އެމެރިކާގެ ރައީސް ޑޮނަލްޑް ޓްރަމްޕް ގެ ސަރުކާރުން މިދިޔަ ބުދަ ދުވަހު ޓެރިފް އިއުލާން ކުރި ތަންތަނުގެ ތެރޭގައި، އެންޓާކްޓިކްގައި އޮންނަ، ހަމަ އެކަނި ޕެންގުއިން އާއި ސީލްގެ އާބާދީ އެއްއޮންނަ ދެޖަޒީރާ ހިމެނިއްޖެއެވެ.

އޮސްޓްރޭލިޔާގެ ހުޅަގު ދެކުނުން ހަތަރުހާސްކިލޯމީޓަރު ދުރުގައިވާ ”ހަރޑް އެންޑް މެކްޑޮނަލް އައިލަންޑްސް“ އަށް ދެވެނީވެސް އޮސްޓްރޭލިޔާގެ ޕާތުން ފުރައިގެން ހަތް ދުވަހުގެ ދަތުރަކަށް ފަހު ކަމަށް ވެއެވެ.އަދި އެތަނަށް އެންމެ ފަހުން މީހުން ގޮސްފައިވަނީވެސް މީގެ ދިހަވަރަކަށް އަހަރު ކުރިން ކަމަށް ވެއެވެ.
ޓްރަމްޕް ގެ އައު ޓެރިފް ލިސްޓްގައި މިދެޖަޒީރާ ހިމެނުމުން އޮސްޓްރޭލިޔާގެ ޓްރޭޑް މިނިސްޓަރ ޑޮން ފަރެލް ވިދާޅުވެފައިވަނީ އެއީ ކަނޑައެޅިގެން ”މިސްޓޭކް“ އެއްކަން ހާމަވާ ކަމުގައެވެ. އަދި ޕެންގުއިންތައް ޓްރަމްޕަށް ކުރީ ކީއްތޯ އޭނާ ސަމާސާ ރާގަކަށް ވިދާޅުވެފައިވެއެވެ.
އެމެރިކާ ގައި އުފައްދާ މުދަލަށް ގައުމުތަކުން ނާއިންސާފުން އިމްޕޯޓް ޓެކްސް ނަގާކަމަށްބުނެ ބުދަދުވަހު ޓްރަމްޕަ ވަނީ ވަރަށް ގިނަ ގައުމު ތަކަކާދެކޮޅަށް އައު ޓެކްސް ތަކެއް އިއުލާން ކޮށްފައެވެ. މިގޮތުން ޓެކްސް އިއުލާންކުރި ތަންތަނުގެ ތެރޭގައި ނޯވީޖިއަން ޖަޒީރާތަކަކާ ފޯކްލަންޑް އައިލަންޑްސް އަދި ބްރިޓިޝް އިންޑިއަން އޯޝަން ޓެރިޓަރީ ހިމެނެއެވެ.
29 އިންސައްތައިގެ ޓެރިފް އިއުލާންކޮށްފައިވާ އޮސްޓްރޭލިޔާގެ ޓެރިޓަރީއެއްކަމަށްވާ ނޯފޯކް އައިލަންޑްގެ އާބާދީ އަކީ ދެހާސް ދުއިސައްތައެވެ. އޮސްޓްރޭލިޔާގެ އެންމެ ބޮޑު އަލިފާން ފަރުބަދަ ބިގްބެން ހުންނަ ހަރޑް އައިލަންޑްގައި އެއްގޮތަކަށްވެސް މީހުން ނޫޅެއެވެ.އެތަނަކީ ހިމާޔަތް ކުރެވިފައިވާ ސަރަހައްދަކަށް ވާއިރު އެތަނުގައި އުޅެނީ އެތައްލައްކަ ޕެންގުއިން އާއި އެފަދަ ޖަނަވާރު ތަކެވެ.
ޓްރަމްޕް މިސަރަހައްދު ތަކަށްވެސް ޓެރިފް އިއުލާން ކުރުމުން އޮސްޓްރޭލިޔާގެ ބޮޑުވަޒީރު އަލްބަނީސެ ވިދާޅުވީ މިއިން ދައްކާދެނީ އެއްވެސް ބަޔަކު ސަލާމަތް ނުވާކަން ކަމުގައެވެ.އަދި އެމެރިކާއަކީ އޮސްޓްރޭލިޔާގެ ”ފްރެންޑް“ އަކަށް ވާއިރު މިއީ ފްރެންޑުން ކުރާޒާތުގެ ކަމެއް ނޫން ކަމަށްވެސް އޭނާ ވިދާޅުވެފައި ވެއެވެ.