ޔޫކްރެއިންއާއި ރަޝިޔާގެ ހަނގުރާމަ ވަރަށް އަވަހަށްނިމި އެއަށްފަހު އެ ޔޫކްރެއިންގެ ބިންތައް ރަޝިޔާއާއެކު އަލުން ބަހާލުމުގެ ދެލިކޮޕީ މިހާރު ތައްޔާރު ކުރެވެމުންދާކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.  

ވައިޓްހައުސްގައި ނޫސްވެރިންނަށް މައުލޫމާތު ދެއްވަމުން ރައީސް ޓްރަމްޕް ވިދާޅުވީ ރަޝިޔާއާއިން ޔޫކްރެއިނާ ދެކޮޅަށް މިހާރުވެސް އެ ގެންދަނީ ހަނގުރާމަކުރަމުންނެވެ. އެއްބަޔަކު އަނެއްބަޔަކަށް ބަޑިއަމާޒު ކުރަމުންނެވެ. ބައެއް ލަޝްކަރު އެތިބީ ނިކުމެވޭނެގޮތެއްނެތި ހިސާރު ކުރެވިފައެވެ. މި ދެކޮޅުވެރިކަމާއި ހަނގުރާމަ ވަރަށް އަވަހަށްނިމި ދާއިމީ ސުލްހައެއް ގާއިމް ކުރެވިދާނެކަމުގެ އުންމީދު ލިބިއްޖެއެވެ. އަދި އެއަށްފަހު ޔޫކްރެއިންގެ ބިންތައް ރަޝިޔާއާއެކު ބަހާނެގޮތަކާ ދޭތެރޭ މިހާރު މިގެންދަނީ މަޝްވަރާ ކުރަމުންނެވެ.              

އެމެރިކާއިން އެންމެ ފުރަތަމަ މަސައްކަތްކުރަމުންގެންދަނީ ހަކަތައާއި އާންމުންގެ ގެދޮރާއި އިމާރާތްތަކަށް ރައްކާތެރިކަން ކަށަވަރު ކުރެވޭނެ ގޮތެއްގައި ވަގުތީގޮތުން ހަމަލާތައް ހުއްޓުވުމަށެވެ.  ރަޝިޔާގެ ރައީސް ޕޫޓިންވެސް ވަނީ ހަކަތައާއި އާންމުންގެ ގެދޮރާއި އިމާރާތްތަކަށް ހަމަލާދިނުން ވަގުތީ ގޮތުން ހުއްޓާލުމަށް ތާއީދުކުރައްވާފައެވެ. އެހެންނަމަވެސް މިމަހުގެ ކުރީކޮޅު ކީވުން ހުށައަޅާފައިވާ ގޮތަށް 30 ދުވަހުގެ މުއްދަތަށް ހަމަލާތައް ބަދަލުކުރުން ހުއްޓާލުމަށް އެއްބަސްވެ ވަޑައި ނުގަންނަވައެވެ.                       

މިދިޔަ އަންގާރަ ދުވަހު ރައީސް ޓްރަމްޕް ފޯނުކުރައްވައި ރައީސް ޒެލެންސްކީއާއެކު އެއްގަޑިއިރު ވަންދެން ދެއްކެވި ވާހަކަފުޅުގައި މުސްތަގްބަލްގެ ސަލާމަތީ ފިޔަވަޅެއްގެ ގޮތުން ޔޫކްރެއިންގެ ހަކަތައާ ބެހޭ ވަސީލަތްތައް އެމެރިކާގެ މިލްކުވެރިކަމުގެ ދަށުގައި ބެހެއްޓުމަށް ވަނީ ހުށައަޅުއްވާފައިވާކަމަށް ޚާރިޖީ ވަޒީރު މާރކޯ ރޫބިއޯ އާއި އަދި ނޭޝަނަލް ސެކިއުރިޓީ އެޑްވައިޒަރ މައިކް ވޯލްޓްޒްގެ ގުޅިފައިވާ ބަޔާނެއްގައި ބުނެފައިވެއެވެ. އެމެރިކާއިން އެ ވަސީލަތްތައް ރައްކާތެރިކާއެކު ބަލަހައްޓައި އޭގެ ޚިދުމަތް ޔޫކްރެއިންގެ ރައްޔިތުންނަށް އެންމެ ފައިދާ ކުރަނިވިގޮތެއްގައި ފޯރުކޮށްދޭނެއެވެ. އެހެންނަމަވެސް ވަގުތީގޮތުން ހަނގުރާމަ ހުއްޓުވަން އެމެރިކާއިން ކުރާ މަސައްކަތަށް އެއްބާރުލުން ދިނުން ފިޔަވައި ހަކަތައިގެ ވަސީލަތްތައް އެމެރިކާއަށް ދިނުމާބެހޭގޮތުން ރައީސް ޒެލެންސްކީ އެއްވެސް އެއްޗެއް ވިދާޅެއް ނުވެއެވެ. ޔޫކްރެއިން ހަކަތައިގެ ވަސީލަތްތައް އެމެރިކާގެ މިލްކުވެރިކަމުގެ ދަށަށް ގެންނަން ރައީސް ޓްރަމްޕް މަސައްކަތް ކުރައްވަނީ ޔޫކްރެއިންގެ ޚާއްސަ މައުދަން އެކުލެވޭ ވެލި އެމެރިކާއަށް ފޯރުކޮށްދިނުމުގެ އެއްބަސްވުމުގައި ރައީސް ޒެލެންސްކީ ސޮއި ނުކުރެއްވުމުގެ ސަބަބުން ކަމުގައި ބެލެވެއެވެ.                                                 

ރައީސް ޒެލެންސްކީ ގެ ވާހަކަފުޅުގައި ރަޝިޔާއިން ޔޫކްރެއިނާ ދެކޮޅަށް ކުރަމުން ގެންދާ ހަނގުރާމައިގާ ރައީސް ޓްރަމްޕްގެ ޒައާމަތުގައި ދާއިމީ ސުލްހައެއް ލިބިގެންދާނެ ކަމަށް ވަރަށްބޮޑަށް އުންމީދު ކުރައްވާ ކަމަށާއި އަދި ހަނގުރާމަ ހުއްޓި ސުލްހަ ގާއިމް ކުރެވުމަށްފަހު އެމެރިކާއާއި ޔޫކްރެއިން ގުޅިގެން ދެ ގައުމުގެ ވިޔަފާރިއާއި އިގްތިސާދު ކުރިއެރުވުމަށް ހެޔޮ ފުރުސަތު ތަކެއް ހުޅުވިގެންދާނެ ކަމަށާއި އަދި ޔޫރަޕްގެ އެއްބައިވަންތަކަމަށް އިތުރު ކާމިޔާބީ ލިބިގެންދާނެ ކަމަށްވެސް ރައީސް ޒެލެންސްކީ އުންމީދު ކުރައްވާކަމަށް ވިދާޅުވިއެވެ.