އަހަރެންގެ އުމުރަކީ 27 އަހަރެވެ. އަހަރެންގެ 17 އަހަރުގެ ފިރިހެން ދަރިއަކު ހުރެއެވެ. މިހެން ބުނުމުން މީހުން ސުވާލުކުރާނެކަން އެނގެއެވެ. އަދި އެކި ގޮތްގޮތަށް ހީކުރާނެކަންވެސް އެނގެއެވެ.އެކަމަކު އެމީހުންނަކަށް އަސްލު ހަގީގަތެއް ނޭނގޭނެއެވެ.
އަހަރެންގެ ވާހަކަ ކިޔާދޭނަމެވެ.

އަހަރެން ބޮޑުވީ ވަރަށް ފަގީރު ދަތި ހާލުގައެވެ. ގޭތެރޭގަ ބޮކި ދިއްލޭ ވަރުކުރުމަށާ މޭޒުމައްޗަށް ކާއެތިކޮޅެއް ލެވޭވަރު ކުރުމަށް އަހަރެންގެ މައިންބަފައިން ބުރަކޮށް މަސައްކަތް ކުރިއެވެ. އަހަރެންގެ އުމުރުން 14 އަހަރުގައި މަންމަގެ މަސައްކަތުގައި އެހީތެރިވާން ފެށީމެވެ. މަންމަ ކުރާ މަސައްކަތަކީ ގޭގެޔަށް މަސައްކަތް ކޮށްދޭން ދިއުމެވެ. އެގޮތުން ދިޔަ އެއްގޭގައި 2 އަހަރުގެ ފިރިހެން ކުއްޖަކު ހުރެއެވެ. މަންމަ ގޭތެރެ ސާފުކޮށް ހަދާ ވަގުތު އަހަރެންނަށް ޖެހެނީ އެއްކުއްޖާ ބަލަހައްޓާށެވެ.

އެގޭ ދެމަފިރިން ގޭގަ އުޅޭ ވަގުތު ވަރަށް މަދެވެ. ވިޔަފާރީގެ ކޮންމެވެސް ކަމެއްގައި އުޅެނީ އަބަދު ބޭރުގައެވެ. ކުޑަކުއްޖާއަށް ކާންދީ ފެންވަރުވާ ރޮވޭނަމަ ހުއްޓާލައްވާ، ނިންދަވާ މިހުރިހާކަމެއް ކުރަނީ އަހަރެންނެވެ. މަޑުމަޑުން އެކުއްޖާއަކީ އަހަރެންގެ އެއްބައި ކަމުގަ ވަނީ ވެފައެވެ. އަހަރެންނަކީ އޭރު ތޭރަ ސާދަ އަހަރަށް ދާކުއްޖެކެވެ. އެކަމަކު މީހަކާ މެދު ހިތާ ޖާނުން އަޅާލާ އޯގާތެރިވުމަކީ ކޮބާކަން އޭރު އަހަރެންނަށް ދަސްވެއްޖެއެވެ.
އަހަރެންގެ އުމުރުން 19 އަހަރުގައި ކުއްލިއަކަށް ހުރިހާކަމެއް ބަދަލުވެއްޖެއެވެ. އަހަރެންގެ މަންމަ ކުއްލިއަކަށް މަރުވީއެވެ. މި ހިތާމަޔަށް ކެތް ނުކުރެވިގެން ބައްޕަ ދިޔައީ މަސްތުގެ ދުނިޔެ އަކަށެވެ. އެހާ ހަމައިން އަހަރެންނަށް ޖެހުނީ ހުރިހާކަމެއް އަމިއްލަޔަށް ކުރާށެވެ.
މަންމަ މަސައްކަތުދާގެ، ކުޑަކުއްޖާ ހުންނަގޭގެ ދެމަފިރިން އަހަރެންނަށް ވަރަށް ހެވެ. އަހަރެންނަށް މުސާރަ ދޭން ފެށިއެވެ. ލާފަ ހުންނަ އަންނައުނު ދެއެވެ. ކާން ދެއެވެ.
މިގޮތުގައި އުޅެ މަންމަ މަރުވިތާ ބަރާބަރު އެއްއަހަރުފަހުން ސްޓްރޯކެއް ޖެހިފައި ބައްޕަވެސް މަރުވެއްޖެއެވެ. އަހަރެންގެ އުމުރުން 20 އަހަރުގައި ދުނިޔޭން މުޅިން އެކަނިވެރިވީއެވެ.
އޭރު ކުޑަކުއްޖާ ވަނީ ވަކިނުވެވޭ ވަރަށް އަހަރެންނާ ގާތްވެފައެވެ. އަހަރެންނަށް މަންމަ ވެސް ކިޔަން ފަށައިފިއެވެ. އޭނަގެ މަންމަ ހުންނަ ތަނެއްގައި ބުނެވިއްޖެ ނަމަ އަހަރެންގެ ދެ މަންމަ ހުންނަ ކަމަށް ބުނެއެވެ.
އަހަރެންގެ ބައްޕަ މަރުވުމުން އެގޭ ދެމަފިރިން އަހަރެން ހުންނަން އެގޭން ކޮޓަރިއެއް ދިނެވެ. އަދި އަހަރެން ކިޔެވުން ކުރިޔަށް ގެންދިއުމަށް އެގޭ ދައްތަ ވަރަށް ނަސޭހަތް ދީ އެހީތެރިވެދިނެވެ. އޮންލައިން ކޯސްތަކަށް ފީ ދައްކާދީ އަދި ލެޕް ޓޮޕެއްވެސް ގަނެދިނެވެ.
މިހިސާބުން އަނެއްކާވެސް އަހަރެނެގެ ހަޔާތަށް ވަރުގަދަ ރާޅެއް ޖެހިއެވެ. އެގޭ ދައްތަ އެއްދުވަހަކު ގެއަށް އައިސް ސޫޓް ކޭސްއަކަށް އެއްޗެތި އަޅައިގެން ދަމުން ބުންޏެވެ. އަހަރެންގެ ދަރިފުޅަކީ ކަލޭގެ އަމިއްލަ ދަރިއެއްފަދައިން ބަލާދެއްޗެވެ. މިހާރުވެސް ތިޔަބަލާ ގޮތަށެވެ. މިހެން ބުނުމަށްފަހު ގެއިން ދިޔަ ގޮތަށް ދެން އެނބުރި ނާދެއެވެ.
އެރޭ އެގޭ ”ބޭބެ“ އަހަރެން ތަނަކު ބައިންދާފަ މިވީގޮތް ކިޔާދިނެވެ. ދައްތަ އެހެން ފިރިހެނަކާއެކު އެހެން ގައުމަކަށް ދިޔައީ ކަމަށް ބުންޏެވެ. އަދި އޭނާއަށްޓަކާވެސް ނުވަތަ ދަރިފުޅަށްޓަކާވެސް ދެން ނާންނާނެ ކަމަށް ބުންޏެވެ.
މިވާހަކަތައް އަޑުއަހާފަ އަހަރެންނަށް ލިބުނީ ޝޮކެކެވެ. ދިހަ އަހަރުގެ އެ ކުޑަ ދަރިފުޅަށްޓަކާ އަހަރެންގެ ހިތުގައި އިތުރަށް ހަމްދަރުދީ އާއި ލޯބި އުފެދުނެވެ.
އެގޭ ”ބޭބެ“ އަހަރެންނަށް އަބަދުވެސް ވަރަށް ހެވެ. ދުވަހަކުވެސް ބޭއަދަބީ ބަހެއް ބޭނުން ކޮށް އެފަދަ ގޮތަކަށް ކަމެއް ނުކުރެއެވެ. އަހަރެންނާ މުޚާތަބް ކުރާނީ އިހުތިރާމްއާއި އެކުއެވެ.
އެރޭގެ ފަހުން ”ބޭބެ“ ވެސް އަހަރެންގެ ކިޔެވުން ފުރިހަމަ ކުރުމަށް ނަސޭހަތްތެރި ވާންފެށިއެވެ.އަދި މުސްތަޤްބަލަށްޓަކާ ހުވަފެންތައް ދުށުމަށް ހިއްވަރު ދިނެވެ.އަދި އެންމެ މުހިންމު ކަމަކީ ދަރިފުޅު ރަގަޅަށް ތަރުބިއްޔަތު ކުރުން ކަމަށް ބުންޏެވެ.
މިކަމަށް އަހަރެންގެ އެއްވެސް މައްސަލަ އެއް ނެތެވެ.އޭރުވެސް އެކުއްޖާހުރީ އަހަރެންނާ ވަކިނުވެވޭ ވަރަށް ގާތްވެފައެވެ.
އަހަރެންގެ އުމުރުން 24 އަހަރުގައި އަހަރެން ހައި ސްކޫލް ނިންމާލިއިރު،އަހަރެންނާ ”ބޭބެ“އާއި ދެމެދު އޮތް ގުޅުމަށް މަޑުމަޑުން ބަދަލު އަންނަ ފެށިއެވެ.އަހަރުތަކެއްވަންދެން ހިތާމަޔާއި މޮޅިވެރިކަން ހިއްސާ ކުރަމުން،ރޭގަނޑުގެ ދަންވަރުވަންދެން ވާހަކަ ދައްކަން ތިބުމާއި އަދި އެންމެ ޚާއްސަ ކޮށް ގުޅިގެން ކުއްޖަކު ބޮޑުކުރުމުގެ ޒިންމާގެ ތެރެއިން އަހަރުމެން ދެމީހުންގެ ދެމެދު އޮތް ގާތް އެކުވެރިކަން މަޑުމަޑުން ލޯބީގެ ގުޅުމަކަށް ބަދަލުވާން ފެށިއެވެ.މިއީ ދެމީހުންވެސް ރާވައިގެން ގެނައި ނުވަތަ އައި ބަދަލެއްނޫނެވެ. ހަމަ ތަބީޢީ ބަދަލެކެވެ.
އެންމެ ފަހުން ”ބޭބެ“، އަހުމަދު ރަޝީދު އަހަރެންނަށް ކައިވެނި ހުށައަޅާ އަހަރުމެން ކައިވެނި ކުރުމުން ވަރަށް ގިނަމީހުން އެކަމާ ނުރުހުން ފާޅުކުރިއެވެ. ޚާއްސަކޮށް ”ބޭބެ“ ގެ އާއިލާގެ މީހުންނެވެ. އަހަރެން މަކަރުން ގެޔާއި މުދަލާހެދި ”ބޭބެ“ އަތުއަޅުވާލީ ކަމަށް ބުންޏެވެ.
ހަގީގަތް އެމީހުންކަމަށް ނޭނގޭނެއެވެ. ދަރިފުޅު ބަލިވެގެން ކިތައްރޭ އަހަރެން ހޭލާހުރިކަން އެމީހުންނަކަށް ނޭނގޭނެއެވެ.އަދި މަންމަ ދޫކޮށްލާފަ ދިއުމާއި އެފަދަ ހިތާމަ ތަކާހެދި ރޯން ފެށުމުން އެދަރިފުޅުގެހިތްހަމަ ޖައްސާދީ މަންމައެއްގެ ލޯބި ދިން ގޮތެއްވެސް އެމީހުން ނަކަށް ނޭނގޭނެއެވެ.
މީހުން ކިޔާއެއްޗަކަށް އަހަރުމެން ނުބަލަމެވެ. އަހަރެން އަހުމަދު ރަޝީދު އަށް އަދިވެސް ކިޔަނީ ބޭބެއެވެ.އެއީ ލޯބިން އަހަރެން ދިން ނަމެއްގެ ގޮތުގައެވެ.
މިހާރު އުމުން 27 އަހަރުގައި އަހަރެން 17 އަހަރުވީ ދަރިފުޅު ގޮވައިގެން ސްކޫލް އަށް ލާން ދަމެވެ.އަދި އޭނައަހަރެންނަށް މަންމަ ކިޔާފަ ގޮވާ ހެދުމުން މީހުންގެ މޫނުމަތިން ހައިރާންކަންވެސް ފެނެއެވެ. އެކަމަކު ހަގީގަތަކީވެސް އެއީ އެވެ. އެއީ އަހަރެންގެ ދަރިފުޅެވެ.
އޭނާ އަހަރެންނަށް ލިބުނީ މަންމަ އަކަށް ވުމުގެ އުންމީދު އަހަރެން ކުރުމުގެ މާކުރިންނެވެ.އޭނާގެ އަސްލު މަންމަ ސިޓީއެއް ނުލިޔާތާ ފޯނު ކޯލް އެއްވެސް ކޮށްނުލައެވެ. އަދި ވަކި ހަމަޔަކުން އެމަންމަގެ ވާހައިން ސުވާލުކުރުން ދަރިފުޅު ހުއްޓާލައިފިއެވެ.
އަހަރެންގެ މައިންބަފައިން މަރުވީއެވެ.އަހަރެން ކޮންމެ ދުވަހަކުވެސް އެމީހުންގެ މަތިން ހަނދާން ކުރަމެވެ.އަހަރެންގެ މިއަދުގެ ހަމަޖެހޭ ދިރިއުޅުން އެމީހުންނަށް ފެންނާނެ ނަމައޭ އަހަރެން ހިތަށް އަރައެވެ. ކުރިމަތިވި ހުރިހާ ހިތާމައެއްގެ ތެރޭންވެސް އަހަރެންނަށް ލޯބި ލިބިއްޖެއޭ އެމީހުން ކައިރީ ބުނަން އަހަރެން ބޭނުމެވެ.
އަހަރެން ކޮންމެވެސް ދުވަހަކުން އަދި އިތުރުން ކުއްޖަކު ހޯދަވެސް ފާނެއެވެ.އަދި ނުހޯދަވެސް ފާނެއެވެ. މިވަގުތު އަހަރެންގެ ލޯބިލޯބި ފިރިހެން ދަރިފުޅަކު އެބަހުއްޓެވެ.ލޯބިވާ ފިރިއަކު އެބަހުއްޓެވެ. އަދި ކެތް ތެރިކަމާއި އޯގާތެރިކަމުގެ މައްޗަށް ބިނާކޮށް އުފެދިގެން އައި އުފާވެރި ހަޔާތެއް އެބައޮތެވެ.
މިއީ އަހަރެންގެ ވާހަކައެވެ.