އީމާން ކައިވެނި ކުރާ ދުވަސް ކައިރިވަމުން އައިއިރު އޭނާ ހުރީ އުފަލުން ގޮސް ފޮޅިފައެވެ.މިއުފާވެރިކަމަށް ހިޔަނިއެޅޭފަދަ އެއްވެސް ކަމެއް ނުވުމަށް އެދި ދުއާކޮށްލަ ކޮށްލައެވެ. އޭގެ ދެތިންމަސްކުރިން މަންމައާއި ބައްޕަ ވަނީ ވަރިވެފައެވެ.މި ކަންތައްގަނޑު ކުރިޔަށްގޮސްފައި ވީނަމަވެސް އެކަމުންވެސް އިމާންގެ އުފާވެރިކަން ކިލަނބު ވާގޮތެއް ނުވެއެވެ.
ކައިވެނި އޮންނަ ރޭ ލުމަށް އީމާންގެ މަންމަ ވަނީ ވަރަށްރީތި ހެދުމެއް ހޯދާފައެވެ.ވަރަށް ސްޓައިލިޝް،އަދި މަންމަގެ ހަށިގަނޑުގެ ވަނާތައް ދައްކާދޭ ރީތި ހެދުމެކެވެ. އެހެދުން ލުމުން މަންމަ ހަމަގައިމުވެސް އެންމެ ރީތިކޮށް ހެދުން އަޅާފައިވާ ބްރައިޑްގެ މަންމަ އަށް ވާނެކަން އެއީ ޔަގީން ކަމެކެވެ.
އީމާން އަށް ހިތްހަމަ ޖެހިގެން ހުރެވޭ ގޮތެއް ނުވިއެވެ.މަންމަގެ ހެދުން ގަތްތާ އެއްހަފަތާ ފަހުން އީމާއަށް އިނގުނުގޮތުގައި ބައްޕަ ފަހުން އިން ޒުވާން އަނބިމީހާ،އީމާންގެ ދޮންމަންމަވެސް ހަމަ މަންމަ ގަތް ޑިޒައިންގެ ހަމަ އޭގެ ހެދުމެއް ގަނެފިއެވެ. ކައިވެނިކުރާރޭ މަންމައާއި ދޮންމަންމަ އެއްކަހަލަ ހެދުން ލާކަށް އީމާން ބޭނުމެއް ނޫނެވެ.
އެހެންކަމުން އީމާން ހިއްވަރު ކޮށްލާފަ ދޮންމަންމަ ކައިރީ ހެދުން ބަދަލުކުރަންވީ ނޫންތޯ ސުވާލު ކޮށްލިއެވެ. ނަމަވެސް އޭނާވަނީ އެހެދުންލީމަ އޭނާ ވަރަށް ރީތި ކަމަށް ބުނެ ހެދުން ބަދަލު ނުކުރާނެ ކަމަށް ބުނެފައެވެ.
މިކަމާ ކަންތައް ބޮޑުވެގެން އީމާން މަންމަ ކައިރީ އެވާހަކަ ދެއްކިއެވެ. މަންމަ ހުރީ ހަމަޖެހިފައެވެ.އަދި އެކަމާ އެއްގޮތަކަށްވެސް ކަންތައް ބޮޑުނުވުމަށް އީމާން ކައިރީ ބުންޏެވެ. މަންމަ އެހެން ރީތި ހެދުމެއް ހޯދާނީ ކަމަށާ، އެދުވަހަކީ ދަރިފުޅުގެ ޚާއްސަ ދުވަސް ކަމުން އެދުވަސް ދަރިފުޅަށްޓާކާ ފުރިހަމަ ކޮށްދިނުމަށް މަންމަ ކުރެވެން ހުރި ހުރިހާ ކަމެއް ކޮށްދޭނެ ކަމަށް ބުންޏެވެ.
މަންމަ އާއި އީމާން މަންމަޔަށް ދެވަނަ ހެދުމެއް ގަންނަން ގޮސް އަނެއްކާވެސް ވަރަށް ރީތި ހެދުމެއް ފެނިގެން ގަނެފިއެވެ.
ފަހުން ދެމައިން އެކުގައި މެންދުރުގެ ކެއުމަކަށް ރެސްޓޯރަންޓަކަށް ވަދެ ތިބި ވަގުތުގައި އީމާން ސުވާލުކުރިއެވެ.މަންމަ ފުރަތަމަ ގަތް ހެދުން އަނބުރާ ފިހާރަޔަށް ރައްދު ކުރާނީތޯއެވެ. މަންމަ ބުންޏެވެ. ނޫނެކެވެ.އެހާރީތި ހެދުމެއް ދޫކޮށްލަންވީ ކީއްވެގެން ހެއްޔެވެ.ހެދުން ބާއްވާނީ އެވެ.އަދި އެހެދުން ލާނެ ވަރަށް އެކަށީގެންވާ ދުވަހެއް މަންމަ ޔަށް ވިސްނިއްޖެއެވެ. އެހެދުން މަންމަ ލާނީ ކައިވެނި ކުރާރޭގެ ކުރީރޭ އޮންނަ ރިހާސަލް ޑިނާ އަށެވެ. އޭރުން ދޮންމަންމަ، މަންމަޔަށް ދޭން އުޅުނު ލަނޑު ލިބޭނީ އޭނާއަށެވެ.
