ލ. ކައްދޫގައި ރޭ ދުވަސްވީ އަންހެނަކު ނިޔާވި އެކްސިޑެންޓުގައި، ސައިކަލު ދުއްވި މީހާ ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައިވަނީ ލ. ފޮނަދޫ / ހޯރަވިލާ، މުހައްމަދު ނައުސާން (37އ) ކަމަށް ދިވެހި ފުލުހުންގެ ޚިދުމަތުން މަޢުލޫމާތުދެއެވެ.
ފޮނަދޫން ގަމަށް ދަތުރުކުރި ސައިކަލެއް،، ކައްދޫ އެއާޕޯޓަށް ދާ މަގު ހުރަސްކުރި ދެ މީހެއްގެ ގައިގައި ޖެހި އެކްސިޑެންޓުވީ ރޭ 7.15 ހާއިރެވެ.
މި ހާދިސާގައި، މަގު ހުރަސްކުރި ދުވަސްވީ އަންހެންމީހާ ނިޔާވެފައިވާއިރު، އޭނާއާ އެކުގައި ދިޔަ މާމަ ދަރިފުޅަށްވެސް ވަނީ ސީރިއަސް އަނިޔާތަކެއް ވެފައެވެ. އަދި ސައިކަލު ދުއްވަން އިން މީހާއަށާއި އޭނާގެ ފަހަތުގައި އިން މީހާއަށްވެސް ވަނީ އެކި ވަރުގެ އަނިޔާތައް ވެފައެވެ.
މި މައްސަލާގައި ހައްޔަރުކުރި ނައުސާންގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް އަމުރުކޮށްފައިވާކަމަށް ފުލުހުންގެ ޚިދުމަތުން ބުނެއެވެ.
ފުލުހުން ބުނީ މި މައްސަލަ އިތުރަށް ބަލައި ތަޙުޤީޤުކުރަމުން ދާކަމަށެވެ.
