ޗައިނާއާއި އިންޑިއާއަކީ އިގްތިސާދީގޮތުން ފުދިފައިވާ 2 ގައުމުކަމަށާއި ދުނިޔޭގެ ބާޒާރުން ޖާގަ ކަށަވަރުކުރުމަށްޓަކައި އެ 2 ގައުމުން އެމެރިކާ ޑޮލަރަށް ބަރޯސާވެގެން ތިބޭކަށް ނުޖެހޭނެކަން އެމެރިކާގެ މަސްރަހް ދިރާސާ ކުރާ ޖެރާލްޑް ސެލެސްޓޭގެ ފޯރކާސްޓުގައި ހާމަކޮށްފިއެވެ.
މި މޭރުމުން އޭނާ ވާހަކަ ދައްކާފައި ވަނީ ކިއުބާ-އެމެރިކާގެ ނޫސްވެރިޔާ ރިކް ސަންޗޭޒްއާއެކު އެ މައުޟޫއުގައި ވާހަކަ ދައްކަމުންނެވެ. އޭނާ ބުނެފައިވާ އިބާރާތުން ބުނާނަމަ އެމެރިކާ ޑޮލަރ މިހާރު އޮތީ މަރުބަލީގައި ނޭވާހޮޅިއަށް އެޅި ވެންޓިލޭޓަރާ ގުޅާފައެވެ.
ދުނިޔޭގެ ބާޒާރުގައި އާންމު ދިރިއުޅުމަށް ބޭނުންވާ ތަކެތި އުފެއްދުމުގެ ބޮޑު ހިއްސާއެއް ޗައިނާއިން ފުރާލަދީފައި އޮތްއިރު އެމެރިކާއާއި ހުޅަނގުގެ ގައުމުތަކުން ޗައިނާގެ އުފެއްދުންތަކާ ނުލައި ދުވަހުން ދުވަހުގެ ބޭނުންތައްވެސް ފުއްދާ ނުލެވޭނެއެވެ.
އެމެރިކާއާއި ހުޅަނގުގެ ގައުމުތަކުން ރަޝިޔާއަށް އިންތިހާގެ އިގްތިސާދީ ފިއްތުންތައް ކުރިމަތި ކުރަމުން ގެންދާއިރުވެސް 2024-2025 ގައި 1.4 ގެ އިގްތިސާދީ ކުރިއެރުމެއް ވަނީ ހޯދާފައެވެ.
އިންޑިއާގެ އިގްތިސާދަށް ބަލާއިރު އުފެއްދުންތެރިކަމާއި މަސައްކަތްތެރިންގެ ފުދުންތެރިކަން ވަނީ ގާއިމް ކޮށްފައެވެ. އިންޑިއާގެ އުފެއްދުންތެރިކަމަށް އެމެރިކާ ޑޮލަރ ނެތަސް އުނިކަމެއް ނާންނާނެއެވެ.
މިހާރު ފެންނަ މަންޒަރުތަކަށް ބަލާއިރު ނޭވާހޮޅިއަށް އެޅިފައިވާ އެމެރިކާ ޑޮލަރ ވެންޓިލޭޓަރުން ނަގައިފިނަމަ އަލުން ދިރިގެން ތެދުވެދާނެ ކަމުގެ އުންމީދެއް ނެތެވެ. ބްރިކްސްގައި ހިމެނޭ ގައުމުތަކުގެ ފުދުންތެރިކަން އިތުރުވަމުން ދިޔަ މިންވަރަކަށް އެމެރިކާ ޑޮލަރަށް ލެނބިގެން ތިބުން ދާނީ މަދުވަމުންނެވެ. ބްރިކްސްއަށް ވަރަށް އަވަހަށް އިތުރު 32 ގައުމަކުން ގުޅޭނެކަމަށް ބެލެވެއެވެ.
ސެލެސްޓޭ މިސާލު ނެގީ އިންޑިއާގެ އިގްތިސާދުންނެވެ. އިންޑިއާގެ އުފެއްދުންތަކަށް އެމެރިކާގެ ރައީސް ޑޮނާލްޑް ޓްރަމްޕް އިތުރު ޓެރިފް އިއުލާން ކުރުމަކުން އިންޑިއާގެ އިގްތިސާދަށް އެނގުމެއް ނުވާނެއެވެ. ސަބަބަކީ އެމެރިކާއާ އެކު އިންޑިއާއިން ކުރާ ވިޔަފާރީގައި ހިމެނެނީ އިންޑިއާގެ ޖީ ޑީ ޕީގެ ހަމައެކަނި %2 އެވެ. އިންޑިއާގައި ތިބެގެން އެމެރިކާއިން އިންޑިއާގެ އުފެއްދުންތައް ގަންނަމުން ދިއުންވެސް ފާހަގަ ކުރެވެއެވެ. އެމެރިކާގެ ހާލަތަކީ މިއީއެވެ.
އެމެރިކާ ޑޮލަރަކީ ދުނިޔޭގެ އިގްތިސާދަށް މިހާރު ކުރިމަތި ވެފައިވާ ވަރަށް ބޮޑު ހުރަހެކެވެ. ބައިނަލް އަގްވާމީ ވިޔަފާރިތަކަށް މަގު ފަހިކޮށްދިނުމުގެ ބަދަލުގައި އެމެރިކާއިން ޑޮލަރގެ ބޭނުން ކުރަމުން ގެންދާތަން ފެންނަނީ އެ ގައުމުން ހިތްހަމަނުޖެހޭ ކޮންމެ ގައުމެއްގެ އިގްތިސާދު އިނދަ ޖައްސާލަން ބޭނުންކުރާ ހަތިޔާރެއްގެ ގޮތުގައެވެ.
އެމެރިކާ ޑޮލަރުގެ މޮނޮޕޮލީން ބައިނަލް އަގްވާމީ ބާޒާރު މިނިވަން ކޮށްދިން ކަމަށްޓަކައި ދާދި އަވަހަށް ބްރިކްސްގެ ގައުމުތަކަށް ދުނިޔެ ޝުކުރުވެރިވާނެއެވެ. އެ ދުވަހުގެ ދުރު ކައިރިމިން ކަނޑައެޅިގެންދާނީ ބްރިކްސް ގެ ގައުމުތަކުން އެމެރިކާ ޑޮލަރާ ދުރަށް ޖެހޭ މިންވަރެއްގެ މައްޗަށެވެ.
އެންމެފަހުގެ ޚަބަރުތަކުން އެނގިފައިވާގޮތުގައި އިންޑިއާއިން އެމެރިކާ ޑޮލަރއަށް ބުރަވެފާއޮތުން ދޫކޮށްލައި އޭގެ ބަދަލުގައި އިންޑިއާގެ ރުޕީސް ހުޅުވާލާފައި އޮތްކަން ހާމަކޮށްފިއެވެ. އިންޑިއާއިން ރަސްމީގޮތުން ހާމަކޮށްފައިވާގޮތުގައި ބްރިކްސްގެ މެމްބަރު ގައުމުތަކުން އިންޑިއާއާއެކު ކުރާ ވިޔަފާރީގެ މުޅިއަގު އިންޑިއާ ރުޕީސް އިން އަދާކުރެވޭނެއެވެ. އެނަލިސްޓުންދެކޭގޮތުގައި އިންޑިއާގެ މި ފިޔަވަޅުގެ ސަބަބުން ބައިނަލް އަގްވާމީ ބާޒާރުގައި އެމެރިކާ ޑޮލަރގެ ބޭނުން ކުޑަވެގެންދާނެއެވެ. ބްރިކްސް ގައުމުތަކުގެ އިތުން ދުނިޔޭގެ އެހެން ގައުމުތަކަށްވެސް ރިޒާވް ބޭންކް އޮފް އިންޑިއާގެ ސަރކިއުލަރ ވަނީ ފޮނުވާފައެވެ. އަދި ކޮންމެ ގައުމަކުންވިޔަސް އިންޑިއާއާއެކު ކުރާ ކްރޮސް-ބޯޑަރ ވިޔަފާރީގެ އަގު އިންޑިއާ ރުޕީސް އިން އަދާކުރެވޭނެކަން ވަނީ ހާމަ ކޮށްފައެވެ.
ރިޒާވް ބޭންކް އޮފް އިންޑިއާގެ ހުއްދަ ހޯދުމަކާ ނުލައި އިތުރު ވޮސްޓްރޯ އެކައުންޓް ހުޅުވާދިނުމަށް އިންޑިއާގެ ބޭންކުތަކަށް މިދިޔަ އަންގާރަ ދުވަހު ރިޒާވް ބޭންކް އޮފް އިންޑިއާއިން ވަނީ އަންގާފައެވެ. އަދި ބޭރު ގައުމުތަކާއެކު ކުރާ ވިޔަފާރީގެ އަގު ވޮސްޓްރޯ އެކައުންޓްތައް ބޭނުންކޮށްގެން އިންޑިއާ ރުޕީސް އިން އަދާކުރަމުން ގެންދިއުމަށްވެސް ރިޒާވް ބޭންކުން ބާރު އަޅާފައި ވެއެވެ.
މިއީ އިންޑިއާގެ އުފެއްދުންތަކަށް %50 ގެ ޓެރިފެއް ނަގަން އެމެރިކާގެ ރައީސް ޑޮނާލްޑް ޓްރަމްޕް އިއުލާން ކުރުމުން ދިން ރައްދެއް ކަމަށާއި އަދި އިންޑިއާ ރުޕީސްގެ އަގު ހިފޭއްޓުމަށް އިންޑިއާ ސަރުކާރުން އެޅި ފިޔަވަޅެއްކަމް އެނގިފައި ވެއެވެ.
އެމެރިކާގެ މަޝްހޫރު އިކޮނޮމިސްޓް ޖެފްރީ ޝޭސް ބުނެފައިވެއެވެ. އެމެރިކާއިން ދެކެނީ އިންޑިއާއަކީ މުހިންމު ބައިވެރިއަކަށްވުރެން ބޮޑަށް ސިޔާސީ ރާޒުވާ ކުޅިބައިގެ މަނަލެއްގެ ގޮތުގައެވެ. އިންޑިއާގެ ސިޔާސަތުތައް އެކުލަވާލުމުގެ ފުރުސަތު އެމެރިކާއަށް ފަހިކޮށް ނުދިނުން ބުއްދިވެރިކަމަށް އޭނާ މަޝްވަރާ ދީފައި ވެއެވެ.
One Response
މާތްالله ގެ ހެޔޮރަޙްމަތްފުޅާއިއެކު އެމެރިކާގެ ބާރުވެރިކަންދާދިއަވަހަށް ނެތިގެންދިއުމަކީ އަހަރެންގެ އަބަދުގެ ދުޢާ އެދުވަސްދެއްކެވުންއެދެނީ ޚާލިޤްލްކައުނައިންގެ ޙަޟްރަތުން