އިޒްރޭލުން ފަލަސްތީނުގައި ހިންގަމުންދާ ޤަތުލުއާންމާއި އަނިޔާވެރިކަމާ ދެކޮޅަށް ބާއްވާ ޤައުމީ ބޮޑު އެއްވުން މާދަމާ ބޭއްވުމަށް ނިންމައިފިއެވެ.
އެ އެއްވުން އިންތިޒާމުކުރާ ކޮމިޓީން ބުނިގޮތުގައި، މާދަމާ ހަވީރު 4:30ގައި އެއްވުން ފަށާނީ މާލޭގެ މާފަންނު ސްޓޭޑިއަމުންނެވެ.
އަންހެންނާއި ފިރިހެނުންނަށް ވަކިން ތިބެވޭގޮތަށް އިންތިޒާމުކޮށްފައިވާ މި އެއްވުމުގައި ބައިވެރިވާން ބޭނުންވާ މީހުން ހަވީރު 4:00ށް އެ ސަރަހައްދަށް ޖަމާވުމަށް އެ ކޮމިޓީން ވަނީ އެދިފައެވެ.
މި އެއްވުމުގައި ބޭނުންކުރާނެ ހުރިހާ އެއްޗެއްވެސް ފޯރުކޮށްދޭނީ އެ ކޮމިޓީން ކަމަށްވެސް ވަނީ ބުނެފައެވެ.
މި އެއްވުމުގައި، ގާނޫނާ ޚިލާފު އެއްވެސް ކަމެއް ނުކުރުމަށާއި، ރާއްޖޭގައި އުޅުއްވާ ޑިޕްލޮމެޓުންނަށް އުނދަގޫވާނެ ނުވަތަ އަނިޔާއެއް ވެދާނެ ކަމެއް ނުކުރުމަށާއި، އެ ސަރަހައްދުގައި އަލިފާންފަދަ ތަކެތި ބޭނުން ނުކުރުމަށާއި، އެމްބިއުލާންސް ފަދަ އުޅަނދުތަކަށް އުނދަގޫ ނުވާނެ ގޮތަށް އުޅަނދުތައް ޕާކުކުރުމަށް އެ ކޮމިޓީން ވަނީ އިލްތިމާސްކޮށްފައެވެ.
