ހުޅުމާލޭ ފުރަތަމަ ފިޔަވަހި، ނިރޮޅުމަގުގައި ކަފިހިހުރަހެއްގެ މަތިން ހުރަސްކުރި މީހެއްގެ ގައިގައި ސައިކަލުން ޖެހުމުން މަޑުނުކޮށް ދިޔަ މީހަކު ހޯދައި، ހައްޔަރުކޮށްފިކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ފުލުހުން ބުނީ، މި މައްސަލާގައި ހައްޔަރުކޮށްފައިވަނީ ގއ. މާމެންދޫ / މޫންލައިޓްވިލާ، މުޙައްމަދު ނާޝިއު (20އ) ކަމަށާއި، އޭނާގެ އަތުގައި ލައިސަންސް ނެތްކަމަށެވެ.
މި އެކްސިޑެންޓުގައި އަނިޔާވެފައިވަނީ 54 އަހަރުގެ ދިވެހި ފިރިހެނަކަށް ކަމަށާއި، އެ މީހާއަށް ސީރިއަށް އަނިޔާތަކެއް ލިބިފައިވާތީ އައިޖީއެމްއެޗްގައި ފަރުވާދެމުން ދާކަމަށް ފުލުހުން މަޢުލޫމާތުދެއެވެ.
ފުލުހުން ބުނެފައިވަނީ، މި އެކްސިޑެންޓުގެ މައްސަލަ ފުލުހުންނަށް އަންގާފައިވަނީ ޖޫން 16ވަނަ ދުވަހުގެ 14:10ހާއިރު ކަމަށެވެ.
ކޯޓު އަމުރެއްގެ ދަށުން ޖޫން 19ވަނަ ދުވަހު އޭނާ ހައްޔަރުކޮށް، ބަންދާމެދު ގޮތެއް ނިންމުމަށް 20ވަނަ ދުވަހު ކޯޓަށް ހާޒިރުކުރުމުން 6 ދުވަހަށް ބަންދުކުރުމަށް އަމުރުކޮށްފައި ވާކަމަށް ދިވެހި ފުލުހުންގެ ޚިދުމަތުން ބުނެއެވެ.
