އެމެރިކާގެ ރައީސް ޑޮނާލްޑް ޓްރަމްޕް އީރާނުގެ ސުޕްރީމް ލީޑަރ އާޔަތު ﷲ އަލީ ޚާމަނާއި އަށް ފޮނުއްވިކަމަށްބުނާ ސިޓީއެއްގެ މައުލޫމާތު ލިބިފައިހުރިފަރާތަކުން ސީ އެން އެން އަށް ޚަބަރު ދީފައިވާ ގޮތުގައި ކުރިއަށް އޮތް 2 މަސްދުވަހުގެ ތެރޭގައި އަލުން ނިއުކްލިއަރ އެއްބަސްވުމަކަށް އައުމަށްޓަކައި މުހުލަތެއް ވަނީ ދެއްވާފައެވެ.
އެ ސިޓީ ރައްދުކޮށްދެއްވުމަށްޓަކައި ރައީސް ޓްރަމްޕް މެދުއިރުމައްޗަށް ޚާއްސަކުރައްވާފައިވާ މަންދޫބް ސްޓީވް ވިޓްކޯފް އެމިރޭޓްސްގެ ރައީސް މުހަންމަދު ބިން ޒައިދު އަލް ނަހްޔާން އަތްޕުޅަށް މިދިޔަ ހަފުތާގައި ވަނީ އެ ސިޓީ އަރުވާފައެވެ. އެމިރޭޓްސް އިން މިހާރުވަނީ އެ ސީޓީފުޅު ރައްދު ކުރައްވާފައެވެ. އެ ސިޓީ ފުޅަކީ އީރާނުގެ ނިއުކްލިއަރ މަޝްރޫއު އެމެރިކާގެ ބާރުގެ ދަށަށް ގެނައުމަށް ރައީސް ޓްރަމްޕް ފަށްޓަވާފައިވާ މަސައްކަތްޕުޅުގެ ފެށުން ކަމުގައި ބެލެވެއެވެ. އީރާނުގެ ނިއުކްލިއަރ މަޝްރޫއު ސިޔާސީގޮތުން ވީހާވެސް އަވަހަށް ހަމަޔަކަށް އަޅުވަން ބޭނުންފުޅުވާ ކަމަށް އެ ސޓީފުޅުގައި ރައީސް ޓްރަމްޕް ވިދާޅުވެފައިވާ ކަމަށް ވެއެވެ. ސިޔާސީ ގޮތުން ހަމަޔަކަށް ނޭޅުވިއްޖެނަމަ އެކަންކުރެވޭނެ އެހެން ގޮތްތައްވެސް އެބަހުރިކަމަށް ނޭޝަނަލް ސެކިއުރީ ކައުންސިލްގެ ތަރުޖަމާނު ސީ އެން އެން އަށް ފޮނުވި ބަޔާނެއްގައި ބުނެފައި ވެއެވެ.
މީގެ ކުރިން ފޮކްސް ނިއުސްގައި ވާހަކަފުޅުދައްކަވަމުން ރައީސް ޓްރަމްޕް ވިދާޅުވެފައިވަނީ އީރާނުގެ ނިއުކްލިއަރ މަޝްރޫއު ހަމަޔަކަށް އެޅުވޭނެ އޮތީ ދެ ގޮތެއް ކަމަށާއި އީރާނަށް ގެއްލުމެއް ދެއްވަން ބޭނުންފުޅު ނުވާކަމަށެވެ.
ރައީސް ޓްރަމްޕް މިދިޔަ އަންގާރަ ދުވަހު ރައީސް ޕޫޓިންއާއެކު ފޯނުން ދެއްކެވި ވާހަކަފުޅުގައިވެސް އީރާނުގެ ނިއުކްލިއަރ މަޝްރޫއާ ބެހޭގޮތުން ވާހަކަ ދައްކަވާފައިވާ ކަމަށް ވައިޓްހައުސް އިން ބުނެފައި ވެއެވެ. އެ ވާހަކަފުޅުގައި އީރާނުން އިސްރާއީލު ވުޖޫދުން ނައްތާލެވިދާނެ ފުރުސަތެއް ނުދެއްވުމާމެދު ޚިޔާލު ބަދަލު ކުރެއްވިކަމަށްވެސް ވެއެވެ.
ނިއުކްލިއަރ މަޝްރޫއާ ގުޅޭގޮތުން އެމެރިކާއާއެކު ވާހަކަދައްކަން އީރާނުން އެއްބަސްނުވެއްޖެނަމަ އެމެރިކާއިން އަޅާނެ ފިޔަވަޅެއް ނޭގެއެވެ، މިލިޓްރީ ގޮތުން ފިޔަވަޅު އެޅުމަކީވެސް ނުވެ ނުދާނެ ކަމެއް ކަމުގައި އެމެރިކާގެ ބައެއް އޮފިޝަލުން ވަނީ ހާމަކޮށްފައެވެ.
އެމެރިކާއިން ފޮނުވި ސިޓީއާބެހޭގޮތުން އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ އެމެރިކާގެ ސިޓީގައި ހުރި ފުރުސަތުތަކާއި އަދި އިންޒާރުތަކާދޭތެރޭ އީރާނުން ވިސްނާފައި ލަސްނުކޮށް ޖަވާބު ދެއްވާނެ ކަމަށެވެ. އެ ސިޓީގެ އަސްލަށް ބަލާއިރު އިންޒާރު ދިނުން ނޫން އެހެން ފުރުސަތަކަށް މަގު ހުޅުވިފާއޮތް ކަމަކަށް ނުބެލެވެއެވެ. އެހެންނަމަވެސް ކޮންމެ އިންޒާރެއްގެ ފަހަތުގައިވެސް އެއިން ރެކިގަނެވޭނެ މަގެއް އޮންނާނެއެވެ.
އެ ސިޓީއާ ބެހޭގޮތުން އީރާނުގެ ސުޕްރީމް ލީޑަރ ވިދާޅުވެފައިވަނީ އެއީ މައްކާރަކު ލިއެފައިވާ މަކަރުވެރި ސިޓީއެއް ކަމަށެވެ. އެހެން ގައުމުތައް ފައިދަށުލުމުގެ ވިސްނުންހުރި ގައުމަކާއެކު މަޝްވަރާ ކުރުމަކުން ނިކުންނާނެ ހެޔޮ ނަތީޖާއެއް ނޯންނާނެއެވެ. ޓްރަމްޕްގެ ހަމައެކަނި ބޭނުމަކީ އީރާން އިނދަޖައްސާލުމެވެ.
One Response
އެއްގޮތަކައްވެސް ޓްރިއަންޕް އަށް ދޫނުދޭތި. ނިއުކުލިއަރ ހަތިޔާރު ޙަދާފައި ޓްރިއަންްޕް އާއި ނަތައްޔާހޫއަށް ދައްކާފައި ބިރުގަންނުވާލާ އެއިރުން މައިތިރިވެން ބިރުންތިބެދާނެ