ހަނގުރާމައަކީ ކޮންމެ ޒަމާނެއްގައިވެސް ބިރުވެރިކަމެކެވެ. ވަކިން ޚާއްސަކޮށް މިޒަމާނުގެ ހަނގުރާމަތަކުގައި ބޭނުންކޮށްފާނެ ނުރައްކާތެރި ހަތިޔާރާއި ވަސީލަތްތައް ހިތައްވެސް ނުގެނެވޭނެއެވެ. މީގެ 78 ވަރަކަށް އަހަރުކުރިން މަތިންދާބޯޓެއްގައި ގޮސް ޖަޕާނުގެ ހީރޯޝިމާއާއި ނާގަސާކީއަށް އެޅި ބޮމެއްގެ ސަބަބުން އެ 2 ޝަހަރު ވީރާނާ ކޮށްލާފައިވާ މިންވަރު މިއަދުވެސް އެއޮތީ ފެންނާށެވެ. އެފަދަ ބޮމެއް އަޅަން ނުވަތަ އެއަށްވުރެން އެތައްގުނަ ނުރައްކާތެރި ބޮމެއް އަޅަންވެސް މިއަދު މަތިންދާބޯޓެއްގައި ދިއުންވެސް ބޭނުން ނުވެދާނެއެވެ.  

މިހާތަނަށް ދުނިޔޭގައި ހިނގާދިޔަ އެންމެހާ ބޮޑެތި ހަނގުރާމަތައް ކުރެވިގެން ގޮސްފައިވަނީ އަޅުގަނޑުމެންގެ ރާއްޖެއާއި އެތައްހާސް މޭލެއް ދުރުގައެވެ. އެ ހާލަތުގައިވެސް އޮތީ މަގޫފަތް ކާން ޖެހިފައެވެ. މިފަހަރު ހަނގުރާމައިގެ ބިރުވެރިކަން މިއޮތީ އަޅުގަނޑުމެންގޭގެ ދޮރުމަތީގައެވެ. ހަނގުރާމައިގެ ސެންޓަރ ޕޮއިންޓް ނުވަތަ މިހާރު ކިޔާގޮތަށް އެޕިސެންޓަރާ އެންމެ ކައިރީގައި މިތިބީ އަޅުގަނޑުމެންނެވެ. ހިތާމައަކީ ޔޫރަޕްގެ ބާރުގަދަ ފުދުންތެރި ގައުމުތަކުންވެސް ހަނގުރާމައިގެ ބިރުވެރިކަމާދޭތެރޭ ރައްޔިތުން ހޭލުންތެރި ކުރުވަން ހުރިހާ ވަސީލަތެއް ބޭނުންކޮށްގެން މަސައްކަތްކުރަމުން ގެންދާއިރު އަޅުގަނޑުމެންތެރޭން މިގޮތަށް ކަންތައްކުރާތަން ނުފެނުމެވެ. ހަމައެކަނި އޮންލައިން ކޮށް ނެރޭ 2 ނޫހަކުން މެނުވީ ދުނިޔެއަށް ކުރިމަތިލާންޖެހިފައިވާ މިވާ ނުރައްކާތެރި ހާލަތާ ބެހޭގޮތުން ޚަބަރެއްވެސް ލިޔެފައި ނުހުރެއެވެ. މިފަހަރު ކާނެ މަގޫފަތެއް ކަނޑާނެ ބަނބުކޭލެއް އަޅާނެ ރުކެއްވެސް ނެތެވެ.                              

ދުނިޔޭގެ ސުޕަރ ޕަވަރ އެމެރިކާއިން އީރާނަށް ހަމަލާދޭނެކަން ސާފުބަހުން އެގެންދަނީ އިއުލާން ކުރަމުންނެވެ. އީރާނުގެ ވަށައިގެން އެތިބީ އެމެރިކާގެ މިލިޓްރީ ބޭސްތަކުން ބަޑި ދިއްކޮށްގެންނެވެ. ދުނިޔޭގެ އެއްވެސް ގައުމަކުން އެމެރިކާއާ ދެކޮޅަށް ހަނގުރާމައެއް ކުރެވިދާނެކަމަށް ގަބޫލުކުރުމަކީ މޮޔަކަމެކެވެ. އެކަމަކު ކޮންމެ ގަދަފަދަ ބާރެއްގައިވެސް ބަލި ފައެއް އޮންނާނެއެވެ. އެއީ މުޅި ދުނިޔޭގެ މަސްލަހަތަށްޓަކައި ބޭސްކުރަންޖެހޭ ބަލިފަޔަކަށްވެސް ވެދާނެއެވެ. ޝިކާރީއަކަށް ވެފައިވާ މިނިކާވަގުވެސް އެސޮރުގެ އެންމެ ފަހު ނޭވާއަށް ދާންދެން ސަލާމަތަށް މަސައްކަތްކުރާނެއޭ ބުނާ ފަލްސަފާގެ މަތީގައެވެ. މިސާލަކަށް އީރާނުން ބާރު ފޯރުވިދާނެ ކަމަށް ބެލެވޭ ޚޮރްމުޒް ކަނޑުއޮޅިއާއި ހޫތީ މުޖާހިދުންގެ ބާރު ފޯރުވިދާނެކަމަށް ބެލެވޭ ބާބުލް މަންދޫބް ކަނޑުއޮޅި ކަނޑުދަތުރުފަތުރު ނުކުރެވޭގޮތަށް ބަންދުވެއްޖެނަމަ ދުނިޔެ ހަކަތައަށްޖެހި ގައުމުތައް ހުއްޓުމަކަށް އަންނާނެއެވެ. އަދި ހުޅަނގުން އިރުމައްޗަށް ކުރެވޭ ވިޔަފާރި ދަތުރުތަކަށް ބޮޑެތި ގޮންޖެހުންތަކެއް މެދުވެރިވާނެއެވެ. މިއީ އަޅުގަނޑުމެން މި އިޝރާތް ކުރި ބައިނަލް އަގްވާމީ ބަލިފައެވެ. އެ ފައި ބުރިކޮށްލުމަކީ ކުރެވޭނެ ކަމެއް ނޫނެވެ. އެކަމަކު ތިމާ މަރުވެގެންދާ އިރު އަނެކާއަށްވެސް ދެވުނު ލަނޑެއް ނުދޭނެއެކޭ ބުނާކަށް ނުވާނެއެވެ.                                                       

އެމެރިކާގެ އެންމެ ކުރިއަރާފައިވާ ބޮންއަޅާ ބޯޓު ބީ-2 ސްޕިރިޓް މަރުކާގެ ބޯޓުފަހަރު އެހެންގޮތަކަށް ބުނާނަމަ “ ގޯސްޓް އޮފް ދަ ސްކައި “ އެމެރިކާއިން ފޯޅަވައްސަށް ގެންގޮސްފިކަމަށް އެންމެފަހުގެ ޚަބަރުތަކުގައި ބުނެފައިވެއެވެ. އެ ބޯޓުފަހަރުން ދިފާއީ ނިޒާމްތަކަށް ފިލައިގެން ދަތުރުކުރުމުގެ ގާބިލުކަން ލިބިފައިވާކަމަށްވެސް ބުނެއެވެ. އަދި ފޯޅަވަހި ޖަޒީރާ މިހާރު އޮތީ ހަނގުރާމައިގެ ހާލަތަށް ތައްޔާރަށް ކަމުގައިވެސް ޚަބަރުތަކުން އެނގެއެވެ.                                                             

މީޑިއާގެ ޚަބަރުތަކަށްބަލާއިރު ފޯޅަވަހީގައި އެމެރިކާ އާއި އިނގިރޭސި ވިލާތުގެ ގުޅިފައިވާ ފައުޖުތަކުގެ 4000 މިލިޓްރީންނާއި ކޮންޓްރެކްޓަރުން ތިބެއެވެ. އޭގެތެރޭގައި ގިނައި އެމެރިކުންނެވެ. ފޯޅަވަހީގެ މިލިޓްރީ ބޭސްގައި ބީ-2 ސްޕިރިޓް މަރުކާގެ ބޮންއަޅާ ބޯޓުފަހަރާއި  ބީ-1 މަރުކާގެ ލޭންސަރ އަދި ބީ-3 މަރުކާގެ ސްޓްރާޓޯފޯރޓްރެސްގެ ބޮންއަޅާ ބޯޓުފަހަރު ހަރަކާތްތެރިވަމުން ގެންދެއެވެ. އަދި އެއީ އޭޝިއާ އާއި އެފްރިކާ އަދި އޯޝަނިޔާއަށް ހަރަކާތްތެރިވާ އެމެރިކާ ލަޝްކަރު ތަކުގެ މައި މަރްކަޒު ކަމުގައިވެސް ބުނެވެއެވެ.    

މި ދިޔަ އާދީއްތަ ދުވަހު ނޫސްވެރިންނަށް މައުލޫމާތު ދެއްވަމުން ރައީސް ޓްރަމްޕް ދެއްވި އިންޒާރުގައި އީރާނަށް އަންގަވާފައިވަނީ އެމެރިކާއިން ބޭނުންވާ ގޮތެއްގެ މަތިން ނިއުކްލިއަރ އެއްބަސްވުމަކަށް އައުމަށާއި އެ ނޫން އެހެންގޮތެއް  އީރާނުން އިޚްތިޔާރު ކޮށްފިނަމަ މީގެ ކުރިން އީރާނުން ނުދެކޭ މިންވަރަކަށް އެ ގައުމަށް ބޮން އަޅާނެ ކަމަށެވެ، އެހެންނަމަވެސް އެ ހާލަތަށް ދާން ނުޖެހޭނެކަމަށް އުންމީދު ކުރައްވާ ކަމަށްވެސް ވިދާޅުވިއެވެ.                                                            

އީރާނުގެ ބަސްމަގުވެސް ހުރީ މަޑުމައިތިރި ރާގަކަށް ނޫނެވެ. ބައެއް އޮފިޝަލުން ވިދާޅުވެފައި ވަނީ އެމެރިކާގެ މިލިޓްރީ ހަމަލާއަކަށް އީރާނުންދޭނީ ބަހުގެ ހަމަލާއެއް ނޫންކަމަށެވެ، އަދި އެހެން ބައެއް އޮފިޝަލުން ވިދާޅުވެފައިވަނީ އެމެރިކާއިން ހަމަލާއެއް ދިނުމުގެ ކުރިން ފޯޅަވަހީގެ މިލިޓްރީ ވަސީލަތްތަކަށް އަމާޒު ކުރުމަކާނުލައި އެ ސަރަހައްދު ކައިރިން ކަނޑަށް މިހާރުވެސް މިސައިލުން ހަމަލާ ދިނުމަށް ސީނިއަރ މިލިޓްރީ އޮދިޝަލުން ބާރު އަޅުއްވަމުން ގެންދަވާ ކަމަށެވެ،