންނަ ސެޕްޓެމްބަރ މަހުގައި ފަރަންސޭސި ވިލާތުން ގަބޫލު ކުރާނެއެވެ. ހަމަ އެއާއެކު ކެނެޑާއާއި އޮސްޓްރޭލިއާ އިންވެސް މިއަންނަ ސެޕްޓެމްބަރ މަހުގައި އޮންނަ އ. ދ. ގެ އާންމު ބައްދަލު ކުރުމުގައި ފަލަސްތީނުގެ މިނިވަން ދައުލަތް ގަބޫލުކުރާނެއެވެ. ޔޫރަޕިއަން ޔޫނިއަންގައި ހިމެނޭ 27 ގައުމުގެ ތެރެއިން 11 ގައުމަކުން ފަލަސްތީނުގެ މިނިވަން ދައުލަތަކަށް މިހާރު ވަނީ ރުހުން ދީފައެވެ.
ޔަހޫދީންނަށް ފަލަސްތީނުގެ ބިމުގައި ދައުލަތެއް ގާއިމްކޮށްދިނުމުގެ މޭސްތިރިން ކަމުގައިވާ އިނގިރޭސި ވިލާތުންވެސް މިއަންނަ ސެޕްޓެމްބަރމަހު ބޭއްވޭ އ. ދ. ގެ އާންމު ބައްދަލުކުރުމުގައި ފަލަސްތީނުގެ މިނިވަންދައުލަތް ގަބޫލުކުރުން ވަރަށް ކައިރިއެވެ.
ޔޫރަޕާއި ކެރީބިއަންގެ ބައެއް ގައުމުތަކުން ފަލަސްތީނުގެ ދައުލަތް މިދިޔަ އަހަރު ވަނީ ގަބޫލު ކޮށްފައެވެ. މިހެން ވުމުން ވޯރކްރިމިނަލް ނަތަންޔާހޫ އާއި އެމެރިކާގެ ރައީސް ޓްރަމްޕް ބޭނުންވެގެން ފަލަސްތީނުގެ ގާޒާ އެބައިމީހުންގެ ރެސޯޓްހަދާ ދުނިޔޭގެ މުއްސަދިންނަށް ވިއްކާ ފައިދާނެރޭވޭނެ ތަނެއްކަމަކަށް ނުބެލެވެއެވެ. ޢަރަބި މުސްލިމް ގައުތަކުން ވަނީ އެގައުމުތަކުގައި އިސްރާޢީލުން ފަލަސްތީނުގައި ހިންގާ ގަތުލުއާމްތަކާއި ދެކޮޅަށް އެގައުމުތަކުގެ އާންމުން ބަސްބުނެ މަގުތަކަށްނިކުމެ ނުރުހުންފާޅުވެސް ކުރިޔަ ނުދީފައެވެ.