އުމުރުން 13،14 އަހަރުގެ ކުއްޖަކު އެއްދުވަހަކު ދޮންކެޔޮ ގަނޑެއް ހިފައިގެން ދަނިކޮށް މުސްކުޅި ފިރިހެނަކު އެކުއްޖާ ހުއްޓުވާފަ ބުންޏެވެ.އަހަރެންނަށް ތިޔަތަނުން ދެތިން ވައް ދޮންކެޔޮދީފާނަންހެއްޔެވެ.އަހަރެން މިހިރީ ވަރަށް ވަރުބަލިވެ ބަނޑުހައި ވެފައެވެ.
މިހެން ބުނުމުން އެކުއްޖާ ދޮންކެޔޮ ގަނޑުން ތިންވައް ނައްޓާލުމަށްފަހު މުސްކުޅި މީހާއަށް ދިނެވެ.ނަމަވެސް މުސްކުޅިމީހާ އެޔަކު ނުހިފިއެވެ.އަދި މޫނު ”ކުނި“ ކޮށްލުމަށްފަހު ބުންޏެވެ.ތިޔައީ ރަގަޅަށް ދޮންވެސް ނުވެ ހުރި ކެޔޮ އަރިއެކެވެ. ތިޔަ އަހަރެންނަކަށް ނުކެވޭނެއެވެ. ބޭނުމެއްނޫނެވެ.

އެމީހާ މިހެން ބުނުމުން ކުއްޖާ ހައިރާންވިއެވެ.އަދި ބުންޏެވެ.އަޅުގަނޑަށް މައާފް ކުރައްވާށެވެ.އަޅުގަނޑުގެ ގޭގަ ރަނގަޅަށް ދޮންވެފަ ހުރި ކެޔޮ ހުންނާނެއެވެ.ވަރަށް އަވަހަށް ގެޔަށް ގޮސް އެއިން ކެޔޮ ހިފައިގެން އެބައަންނަމެވެ.މިތާ މަޑުކޮށްލައްވާށެވެ.
މުސްކުޅިމީހާ ފޫހި ފާޑަކަށް ތުން އަނބުރާލުމަށްފަހު ބުންޏެވެ. އަވަސް ކުރާށެވެ.މަށަށް މިތާ އެހާގިނަ އިރަކު ނުހުރެވޭނެއެވެ.
އެވަގުތު ކުއްޖާ އަވަހަށް އެތަނުން ދިއުމަށްޓަކާ ދޮންކެޔޮ ގަނޑު ބޮލަށްލައިގެން ދުއްވައިގަތެވެ.އަދި ވަރަށް ކުޑައިރު ކޮޅެއްގެ ތެރޭ ވަރަށް ރީތިކޮން ދޮންވެފައިވާ ބޮޑު ތިންވައްދޮންކެޔޮ ހިފައިގެން އަޔެވެ.އަދި ހިނިތުން ވެލަމުން މުސްކުޅި މީހާއަތަށް ދިއްކޮށްލިއެވެ.
ނަމަވެސް ޝުކުރުވެރިވުމުގެ ޒަރެއްގެ މިންވަރުވެސް ނެތް މުސްކުޅިމީހާހުރީ ރުޅިއައިސްފައެވެ.ކުއްޖާ އެކުރިހިއްވަރު އޭނާޔަށް އެއްގޮތަކަށްވެސް ފާހަގަނުވާ ކަހަލައެވެ.
ފޫހި ރާގަކަށް މުސްކުޅިމީހާ ބުންޏެވެ.ތިޔަހާ ފާވެފައިވާ ދޮންކޭލެއްވެސް އަހަރެން ބޭނުމެއް ނޫނެވެ. މި ގެންނަން ތިޔަ ދިޔައީ ކީއްކުރަން ހެއްޔެވެ. އަހަރެން ނަކީ މުސްކުޅި މީހެއްކަން ކަލެޔަށް އެނގޭނޫން ހެއްޔެވެ. މިކެޔޮ އަހަރެން ކައިފިއްޔާ އަހަރެންގެ ބަނޑު ސަކަރާތްވާނެއެވެ.ފާހާނާޔަށް ދެވެން ފަށާނެއެވެ.
އެވަގުތު ކުއްޖާޔަށް ހަދާގޮތް ހުސްވިއެވެ.އަދި މުސްކުޅިމީހާ ހިތްހަމަ ޖެހޭގޮތަށް ކަންތައް ކޮށްނުދެވުނީތީ މައާފަށް އެދުނެވެ.އަދި ދެން ހަދަންވީ ކިހިނެއްތޯ އޭނާ ސުވާލުކުރިއެވެ.
މިހެން ބުނުމުން މުސްކުޅި މީހާ ބުންޏެވެ.ކުރިން ގެންގުޅުނު ދޮންކެޔޮތައް ގެންނާށެވެ.އެކެޔޮތައް އަހަރެން މާދަން ވަންދެން ބަހައްޓާފަ ބޭނުންކުރާނީއެވެ.އަވަހަށްދާށެވެ.މަގޭފަޔަށް މިހާރު ތަދުވާން ފަށައިފިއެވެ.
ކުއްޖާ އަނެއްކާވެސް ގެޔަށް ދިޔައެވެ.އަދި ފުރަތަމަ ގެންދިޔަ ކެޔޮއަރި ހިފައިގެން އަތުވެއްޖެ އެވެ.އޭރު މުސްކުޅިމީހާ ހުރީ އިތުރަށް ރުޅިއައިސްފައެވެ.އަދި ވަރަށް ބާރަށް ބުންޏެވެ.ކަލޭ ހާދަ ތަތެވެ.މިހާރު އަހަރެން ދޮންކެޔޮ ކާހިތް ވެސް ކެނޑިއްޖެއެވެ. ކަލޭ ދޮންކެޔޮ ހިފައިގެން ދާތަނަކަށް ދާށެވެ.
މިހެން ބުނުމުން ކުއްޖާ ތުރުތުރު އަޅައިގެން ދިޔައެވެ.ނަމަވެސް މުސްކުޅިމީހާ ދެން ކަންތައް ކުރި ގޮތުން ކުއްޖާ ވަރަށް ހައިރާންވިއެވެ.މުސްކުޅިމީހާގެ ރޫޖެހިފައިވާ މޫނުމައްޗަށް ބޮޑު ހިނިތުންވުމެއް ވެރިވިއެވެ.އަދި ކުއްޖާގެ ކޮންޑުގައި ޖަހާލުމަށްފަހު ހަމަހިމޭން އަޑަކުން ބުންޏެވެ.
ހަޔާތުގެ ދަތުރުގައި އެންމެ މުހިންމު ފިލާވަޅުތައް ފޮތަކުން ދަސްކޮށެއްނުދެވޭނެއެވެ.އެފަދަ ފިލާވަޅުތައް ދަސްކޮށްދޭންޖެހޭނީ އަމަލީ ތަޖުރިބާ ކުރުވައިގެންނެވެ.
ކޮއްކޮ އަހަރެންނަށް ދެފަހަރު ދިން ދޮންކެޔޮވެސް ހަމަ ވަރަށް ރަނގަޅެވެ.އަހަރެން ޝުކުރުވެރިނުވާކަމަށް ހެދިގެން ޖެއްސީ އެކްޓެކެވެ.އެއީ ކޮއްކޮޔަށް މުހިންމު ފިލާވަޅެއް ދަސްކޮށް ދިނުމުގެ ބޭނުމުގައެވެ.އަހަރެންނަށް މިފިލާވަޅު ދަސްވީ އުމުރުގެ މާފަހުކޮޅަށް ދިޔަފަހުންނެވެ.
އަހަރުމެންނާ ދިމާވާ ގިނަމީހުންނަކީ އަހަރެން މިއަދު މިއުޅުނު ގޮތަށް އުޅޭ މީހުންނެވެ. އަދި އެގޮތަށް އުޅެފަވެސް ގޯސްކޮން ކަންތައްކުރީ އަނެއްމީހާކަމަށް ހީކުރުވަން މަސައްކަތް ކުރާނެއެވެ.
ކޮއްކޮ އަބަދުވެސް ހަނދާން ކުރަންވީ ކަމަކީ،ކަލޭ ކިތަންމެ ހިއްވަރުކުރިނަމަވެސް އަބަދު އެންމެންގެ ހިތްހަމަ ޖައްސާ ނުދެވޭނެކަމެވެ.އަދި މިކަމުގެ ސަބަބުން ގޯސްވެގެންދާނީ ކަލޭގެ ހާލަތެވެ.ސިކުނޑި ހާސްކުރުވައެވެ.އަދި އަމިއްލަ ހުވަފެންތައް ހާސިލް ކުރުމަށް ކުރަންޖެހޭ މަސައްކަތް ތައް މަގުން ކަސިޔާރުވެއެވެ.
ހަނދާންކުރާށެވެ. ބިންމަތީ އޮށޯވެފަ އެމީހުން ގައިމަތިން ހިނގަން ފުރުސަތު ދިންނަމަވެސް އެމީހުން ޝަކުވާކުރާނެއެވެ. ހަށިގަނޑު ބިންމަތިން ފެށިގެން މާ އުސްވީމައެވެ.ނުވަތަ މާތިރިވީމައެވެ. ތިބާ ކޮށްދިން ކަންތައް އެމީހުންނަކަށް ނުފެންނާނެއެވެ.
އެހެންވީމަ ބުނަމެވެ. ކަލޭގެ އަމިއްލަ ހަޔާތުގެ މަގްސަދަކަށް ވާންވާނީ ކަލެޔަށް ހެޔޮގޮތް ހޯދުމެވެ.އެހެންމީހަކަށްޓަކާ އެމީހަކު ބުނާހާ ގޮތަކަށް ކަންތައް ކުރާކަށް ނުޖެހެވެ.ހެޔޮގޮތާއި ނުބައިގޮތް ދެނެގަންނާށެވެ.އަދި އަމިއްލަ ނިންމުމެއް ނިންމުމަށްފަހު އެގޮތުގައި ދެމި ހުންނާށެވެ.