މާލޭގެ ބައެއް މަގުތައް މަރާމާތުކުރުމުގެ މަސައްކަތް ސިޓީ ކައުންސިލުން ފަށައިފިއެވެ.
މިގޮތުން މިއަދު ވަނީ މާލޭގެ ދެ ސަރަހައްދެއްގައި މަގު މަރާމާތުކުރުމުގެ މަސައްކަތް ފަށާފައެވެ.
މިއަދު މަސައްކަތް ފަށާފައިވާ މަގުތަކުގެތެރޭގައި ސޯސަންމަގު އިސްލާމިކް ޔުނިވަރސިޓީ ސަރަހައްދާއި ހެންވޭރު ކާނިގޯޅީގައި ގަނބާފައިވާ ސަރަހައްދު ލެވެލްކޮށް، ގާއެތުރުމުގެ މަސައްކަތް ވަނީ ކުރިއަށްގެންގޮސްފައެވެ.
މާލެއާއި ހުޅުމާލެ ހިމެނޭހެން ވަރަށް ގިނަ މަގުތަކެއް ވަނީ ވަރަށް ބޮޑަށް ހަލާކުވެފައެވެ. މިކަމުގެ ސަބަބުން ދުއްވާތަކެއްޗަށް އެކިވަރުގެ ގެއްލުންތައް ލިބެމުންދާކަމުގެ ޝަކުވާ އާންމުން ކުރަމުންދާތާ ދުވަސްތަކެއް ވެއްޖެއެވެ.
މީގެ އިތުރުންވެސް ހިނގާ މީހުންނަށްވެސް ބޭނުންނުކުރެވޭ ހާލަތުގައި ހުރި މަގުތައްވެސް ވަރަށް ގިނަކަން ފާހަގަކޮށްލެވެއެވެ.
