ތުރުކީގައި ސަރުކާރާ ދެކޮޅަށް ބުދަ ދުވަހު ފެށިމުޒާހަރާތައް ވަރުގަދަވެ ފުޅާ ވަމުން ދާކަމަށް ޚަބަރު ލިބެއެވެ. އިދިކޮޅު ފަރާތަކުން މުޒާހަރާ ކުރަން ފަށާފައިވަނީ އިސްތަންބުލްގެ މޭޔަރ އިކްރަމް އިމަމޮގްލޫ، ކޮރަޕްޝަންގެ މައްސަލަ ތަކެއްގައި ކަމަށް ބުނެ ހައްޔަރު ކުރުމާއި ގުޅިގެންނެވެ.
އިމަމޮގްލޫ އަކީ ރައީސް ތައްޔިބް އުރްދޮޣާން ގެ އެންމެ ބޮޑު ސިޔާސީ ވާދަވެރިޔާއަށް ވާއިރު،އޭނާގެ މަގްބޫލްކަން ފަހަކަށް އައިސް އަންނަނީ ވަރަށް ބޮޑަށް އިތުރު ވަމުންނެވެ. ބުދަ ދުވަހުގެ ފަތިހުގެ ވަގުތެއްގައި އިމަމޮގްލޫ ހައްޔަރުކުރީ 2028ގައި އޮންނަ ރިޔާސީ އިންތިހާބަށް އިދިކޮޅު ސީއެޗްޕީ ޕާޓީން ކުރިމަތިލާނެ ކެންޑިޑޭޓަކީ އޭނާކަމުގައި އިއުލާން ކުރަން ދެތިން ދުވަހަށް ވެފައި ވަނިކޮށެވެ. އިމަމޮގްލޫ ގެ ޕާޓީން ވަނީ އިމަމޮގްލޫ ހައްޔަރުކުރުމަކީ އިންގިލާބެއްކަމަށް ސިފަކޮށްފައެވެ.އަދި އިދިކޮޅު މުޒާހަރާތައް ހުއްޓާނުލާ ކުރިޔަށް ގެންދާނެ ކަމަށް ވަނީ ވައުދު ވެފައެވެ. ޕާޓީގެ ލީޑަރ، ރައީސް އުރްދޮޣާން އަށް އިންޒާރުދީ ބުނެފައިވަނީ މިވަތުން ފެށިގެން އިދިކޮޅު ފަރާތްތަކުން ތިބޭނީ މަގުމަތީގައިކަމަށާ މަގުތަކާ މައިދާން ތަކީ އެންމެންގެ ތަންތަން ކަމުގައެވެ. އަދި އިދިކޮޅު ފަރާތްތައް ދެކެ އުރްދޮޣާން ބިރުގަންނަން ޖެހޭ ކަމަށް އޭނާ ބުނެފައި ވެއެވެ.
ސަރުކާރާ ދެކޮޅަށް މުޒާހަރާ ކުރުމަށް ނިކުތް އެތައް ހާސްބަޔަކުވަނީ ބުދަ ބުރާސްފަތި ދެރޭވެސް ސިޓީ ހޯލްގެ ކުރިމަތި ހިމެނޭގޮތުން އެތައް މަގެއްވެސް ފުރާލާފައެވެ.އަދި ހުކުރުދުވަހުވެސް މުޒާހަރާތަކަށް ދަނީ ތައްޔާރު ވަމުންނެވެ.
އޭއެފްޕީއާއި ހަވާލާދީ ލިބޭ ޚަބަރުތައް ބުނާ ގޮތުން އިސްތަންބުލް އިން ފެށުނު ތުރުކީގެ އިދިކޮޅު މުޒާހަރާތައް، އެގައުމުގެ 81 ޕްރޮވިންސް ގެ ތެރެއިން މަދުވެގެން 29 ޕްރޮވިންސަށް ވަނީ ފެތުރިފައެވެ.
އިދިކޮޅު މުޒާހަރާތައް ވަރުގަދަ ކުރަން ފެށުމާއި ގުޅިގެން ރައީސް ގެ ޚާއްސަ މަތިންދާ ބޯޓު މަންޒިލް ހާމަ ނުކޮށް ކޮންމެވެސް ތަނަކަށް ދަތުރު ކޮށްފައިވާ ކަމަށް ޚަބަރުތައް ބުނެއެވެ.
އިދިކޮޅު ލީޑަރ ހައްޔަރު ކުރުމާއި އެކު ސަރުކާރުން ސޯޝަލް މީޑިޔާ އަދި އިންޓަނެޓް ބަންދު ކޮށްލިއެވެ.ނަމަވެސް ދެދުވަސް ފަހު އަލުން އިންޓަރނެޓް ލިބޭ ކަމަށް ޚަބަރުތައް ބުނެއެވެ.
އިމަމޮގްލޫ ހައްޔަރުކުރުމާއި ގުޅިގެން ތުރުކީގެ ފައިނޭންޝަލް މާކެޓް ތަކަށްވެސް ވަނީ ވަރަށް ބޮޑަށް ލޮޅުން އަރާ ތުރުކީ ފައިސާ ލީރާ އަށް އޭގެ ނޭދެވޭ އަސަރު ކޮށްފައެވެ.
ތުރުކީގެ ރައީސް ރަޖަބް ތައްޔިބް އުރްދޮޣާންގެ މަގްބޫލްކަން ފަހަކަށް އައިސް ވަނީ ވަރަށް ބޮޑަށް ދަށަށް ގޮސްފައެވެ. އެންމެ ފަހުން ބޭއްވުނު އިންތިޚާބްގައިވެސް އުރްދޮޣާ އަށް ކާމިޔާބް ކުރެއްވުނީ ވަރަށް ހަނި އަޤުލަބިއްޔަތަކުންނެވެ. އިދިކޮޅުން ފަރާތްތަކުން ތުހުމަތު ކުރާ ގޮތުގައި އިންތިހާބްގެ ނަތީޖާ އޭރުވެސް އޮތީ އޮޅުވާލާފައެވެ
One Response
އުރުދުޣާނުވެސް ދެބޯގެރި ދުއްވަންވެގެން ވެރިކަން ބީވަނީއެވެ. މާ ފަލަސްތީނަށް ލޯބިކުރާ ޔޫރަޕްގެ އުސޫލުތަކާއި ދެކޮޅުކަން ދައްކައިގެން ނަމަވެސް އެމީހުންގެ ފަސްބައިގައި އެލިގެން އުޅޭމީހެއްކަން ރައްޔަތުންނަށް އެނގެންފެށުމުން އަނެއްކާވެސް އިދިކޮޅަށް ސަޕޯޓް ބޮޑުވަނީއެވެ. ކުރާނެ ކަމެއް ނެތެވެ. އިދިކޮޅުގައި ހުންނެވީ ޔޫރަޕްއާއި އެމެރިކާގެ ގޮނޑިކޮށްކޮއެކެވެ. ކުރާނެކަމެއް ނެތެވެ. ވަﷲ އަޢުލަމް!