ޒަކާތާ ގުޅޭ ކަންކަން ގާނޫނީ އޮނިގަނޑެއްގެ ދަށުން ބެލެހެއްޓުމަށް ސަރުކާރުން އެކުލަވާލައި މަޖިލީހަށް ހުށަހެޅުއްވި ބިލު މިއަދު މަޖިލީހުން ބަލައިގެންފިއެވެ.

މިއީ ޒަކާތް ދެއްކުމާއި، ބަލައިގަތުމާއި، ޒަކާތުގެ ގޮތުގައި ލިބޭ ފައިސާ ބެހުމުގެ ކަންކަން ހަރުދަނާ ގާނޫނީ އޮނިގަނޑެއްގެ ދަށުން ބެލެހެއްޓުމާ ގުޅޭގޮތުން ސަރުކާރުން ހުށަހެޅުއްވި ބިލެކެވެ.

ބިލުގައި ވާގޮތުން، އެ ފަރާތެއްގެ މުދާ ހުރީ ރާއްޖޭގައި ކަމުގައި ވީނަމަވެސް، ނުވަތަ ރާއްޖެއިން ބޭރުގައި ކަމަށް ވީނަމަވެސް، ރާއްޖޭގައި ވަޒަންވެރިވެފައިވާ ކޮންމެ ފަރާތަކާއި، ރާއްޖޭގައި ވަޒަންވެރިވެގެން ނޫޅުނުނަމަވެސް ރާއްޖޭގައި  އެ މީހެއްގެ މުދާ ހުރިނަމަ ޒަކާތް ދައްކަން ޖެހޭނެއެވެ.

އަދި ޒަކާތުގެ ނިޒާމު ހިންގައި ބެލެހެއްޓުމުގައި މިނިސްޓަރަށާއި ޒަކާތު ހައުސްއަށް ލަފާދީ، އަދި އެ ނިޒާމު ހިންގުން ވިލަރެސް ކުރުމަށްޓަކައި، އެ ގާނޫނަށް ޢަމަލުކުރަން ފަށާތާ ދެ މަސްދުވަހުގެ ތެރޭގައި ޒަކާތު ކައުންސިލުގެ ނަމުގައި ރައީސުލްޖުމްހޫރިއްޔާ ކައުންސިލެއް އުފައްދަވަންޖެހެއެވެ. 

މި ކައުންސިލުގައި މިނިސްޓަރާއި، ޑިރެކްޓަރ ޖެނެރަލް، އަދި މޯލްޑިވްސް މަނިޓަރީ އޮތޯރިޓީގެ އިސް މުވައްޒަފުންގެ ތެރެއިން އެ އޮތޯރިޓީން ކަނޑައަޅާ މުވައްޒަފަކު ތިއްބަވަންޖެހެއެވެ.

މީގެ އިތުރުން، ޤުރުއާނާ ބެހޭ މަރުކަޒުން ބޭފުޅަކާއި، ފިނޭންސް މިނިސްޓްރީގެ އިސް ބޭފުޅަކާއި، ފަތުވާ މަޖިލީހުގެ ބޭފުޅަކާއި، އިސްލާމިކް މިނިސްޓްރީން ބޭފުޅަކާއި، ސަރުކާރުގެ އިދާރާއެއްގައި މަސައްކަތްނުކުރާ ޒަކާތުގެ މާހިރުންގެ ތެރެއިން ރައީސް އައްޔަންކުރައްވާ ދެ ބޭފުޅަކުވެސް އެ ކައުންސިލުގައި ތިއްބަވަންޖެހެއެވެ.

އަދި، ޝަރީޢާ އެޑްވައިޒަރީ ކޮމިޓީއެއް އެކުލަވާލަންޖެހޭކަމަށް މި ބިލުގައި ބުނެފައިވާއިރު، އެ ކޮމިޓީގެ މަސައްކަތްތައް ހަވާލުކޮށްފައި ވަނީ ޒަކާތު ހައުސް އަށެވެ. އަދި ޒަކާތު ފަންޑު ހިންގާނެ ގޮތާއި، ފަންޑުން ކުރެވޭނެ ކަންކަންވެސް ބިލުގައި ވަނީ ބަޔާންކޮށްފައެވެ.

ޒަކާތުގެ ބެހެނިވެރިއަކަށް ނުވާ ފަރާތަކަށް ޒަކާތު ފައިސާ ދޫކުރުމާއި، ހުއްދަކުރާ ބޭނުންތައް ފިޔަވައި އިތުރު ކަމަކަށް އެ ފައިސާއިން އިންވެސްޓްކޮށްފިނަމަ 1،000 ރުފިޔާއާ 100،000 ރުފިޔާއާ ދެމެދުގެ އަދަދަކުން ޖޫރިމަނާކުރާނެ ކަމަށްވެސް ބިލުގައި ވެއެވެ.

ހަމަ އެއާއެކު، އެއްވެސް ފަރާތަކުން ޞައްޙަ ނޫން، ނުވަތަ ދޮގު މަޢުލޫމާތު ހުށަހަޅައިގެން ޒަކާތު ފައިސާ ހޯދައިފިނަމަ، އެ ކުށްކުރި ފަރާތުން ހޯދި ފައިސާއާ އެއްވަރުގެ އަދަދަކުން އެ ފަރާތެއް ޖޫރިމަނާކުރުމާއެކު، ޒަކާތު ހައުސްއިން ކަނޑައަޅާ މުއްދަތަކަށް ޒަކާތުގެ ބެހެނިވެރިންގެ ދަފްތަރުން ނަން އުނިކުރާނެ ކަމަށްވެސް އެ ބިލުގައިވެއެވެ.

މަޖިލީހަށް މި ބިލު ހުށަހެޅުއްވީ ވިލުފުށީ ދާއިރާގެ މެންބަރު ޙަސަން ވަޙީދެވެ. މިއަދުގެ ޖަލްސާގައި ބައިވެރިވެވަޑައިގަތް 72 މެމްބަރުންގެ ވޯޓުން ބިލު، މަޖިލީހަށް ބަލައިގަނެ، އިތުރަށް ދިރާސާކުރަން ކޮމިޓީއަށް ފޮނުވުމަށް ވަނީ ފާސްކޮށްފައެވެ.