ހޮނިހިރު ދުވަހުގެ ރޭ 10:18 ހާއިރު ނިއު ޖާޒީގެ ހާސްބްރޫކް ހައިޓްސް ހިސާބުގަނޑަށް 3.0 މެގްނިޓިއުޑްގެ ބިންހެލުމެއް އައިސްފައިވާކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ރިޕޯޓުކޯށްފިއެވެ.
މި ބިންހެލުން އައިސްފައިވަނީ ގާތްގަނޑަކަށް ބިމުގެ 6.2 މޭލު (10 ކިލޯމީޓަރު) ގެ އަޑިންނެވެ. ނިއު ޖާޒީގެ އުތުރު، ނިއުޔޯކް ސިޓީގެ، މެންހަޓަން، ބްރޫކްލިން، އަދި ސްޓޭޓެން އައިލެންޑް ހިމެނޭ ގޮތަށް އަދި ކޮނެކްޓިކަޓްގެ ބައެއް ހިސާބުތަކަށް ބިންހެލުމުގެ އަސަރުކޮށްފައިވާއިރު، އާންމުންގެ އެއްވެސް މީހަކަށް އަނިޔާއެއް ނުވަތަ އިމާރާތަކަށް ސްޓްރަކްޗަރަލް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައި ނުވާ ކަމަށް އޮފިޝަލުން ބުނެއެވެ. ބިންހެލުމުގެ ސަބަބުން ލިބުނު ގެއްލުމަކާއި ގުޅޭ އެއްވެސް ކޯލެއް ލިބިފައި ނުވާކަން އެމަޖެންސީ ސާވިސްއިން ވަނީ ކަށަވަރުކޮށްދީފައެވެ.
ސެއިސްމޮލޮޖިސްޓުން ބުނެފައިވަނީ މިއީ ކުޑަ އިންޓްރާޕްލޭޓް ބިންހެލުމެއް ކަމަށާއި، މިއީ އެ ސަރަހައްދުގައި އާންމު ބިންހެލުމެއްކަމަށެވެ. އެހެންނަމަވެސް، މީގެ ސަބަބުން ގެއްލުން ލިބޭ ދަރަޖައަށް ބިންހެލުން ބަދަލުވެގެން ދިޔުމަކީ އާންމުކަމެއް ނޫންކަން ފާހަގަކޮށް، ޔޫއެސްޖީއެސް އިން ބުނެފައިވަނީ، ކުދިކުދި އަފްޓާޝޮކްތައް އަތުވެދާނެ ކަމަށާއި ނަމަވެސް އެކަން އިހުސާސްވެސް ނުކުރެވިދާނެކަމަށެވެ.
ނިއުޔޯކް މެޓްރޯޕޮލިޓަން ސަރަހައްދަކީ ދޭތެރެ ދޭތެރެއިން ކުދިކުދި ސެއިސްމިކް ހަރަކާތްތަކެއް ހިނގާ ސަރަހައްދެކެވެ. މިގޮތުން، 2024 ވަނަ އަހަރުގެ އޭޕްރީލް މަހު ނިއު ޖާޒީގައި އުފެދުނު 4.8 މެގްނިޓިއުޑްގެ ބިންހެލުމެއްގެ އަސަރު، ބޮސްޓަން އިން ފެށިގެން ބާލްޓިމޯއާ ހަމައަށް ކޮށްފައިވާއިރު، މިއީ 1884 ވަނަ އަހަރަށްފަހު އެ ސަރަހައްދަށް އައި އެންމެ ބޮޑު ބިންހެލުމެވެ.
