އެއްމަސް ނުވެ ފަސް އަހަރުވި ވާހަކަ އަކީ އަރަތެއް ނޫނެވެ. ރައީސް އިބްރާހިމް މުޙައްމަދު ޞާލިހު ވަޢުދުވެ ވަޑައިގަތީ އެ މަނިކުފާނު ރައީސްކަމުގެ ހުވާކުރައްތާ އެއްމަސްދުވަހުގެ ތެރޭގައި މަރާލާފައިވާ ނޫސްވެރިޔާ ރިލްވާންގެ މަރުގެ މައްސަލަ ބަލައި ޢާއިލާއަށް އިންޞާފު ހޯއްދަވާ ދެއްވާނެ ކަމަށެވެ. އެހެހެނަސް އެ މަނިކުފާނުގެ ވެރިކަމުގެ ފަސްއަހަރު ނިމިގެންދިޔައީ ރިލްވާނުގެ ޢާއިލާއަށް އިންޞާފު ހޯއްދަވައި ދެއްވަން ވިދާޅުވި އެއްމަސް ދުވަހަށް ވީގޮތެއް އެނގޭ ރައްޔިތަކު ހުރިހެނެއް ހީއެއް ނުވެއެވެ.

އެކިއެކި ވެރިކަން ފެށުގެން އަންނަނީ އެ ވަގުތަކު ރައްޔިތުންނަށް ކުރިމަތިވެފައިވާ ނުރައްރައްކާތެރި ކާރިސާތަކަށް ހައްލު ހޯއްދަވާދެއްވާނޭ ކަމަށް އަޑަށް ބާރުލައްވާ ވިދާޅުވެ ރައްޔިތުންގެ ލޭ ކައްކުވާލާއިގެންނެވެ.
ޑޮކްޓަރ އަފްރާޝީމް ޢަލީގެ ގާތިލުންނާއި 2012 އިން ފެށިގެން 2016 ގެ ނިޔަލަށް ރާއްޖޭގައި ހިނގާފައިވާ ގޮތްނޭނގޭ މަރުތަކުގެ މައްސަލަތައް އެސަރުކާރުންވެސް އަދި ޖެހިގެންއައި ސަރުކާރުތަކުންވެސް ބަލައިނުދިންކަން ފާހަގަ ކުރެެެވެއެވެ.

ކޮންމެ ވެރިކަމެއްވެސް ވުޖޫދުވަނީ މިފަދަ ބޮޑެތި ދޮގޮތައްހަދައި ރައްޔިތުން މަޅީގައި ޖައްސާ ވޯޓު ހޯދައިގެންނެވެ. ނިމިދިޔަ ސަރުކާރުގެ އަނެއް ވަޢުދަކީ އެމްއެމްޕީ އާރުސީގެ ބޮޑުޚިޔާނާތުގެ މައްސަލަ ބަލާ ޚިޔާނާތް ތެރިވިފަތްތައް ޝަރީޢަތުގެ ކުރިމަށްޗަށް ގެނައުމެވެ. މީވެސް ރައްޔިތުންގެ ލޮލުގައި އެޅުވި އަނދުނެކެވެ. އެންމެ ފަހުން އެމްއެމްޕީއާރުސީގެ ޚިޔާނާތުގެ މައި މުގޫ ހައްޔަރުކުރުމަށްފަހު އޭނާ ދިފާޢުވާނެހާ މަގުތައް ކޮށައިދީ އެނާ ގެއަށް ބަދަލުކޮށް ނުޙައްގު ހެކި ތައްޔާރު ކުރުމުގެ ފުރުޞަތު ހުޅުވައިދިނީއެވެ.
ރައްޔިތުންގެ މަޖިލީހުގައާއި އެ ސަރުކާރާއި މި ސަރުކާރުގެ ތެރޭގައި ތިބި ވަގުންގެ ބޮލުގައި ނުފެންނަ ތާކިހާއަޅުވައި އެމްއެމްޕީއާރުސީގެ ޚިޔާނާތް ކްރިއޭޓުކޮށް އެކަމުގެއިސްވެ ތިބި ދެ މޭސްތިރިންގެ ތެރެއިން އެކަކު ރާއްޖެއިން ބޭރަށް ފޮނުވާލާ އަސްލު ވަގު ޙިމާޔަތް ކޮށްދިނީ އެވެ.

އަނެއްކޮޅުން މި ސަރުކާރުންވެސް ކޮރަޕްޝަނާއި ފަސާދައިގެ މައްސަލަ ބަލާނެކަމަށް ބުނެ ހަދަނީ ރޯބުހުތާން ދޮގެވެ.
މިފަދަ ޚިޔާނުގެ މައްސަލަތައް މި ސަރުކާރުން ބައިދޭނީ ކިހިނެއްތޯއެވެ. ސަރުކާރުގެ އެންމެ މަތިން ފެށިގެން ތިރިއާހަމައަށް އޮތީ އެމްއެމްޕީ އާރުސީގެ ވައްކަމުގެ ރާޙަތު ކޮށްފައެވެ. ރައްޔިތުންގެ މަޖިލީހުގެ މައްސަލަތައް ބަލާކޮމެޓީގެ ރައީސަކަށް މިހާރު އިންނެވީވެސް އެ ފައިސާ ލިބުނު ވަގުންގެތެރޭގައި ހިމެނޭ ބޮޑެކެވެ.
ރައްޔިތުން ވިސްނާށެވެ. މި ރާއްޖޭ ސިޔާސީ މަސްރަޙުން އުފަންވާ ކޮންމެ މީހަކީ ރައްޔިތުންނަށް އޮޅުވާލައިގެން އެބައިމީހުންގެ ޒާތީ މަންފާ އިސްކޮށް ރައްޔިތުންގެ މުދަލާފައިސާއިން ވައްކަންކުރާނެ މަގު ކޮށާވަގުންނެވެ. ސަހަލު އެކަކުވެސް ނެތެވެ. ހުރިހާގެއްލުމެއް ރައްޔިތުންނަށް އެ ލިބެނީ ރައްޔިތުންގެ ތެރޭގައިތިބި އަމިއްލަ އެދުން ބޮޑުބައެއްގެ ސަބަބުންނެވެ. ރައްޔިތުން ހައްލާލަނީ ފައިސާގެ ދަޅަދައްކައިގެން ކަމަށްވުމުން އެކި އެކި އިންތިޚާބުތައް ވެސް އެ ކާމިޔާބު ކުރަމުން އެދަނީ ރަތްލާޖެހި ވަގުންކަން ފާހަގަ ކުރަމެވެ. މި ގައުމުގެ ވެރިކަމަށް ބޭފުޅަކު އިންތިޚާބު ކުރުމުގެ ކުރިން ރާއްޖޭ ދުސްތޫރަށް ރައްޔިތުން ބޭނުންވާ ހެޔޮބަދަލު ގެންނާން ޖެހެއެވެ. މިފަހުގެ ތާރީޚެއްގައި މިރާއްޖޭގެ ވެރިކަން ކާމިޔާބު ކޮށްފައިވަނީ ވަގުން އުފައްދައިގެން އުޅޭ ކޮންމެވެސް ގޭންގަކުންކަން ފެންނަމުންދާ ހަގީގަތްތަކަށް ބަލާލުމުން ހާމަވެގެން ދާނެއެވެ.
ރައްޔިތުންނަަށް އިންޞާފު ލިބޭނެ އެއްވެސް މަގެއް އެއްވެސް ސަރުކާރަކުން ކޮށައިދީފައެއް ނެތެވެ. ވެރިމީހާއަށް އަތް ނުބޭނޭ އެއްވެސް ދޮރެއް ސަރުކާރުން ހުޅުވާދީފައެއް ނެތެވެ.