ބްރެޒިލްގައި ޒުވާން ބޮޑެތި މީހުންގެ ހިތުގެ މައްސަލަތައް އިތުރުވަމުންދާތީ، ސިއްހީ އިދާރާތަކުން ދަނީ މިމައްސަލަ ތަހުގީގު ކުރަމުންނެވެ. މައްސަލަތަކުގެ ބުޑުގައި ވަނީ ނިކަމެތި ދިރިއުޅުމުގެ ވައްޓަފާޅިތަކެއް ކަމަށް ސަރުކާރުން އިޝާރާތް ކުރި ނަމަވެސް ކޮވިޑް-19 ވެކްސިންތަކާއި ގުޅުން އޮވެދާނެތީ ބައެއް ރައްޔިތުން ދަނީ ކަންބޮޑުވުން ފާޅުކުރަމުންނެވެ.
2023 ވަނަ އަހަރުން ފެށިގެން ކުރި ދިރާސާތަކުން ދައްކާ ގޮތުގައި ޒުވާން އާބާދީތަކުގެ ތެރޭގައި ހިތާ ގުޅުން ހުރި ސިއްހީ މައްސަލަތައް އިތުރުވެފައިވާ ކަމަށާއި، އޭގެ ތެރޭގައި ކާޑިއަކް އެރެސްޓް ވެސް ހިމެނޭ ކަމަށް ދިރާސާތަކުން ދައްކައެވެ. މި ދިރާސާތަކުން ކޯވިޑް-19 ވެކްސިން ދިނުމާ ސީދާ ގުޅުމެއް އޮތްކަން ކަށަވަރު ނުވި ނަމަވެސް، އެ ޓައިމްލައިންގެ ސަބަބުން ސޯޝަލް މީޑިއާގައި އަދި ބަލިޖެހިފައިވާ ފަރާތްތަކުގެ މެދުގައިވަނީ ސުވާލުތަކެއް އުފެދިފައެވެ.
ބްރެޒިލްގެ ގިނަ އަދަދެއްގެ ޒުވާނުންނާއި އެމީހުންގެ އާއިލާތަކުން ވަނީ ވެކްސިން ދިނުމަށްފަހު މާގިނައިރުތަކެއް ނުވެ ސިއްހީ މައްސަލަތައް ފެށުނުކަމަށް ބުނެ ވާހަކަދައްކާފައެވެ. މަޔޯކާޑައިޓިސް، ނުވަތަ ހިތުގެ މަސްގަނޑު ދުޅަވުން ފަދަ މަދުން ނޫނީ ނުފެންނަ ނޭދެވޭ އަސަރުތަކެއް ފެނިފައިވާ ކަމަށް ރިޕޯޓްތައް ބުނާއިރު، ބެލެނިވެރިންވަނީ ވެކްސިނާ ގުޅިގެން ކުރިމަތިވެދާނެ ނުރައްކާތަކާއި ބެހޭ މައުލޫމާތު ދިނުމުގެ މަސައްކަތް ހާމަކަން ބޮޑު ގޮތެއްގައި ކުރިއަށް ގެންދިޔުމަށް ގޮވާލާފައެވެ.
އެހެންނަމަވެސް، މެޑިކަލް ތަޖުރިބާކާރުން ބުނާ ގޮތުގައި ކޮވިޑް-19 ވެކްސިންތަކުން މަޔޯކާޑިޓިސް ޖެހުމަކީ ވަރަށް މަދުން ދިމާވާ އަދި އާންމުކޮށް ސީރިއަސް ކަމެއް ނޫނެވެ. އަދި ކޮވިޑް-19ގެ ބަލިމަޑުކަމުގެ ތެރޭގައި، އަދި އެހެންވެސް ބޮޑެތި ބަލިތަކުން ރައްކާތެރިވުމަށާއި ފުރާނަ ސަލާމަތްކުރުމުގައި ވެކްސިންގެ ދައުރު ވަރަށް ބޮޑެވެ. ސިއްހީ އޮފިޝަލުން ދަނީ، އާންމު ސިއްހަތު ރައްކާތެރި ކުރުމަށްޓަކައި ރަނގަޅު ފިޓްނަސްއާއި، ޕްރިވެންޓެޓިވް ހިތުގެ ފަރުވާ ހޯދުމަށް ބާރު އަޅަމުންނެވެ.
ބްރެޒިލްގެ އޮފިޝަލުން ވަނީ ވެކްސިންގެ ކަންބޮޑުވުންތަކަކީ ހަގީގަތެއް އޮތް މައްސަލައެއް ނޫންކަމަށް ބުނެ، މައުލޫމާތު ފޮރުވާ ކަމަށް ބުނާ ވާހަކަތައް ދޮގުކޮށްފައެވެ. އެމީހުން ނަސޭހަތްތެރިވަނީ އިތުބާރު ހުރި މެޑިކަލް ގައިޑްލައިންތަކަށް ތަބާވެ ސިއްހީ މަސައްކަތްތަކުގައި ބައިވެރިވުމަށެވެ.
ސިއްހީ އޮފިޝަލުން މިހާރުވެސް ދަނީ އެ މައްސަލަ ބަލަމުންނެވެ. އަދި އެއްވެސް ކަންބޮޑުވުމެއް އޮތްނަމަ އެކަން ހައްލުކުރުމަށް މަސައްކަތް ކުރަމުންނެވެ.
