ވަޒީފާއިން ވަކިކުރެއްވިއިރު، ދިފާޢުގައި ދެއްކެވި އެއްވެސް ވާހަކައަކަށް ރިޢާޔަތްކުރައްވާފައި ނުވާކަމަށް، ހދ ޖުޑީޝަރީ ދާއިރާގެ ކުރީގެ އިސް މެޖިސްޓްރޭޓް ޢަލީ އާދަމް ވިދާޅުވެއްޖެއެވެ.
އޭނާ މިފަދައިން ވިދާޅުވެފައިވަނީ، ޚަޞްމަކަށް އޭނާ ގުޅުއްވައި މެސެޖުކުރެއްވިކަމުގެ ތުހުމަތުގައި ހުށަހެޅުނު މައްސަލައެއްގައި، 2023ވަނަ އަހަރުގެ ޑިސެންބަރު މަހުގެ 12ވަނަ ދުވަހު، ރައްޔިތުންގެ މަޖިލީހުގެ 46 މެންބަރުންގެ އިއްތިފާޤުން އޭނާ މަޤާމުން ވަކިކުރެއްވި މައްސަލައާ ގުޅޭގޮތުން އޭނާގެ ފޭސްބުކް އެކައުންޓުގައި ކުރެއްވި ޕޯސްޓެއްގައެވެ.
މި ޕޯސްޓުގައި އޭނާ ވިދާޅުވެފައިވަނީ، ޒިންމާދާރު މަޤާމުތަކުގައި 27 އަހަރުވަންދެން ދައުލަތަށް ޚިދުމަތްކުރައްވާފައި ވަނިކޮށް، މަޤާމުގައި ބަހައްޓައިގެން އަބުރުކަތިލައި، އެއްވެސް ޢިނާޔަތެއް ނުލިބޭގޮތަށް (އަދި ޕެންޝަނަށް ކެނޑި އެއްޗަކުންވެސް އެއްޗެއް ނުލިބޭގޮތަށް) ވަޒީފާއިން ވަކިކުރެއްވީ، ދިފާޢުގައި ދެއްކެވި އެއްވެސް ވާހަކައަކަށް ރިޢާޔަތްކުރުމެއްނެތި ކަމަށެވެ.
ޢަލީ އާދަމް ވިދާޅުވެފައިވަނީ، އޭނާއަކީ އަނބިކަނބަލަކާއި 3 ދަރިކަލުން ބަލަހައްޓަވާ ބޭފުޅަކަށް ވީއިރު، އޭނާއާއި ދަރިދަރިކަލުންނަށް ނަފްސާނީގޮތުން ލިބިވަޑައިގަތް ގެއްލުމާއި ހިތާމައިގެ ދިފާޢުގައި އެއްޗެއް ވިދާޅުވާނެ ފުރުސަތެއްވެސް އޭރު ލިބިވަޑައިގެންފައި ނުވާކަމަށެވެ.
އޭނާ ވިދާޅުވިގޮތުގައި، ހުރިހާ ކަމެއް ކުރިއިރު އިތުރަށް ”ސުލޫކީ ވެދާނެތީ“ ހިމޭނުން ހުންނެވުން ނޫން ގޮތެއް އޭރު ނެތްކަމަށެވެ. ޖޭއެސްސީއާއި މަޖިލީހުގެ ކޮންޓްރޯލް އެމްޑީޕީގެ މެޖޯރިޓީގެ އަތުގައި އޮވެފައި، އޭރުގެ ޖޭއެސްސީގެ ރައީސް ޙިސާން ޙުސައިނާއި އޭނާގެ ފިރިކަލުންނަކީވެސް ރައްޔިތުންގެ މަޖިލީހުގެ މެންބަރުންނަށް ވުމުން، ރައްޔިތުންގެ މަޖިލީހުންވެސް ޢަލީ އާދަމް މަޤާމުން ވަކިކުރެއްވުމުގައި އިސްކޮށްފައިވަނީ ޕާޓީގެ ސިޔާސަތާއި ޖޭއެސްސީގެ ނިންމެވުން ކަމަށް އޭނާ ވަނީ ވިދާޅުވެފައެވެ.
އަދި އިޖުރާތު ފުރިހަމަކުރިކަމަށް ނިންމެވިއިރު، ފުރިހަމަކުރި ގޮތް ބައްލަވާފައި ނުވާކަމަށާއި، މަޖިލީހަށް ހާޒިރުކުރިނަމަވެސް، އަޑުއެހުން ނިންމަވާލެއްވީ، ވާހަކަދެއްކެވުމަށް ބޭނުންފުޅުވާކަމަށް ވިދާޅުވެ އަތްޕުޅު ނަންގަވައިގެން އިންނަވަނިކޮށް، އެ ފުރުސަތު ނުދެއްވައިކަން އޭނާ ފާހަގަކުރެއްވިއެވެ.
މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) އިންނެވި މި މަޖިލީހުގައި، އިތުރު ފުރުސަތަކަށް އެދިވަޑައިގެންނެވިނަމަވެސް، ނަމަވެސް ފުރުސަތު ނުދެއްވައި ވަކިކުރެއްވީ، އޭނާއަށް ޙައްޤުވާ އަހަރީ ޗުއްޓީގައި ހުންނަވަނިކޮށް ކަމަށް ވާއިރު، އަހަރީ ޗުއްޓީއާއި މުސާރައަކީވެސް އޭނާގެ ޙައްޤެއްކަން ޢަލީ އާދަމް ވަނީ ފާހަގަކުރައްވާފައެވެ.
”އަޅުގަނޑުގެ މައްޗަށް އެމްޑީޕީގެ އެކްޓިވިސްޓުންގެ މެޖޯރިޓީ އޮތް ޖޭއެސްސީން ބެލި ސުލޫކީ މައްސަލަތަކަކީ ސިޔާސީ ބޭނުމުގައި، ޖޭއެސްސީގައި ސިޔާސީ އެކްޓިވިސްޓުން ތިބެގެން، ޖިނާއީ ދަޢުވާއަކަށް ފިލައިގެން އުޅުނު މީހަކު ރިޔާސަތުގައި އިސްކޮށް ހުރެގެން، ތަޙުޤީޤުކުރާ ހަމަތަކާއި އުސޫލުން ބޭރުން ކުރި ތަޙުޤީޤަކުން އެޅި ފިޔަވަޅުތަކެކެވެ.“ ޢަލީ އާދަމް ލިއުއްވާފައިވެއެވެ.
އޭނާ މިފަދައިން އިޝާރާތްކުރައްވާފައި އެވަނީ، ނިމިދިޔަ ސަރުކާރުގެ ދައުރު ހަމަވާން އެންމެ ދުވަހަކަށް ވެފައިވަނިކޮށް ހައިކޯޓުގެ ފަނޑިޔާރުކަމަށް އައްޔަންކުރެއްވި ޢަބްދުލްމާނިޢު ޙުސައިނަށެވެ. ޢަލީ އާދަމް ވަނީ، މިއީ އޭނާގެ ތަހުގީގު ވަކި ގޮތަކަށް ނިންމެވުމަށް އެމްޑީޕީގެ ސަރުކާރުން ކުރެއްވި ކަމެއް ކަމަށް ތުހުމަތުކުރައްވާފައެވެ.
އޭނާ އިތުރަށް ފާހަގަކުރެއްވި ގޮތުގައި، މާނިޢު އެ މަޤާމަށް އައްޔަންކުރެއްވުމަށް މުޅި އިޖުރާތުވެސް ޖޭއެސްސީން ގެންގޮސްފައިވަނީ އާންމުކޮށް ޢަމަލުކުރާ އުސޫލުތަކާއި ގަވައިދުތަކާ ޚިލާފަށެވެ.
One Response
އަދުލު އިންސާފުގެ ތެރެއަށް ދައުލަތް ހިންގަން ޙަވާލުވާ ސަރުކާރުތަކުން އެބައިމީހުންގެ އަމިއްލަވަންތަ ބާރު ހިންގުމަށް ތެޅޭހާ ހިނދަކު އިސްލާމީ ރިވެތި އަޚުލާގުގެ ތެރެއިން ހަމަހަމަކަމާއި އެކު ފަނޑިޔާރުގެވެސް ޖޭއެސްސީ ވެސް ނުހިނގާނެއެެވެ. މާތްﷲ ގަންދީ ހުވާކޮށްގެން މާތްﷲ އަށް ބިރުވެތިކަމެއް ނެތި ހުރިހާދިމާލަކުން ދުނިޔެ ކެވޭތޯ އުޅޭ ބަޔަކަށް ޢަދުލު އިންސާފު އެއީ ނަމެކެވެ. ޖޭއެސްސީ އުވާލުމަކީ ލިބިދާނެ ކުރިއެރުމެކެވެ. އަދި ނަޒާޙަތްތެރި ފަނޑިޔާރުން ފަނޑިޔާރުގެތަކަށ އިސްކުރުމަކީ ކޮންމެހެން ކުރަންޖެހޭނޭ ކަމެކެވެ. އެންމެނަށްވެސް ރަނގަޅު ގޮތް އެނގެއެވެ. ނަމަވެސް ރައީސްމީހާ ރުއްސައިގެން ބޮނޑި ބަންނަންވެގެން އެޅިހާ ބަތަކަށް ރިހައެވެ.