އަލިފާނުގެ ހާދިސާ ހިނގި މުދާ އުފުލާ ބޯޓު ”ހޮޅުދޫ ބޯޓު“ އިން ޒުވާނަކު ގެއްލިގެން ހޯދަން ފަށައިފިއެވެ.
އެ ބޯޓުގައި އަލިފާން ރޯވެގެން ކައްދޫ ފަޔާ ސްޓޭޝަނުން ހަރަކާތްތެރިވެފައި ވާއިރު އެމްއެންޑީއެފުން ބުނީ ގެއްލިގެން ހޯދަމުން އަންނަނީ ލ. މާވަށު ޒުވާނެއް ކަމަށްވާ 25 އަހަރުގެ އަލީ މުޝްފިގް މުހައްމަދު ކަމަށެވެ.
ލ. އަތޮޅާއި މާލެއާ ދެމެދު ދަތުރުކުރާ އެ ބޯޓުގައި އަލިފާން ރޯވެފައި ވަނީ ތ. ކަނޑޫދޫން މުދާ ނަގައިގެން ނުކުންނަނިކޮށް ކަނޑޫދޫ ނެރާ ދިމާ ބޭރުންނެވެ. އެ ބޯޓު އޭރު މާލެ ދަތުރު ކުރަމުން ދިޔައީ ކެޕްޓަންއާއެކު 18 މީހުންނާއެކުއެވެ.
އެމްއެންޑީއެފުން ބުނީ ގެއްލިގެން އުޅޭ ޒުވާނާ ފިޔަވައި ދެން ތިބި މީހުން ސަލާމަތްކޮށްގެން ކަނޑޫދޫއަށް ގެންގޮސްފައިވާ ކަމަށެވެ.
