ރާއްޖޭގެ އެކި ހިސާބުތަކަށް އުދަ އަރާނެކަމަށް ލަފާކޮށް، މޫސުމާބެހޭ ޤައުމީ އިދާރާއިން ހުދު ސަމާލު ނެރެފިއެވެ.
މި ސަމާލުގެ ވަގުތު ދަމަހައްޓާފައިވަނީ މިއަދުގެ މެންދުރުފަހު 2.00ން އިރުއޮއްސި 6.00ގެ ނިޔަލަށެވެ.
މޫސުމާބެހޭ އިދާރާއިން ބުނެފައިވަނީ، ހުޅަނގު މޫސުމުގެ ބާރު ގަދަވާނެކަމަށް ބެލެވޭތީ، މިއަދުން ފެށިގެން އަންނަ އާދިއްތަ ދުވަހާ ހަމައަށް ރާއްޖޭގެ މޫސުން ގޯސްވާނެ ކަމަށް ލަފާކުރެވޭ ކަމަށެވެ.
އެ އިދާރާއިން އިއްޔެ ނެރުނު އެޑްވައިޒަރީގައި ވާގޮތުން، މި ދުވަސްތަކުގައި ރާއްޖޭގެ އެކި ހިސާބުތަކަށް ވައި ބާރުވެ، އަދި ވިލާގަނޑުގައި އިތުރަށް ވައި ގަދަވާނެ ކަމަށާއި އަދި، ރާއްޖޭގެ ބޮޑު ބަޔަކަށް ގުގުރުމާއެކު ވިއްސާރަކުރަކޮށް، ދިޔަވަރު ބޮޑުވާ ވަގުތުތަކުގައި އުދައިގެ އަސަރު ކުރާނެކަމަށް ވަނީ ލަފާކޮށްފައެވެ.
އެހެންކަމާއެކު، ހުރިހާ ފަރާތްތަކުން (ޚާއްޞަކޮށް ދަތުރުކުރާ ފަރާތްތަކުން) މޫސުމާބެހޭ ފަހުގެ މަޢުލޫމާތު ހޯދުމަށް އެ އިދާރާއިން ވަނީ އިލްތިމާސްކޮށްފައެވެ.
މޫސުމާބެހޭ މަޢުލޫމާތު ހޯދުމަށް އެ އިދާރާގެ ނަންބަރު 3323084 އަށް ގުޅުމުން މަޢުލޫމާތު ލިބޭނެކަމަށް، މޫސުމާބެހޭ ޤައުމީ އިދާރާއިން ބުނެއެވެ.
