އއ. މާޅޮހުގައި ރޭ ދަންވަރު ހަލަމަދީ ޒަޚަމްކޮށްލި އަބްދުއްރަޙްމާނު އާދަމްގެ ހަށިގަނޑު ޕޯސްޓުމޯޓަމް ހެދުމަށް މާލެ ގެނައުމުގެ މަސައްކަތް ކުރަމުންދާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

އޭނާ ޒަޚަމްކޮށްލާފައިވާކަމުގެ މަޢުލޫމާތު ފުލުހުންނަށް ދީފައިވަނީ ރޭ ދަންވަރު 1:50ހާއިރު ކަމަށާއި، އޭނާ ނިޔާވެފައިވަނީ، މާޅޮހު ޞިއްޙީ މަރުކަޒުގައި ފަރުވާ ދެމުންދަނިކޮށް، ރޭ ފަތިހު ކަމަށްވެސް ފުލުހުން މަޢުލޫމާތުދެއެވެ.

ފުލުހުން ބުނީ، މި ހާދިސާއާ ގުޅިގެން ފުލުހުންގެ ޓީމެއް އެ ރަށުގައި ހަރަކާތްތެރިވަމުންދާކަމަށާއި، ރަށަށް އަރާ ފައިބާ މީހުން މޮނީޓަރ ކުރަމުންދާކަމަށެވެ.

އަބްދުއްރަޙްމާނު އާދަމަށް ހަމަލަދީފައިވަނީ އޭނާގެ ގޭގައި ނިދާފައި އޮއްވައެވެ. މަޢުލޫމާތު ލިބިފައިވާގޮތުގައި، އެ ވަގުތު އެ ކޮޓަރީގައި ނިދާފައި އޮތީ އޭނާ އެކަންޏެވެ.

އޭނާގެ ހަށިގަނޑުގެ އެކި ތަންތަނަށް ހަމަލަދީފައިވާއިރު، ބޮޑަށް ގެއްލުންވެފައިވަނީ އޭނާގެ ބޮލަށް ކަމަށް މަޢުލޫމާތު ލިބެއެވެ.