މިއީ އެހެން މީހަކު ސޯޝަލް މީޑިޔާގައި ކޮށްފައިވާ ޕޯސްޓެއްގެ މައްޗަށް ބިނާކޮށް ލިޔެފައިވާ ލިއުމެކެވެ.

މިއަދު ދިމާވި އުމުރުން ދުވަސްވީ އަންހެނަކު، ބުނި ވާހަކައަކުން އަހަރެންގެ ހިތަށް ވަރަށް އަސަރު ކުރިއެވެ.
އޭނާ ބުނި ގޮތުގައި އޭނާގެ ފިރިމީހާ ވަނީ ދާދި ފަހުން މަރުވެފައެވެ. ނަމަވެސް އޭގެ ކުރިން ދެމީހުން އެއްބަސް ވެފައިވާގޮތުގެ މަތިން އޭނާގެ މަރުގެ ހަބަރު އާންމު ނުކުރެއެވެ. އަދި ”ފިއުނަރަލް“ އެއްވެސް ނުބާއްވައެވެ.
އެހެން ހެދީ ކީއްވެގެންތޯ އަހަރެން ސުވާލުކުރީމެވެ. އޭނާ ބުނި ގޮތުގައި ފިރިމީހާގެ އާއިލާގެ މެންބަރުން އެކަކު އަނެކަކާ ބައްދަލް ނުކުރުމަށް އަބަދުވެސް އެކި ބަހަނާ ދައްކައެވެ.އަދި ބައްދަލް ނުކުރާ ތަނުގައި ފޯން ކޯލްއެއްވެސް ކޮށް ނުލައެވެ.
އެހެން ކަމުން އެމީހުންގެ ބިޒީ ހަޔާތުގައި އުޅެއުޅެތިއްބާ ޖަނާޒާއެއްގައި ބައިވެރިވާން ދިއުން ވާނީ ބުރައަކަށް ކަމުގައި އެދެމަފިރިން ގަބޫލު ކުރީކަމަށް އޭނާ ބުންޏެވެ.
އަހަރެންނަށް އެންމެބޮޑު ޝޮކެއް ލިބުނީ ފިރިމީހާގެ އާއިލާ އަށް އޭނާ މަރުވިކަން ނުވެސް އަންގާކަމަށް އަންހެންމީހާ ބުނުމުންނެވެ.
އާއިލާގެ މީހުންނަށް އެނގޭ ދުވަހު އެމީހުން ކިހިނެއް ”ރިއެކްޓް“ ކުރާނެ ކަމަށް ހީވޭތޯ އަހަރެންނަށް ސުވާލު ކުރެވުނެވެ.އިރުކޮޅަކު ހިމޭނުން އިނުމަށްފަހު އޭނާ ބުންޏެވެ.ފިރިމީހާ ދުނިޔޭގައި ހުއްޓާ އޭނާ ދެކިލަން ނައިސް ނުވަތަ ވާހަކަ ދައްކާލަން ބޭނުން ނުވި ބަޔަކު، ފިރިމީހާ މަރުވުމުން އޭނާގެ މަސްގަނޑު ދެކެން އަންނަން ނުވަތަ އޭނަގެ ވާހަކަ ދައްކަންވެސް އޭނާ ބޭނުން ނުވީއެވެ.
އަންހެން މީހާ އިތުރަށް ކިޔާދިން ގޮތުގައި އޭނާގެ ފިރިމީހާއަކީ ވަރަށް މޮޅަށް މީރުކޮން ކައްކާމީހެކެވެ.އަދި އެކިފަހަރުމަތިން އާއިލާގެ މެމްބަރުނަށް ކެއުންތަކަށް ދައުވަތު ދެއެވެ.ނަމަވެސް އެކަކުވެސް ނާދެއެވެ. އަބަދުވެސް އެމީހުން ދޭ ޖަވާބަކީ މާ ބިޒީ ކަމުގައެވެ.އަދި އެއަށް ވުރެ އަސަރުކުރާ ކަމަކީ އެއްވެސް ޖަވާބެއް ނުދީވެސް ތިބޭ ކަމެވެ.
އޭނާ ބުނި ގޮތުގައި އެއްވެސް ޗުއްޓީ އެއްގައި،އަދި ނޫނީ އުފަން ދުވަހަކާ ނުވަތަ އެނިވަސަރީއަކާ ގުޅިގެން ވިއަސް ބައްދަލްވެ މަރުހަބާކިޔާލާ ނުހަދާނެއެވެ.
އަންހެން މީހާ ކިޔާދިން ގޮތުގައި ވަރަށް ވިސްނާ އަދި ކަލާނގެ ކިބައިން މަދަދު އެދިތިބެ އެދެމަފިރިން އުޅެމުން އައިގެ ވިއްކާލިއެވެ. އަދި ސިޓީ ތެރޭން ކުޑަ އެޕާޓްމަންޓެއް ގަނެގެން އެމީހުންގެ ދިރިއުޅުން އަލުން ފެށީއެވެ.
އަންހެންމީހާ އެވަގުތު އަހަރެންނާ ހަތަރުކަޅި ހަމަކޮށްލުމަށް ފަހު ބުނި ވާހަކަ އަހަރެން ދުވަހަކުވެސް ހަނދާން ނުނެތޭނެއެވެ. ”ކޮއްކޯއެވެ. ތިބާ އަކީ ބަޔަކަށް،އެއީ އަމިއްލަ އާއިލާ ކަމުގައި ވިޔަސް، މުހިންމު މީހެއްނޫންކަން އިހުސާސްވާ ހަމައިން، ދެން އިސްކުރަންޖެހޭނީ އަމިއްލަ ނަފްސްގެ ކަންކަމެވެ.“
އެވަގުތު އަހަރެންގެ ހިތް ކުދިކުދިވި ކަހަލައެވެ.ނަމަވެސް އެއަންހެން މީހާއަކީ އަހަރެންނާ މިހާތަނަށް ބައްދަލްވި އެންމެ ހިއްވަރުގަދަ މީހާކަން އަހަރެންނަށް އިހުސާސް ކުރެވުނެވެ.
އަޅުގަނޑުމެންގެ އަމިއްލަ ހަޔާތުގައިވެސް މިފަދަ އާއިލާތައް ފެންނަކަމީ ވަރަށް ހިތާމަ ކުރާ ކަމެކެވެ.އެއްބަޑު އެއްބަފާ 9 ކުދިން ތިބި ނަމަވެސް ގިނަ ކުދިން ތިބެނީ އެކަކު އަނެކަކާ ވާހަކަ ނުދައްކައެވެ. ގުޅާލުމުން ފޯނު ނުނަގައެވެ.މެސެޖެއް ކޮށްލިޔަސް ޖަވާބް ނުދޭތާ މެސެޖް ނުވެސް ހުޅުވައެވެ. އަނެއްހެން ވަކި މައްސަލައެއް އޮވެގެންވެސް ނޫނެވެ.ހަމަ ބިޒީ ކަމުންނޯލައެވެ. ގާތް ކަން ދެމެހެއްޓުމަށް އިސްކަން ނުދެނީއެވެ.
ބޮޑެތި މީހުން އެހެން ހެދުމުން ކުދިންނާ ކުދިންނާވެސް ވަނީ ދުރެވެ. މިއީ ހިތާމަ ހުރި ކަމެކެވެ.
އާއިލީ ލޯބި އެއީ ގަސްތުގައި ދަމަހައްޓަން ޖެހޭ ކަމެކެވެ. ބޮޑު އާއިލާއެއް އޮވެމެ، އެކުވެރިކަމެއްނެތި އެކަނިވެރި ހާލުގައި އުޅެން ޖެހުމަށްވުރެ ބޮޑު ހިތާމައެއް ނެތެވެ.