އެމެރިކާގައިތިބި އެލް ސަލްވެޑޯރގެ ނުރައްކާތެރި ގޭންގްތަކަށް ތުހުމަތުކުރެވޭ މީހުން އެ ގައުމަށް ފޮނުވާލަން އެމެރިކާ ސަރުކާރުން ނިންމުމުން އެކަން ނުކޮށް މަޑުކުރަން ފެޑެރަލް ކޯޓުން ކުރި އަމުރު ބަލާނުގަންނަނީތޯ އެ ކޯޓުގެ ފަނޑިޔާރަކު ސަރުކާރަށް ސުވާލުކޮށްފިއެވެ.

ޑިސްޓްރިކްޓް ފަނޑިޔާރު ޖޭމްސް އީ ބޯސްބާރގް އަނގަބަހުން ކުރި އަމުރު ގަބޫލު ކުރުމަކާނުލައި އަދި އެ އަމުރު ލިއުމުން ލިބުމުން ނޫނީ އަމަލު ނުކުރެވޭނެ ކަމަށާއި އަދި އެމީހުން ފޮނުވާލި ފްލައިޓް މިހާރު ފުރައިގެން ގޮސްފައިވާތީ އާއި އެމީހުން ފޮނުވާލުމުގައި ގައުމީ ސަލާމަތާ ރައްކާތެރިކަންވެސް އެކުލެވޭތީ އެ ސުވާލަށް ޖަވާބު ދެވެންނެތްކަމަށް ސަރުކާރުން ބުނެފައިވާތީ ކަންތައްކުރި ގޮތާ ދޭތެރޭ ޝައްކު އުފެދޭ ކަމަށް ފަނޑިޔާރު ދެކިވަޑައިގަންނަވައެވެ. މިހާތަނަށް ވަރަށް މަދު ފަހަރެއްގައި މެނުވީ ބޭނުންކޮށްފައިނުވާ 1798 ވަނަ އަހަރުގައި ފާސްކުރި ހަނގުރާމައިގެ ހާލަތުގައި ބޭނުންކުރަންޖެހޭ ގާނޫނެއްގެ ބޭނުން ކޮށްގެން ސަރުކާރުން އެމީހުން ފޮނުވާލިއިރު ވަގުތީގޮތުން އެމީހުން ފޮނުވާ ނުލުމުގެ އަމުރެއް ކޯޓުން ނެރެން ތައްޔާރުވެފައިވާކަން ސަރުކާރަށް ހަމަ ރަނގަޅަށް އެނގޭނެއެވެ.
އެމީހުން އުފުލި މަތިންދާބޯޓު ޖައްވުތެރޭގައި އޮތްނަމަވެސް އަހަރެން ކުރި އަމުރު އޭގަ މައްޗަށް ހިނގާނއެވެ. ފަނޑިޔާރު ޖޭމްސް އީ ބޯސްބާރގް ބުނެފައިވެއެވެ. އެހެންނަމަވެސް ޑެޕިއުޓީ އެސޯޝިއޭޓް އެޓޯރނީ ޖެނެރަލް އަބިޝޭކް ކަމްބްލީ ބުނެފައިވަނީ ފަނޑިޔާރު އަނގަބަހުން ކުރި އަމުރުގެ 45 މިނިޓް ފަހުން އެ އަމުރު ލިއުމުން އާންމުކުރި އިރު އެމީހުން އުފުލި 2 މަތިންދާބޯޓު ފުރައިގެން ހިނގައްޖެ ކަމަށާއި އެ ފްލައިޓްތައް އަނބުރާ ގެނައުމުގެ ފުރުސަތު ގެއްލިގެން ހިނގައްޖެ ކަމަށެވެ. އަދި އެއީ ގައުމީ ސަލާމަތާ ގުޅުންވެސް ހުރި ޚައްސާސް މައްސަލައެއް ކަމަށެވެ.
ސަރުކާރުގެ ފަރާތުން އިތުރަށް ހާމަކޮށްފައިވާ ގޮތުގައި ސަރުކާރަށް މެދުވެރިވެދާނެ މިބާވަތުގެ މައްސަލައެއްގައި ރައީސް އަޅުއްވާ ފިޔަވަޅަކަށް ގޮތްކިއުމަކީ ފެޑެރަލް ފަނޑިޔާރަކަށް ލިބިގެންވާ ބާރެއް ނޫނެވެ.
1798 ވަނަ އަހަރުގެ އެ ގާނޫނުގެ ދަށުން އެއްވެސް މީހަކު މީގެފަހުން ޑިޕޯރޓް ކޮށްގެން ނުވާނެ ކަމަށް މިދިޔަ ހޮނިހިރު ދުވަހުގެރޭ ފަނޑިޔާރު ޖޭމްސް ބޯސްބާރގް ވަނީ ސަރުކާރަށް އަންގާފައެވެ. އަދި ހޯމަދުވަހު ސަރުކާރުގެ ފަރާތުން ކޯޓަށް ޖަވާބުދާރީ ވާން ޖެހޭނެ ކަމަށްވެސް ވަނީ އަމުރުކޮށްފައެވެ. އެހެންނަމަވެސް ޖަސްޓިސް ޑިޕާރޓްމެންޓުން ބުނެފައިވަނީ އާންމުކޮށް ހުޅުވާލެވިފައިވާ ފޯރަމެއްގައި ސަރުކާރުން ޖަވާބުދާރީ ނުވާނެކަމަށެވެ.
ފަނޑިޔާރު ޖޭމްސް އީ ބޯސްބާރގް ގެ ކޯރޓް އަމުރާގުޅޭގޮތުން އެލް ސަލްވެޑޯރގެ ރައީސް ނާއިބް ބުކޭލޭގެ ޓްވީޓް ގައި ވިދާޅުވެފައިވަނީ މިހާރު މާބޮޑަށް ލަސް ވެއްޖެކަމަށެވެ. ރައީސް ބުކޭލޭ ގެ މި ޓްވީޓަށް ތައުރީފް ކުރުމާއެކު ވައިޓްހައުސްގެ ކޮމިޔުނިކޭޝަންސް ޑިރެކްޓަރ ސްޓީވް ޗެއުންގް ވަނީ ހަމަ އެ ޓްވީޓް ތަކްރާރު ކޮށްފައެވެ. އެލް ސެލްވަޑޯރގެ މީހުންތައް އެމެރިކާއިން ފޮނުވާލުމުގެ މައްސަލަ ހޫނުވެފައިވާ މިދަނޑިވަޅުގައި ވެނެޒޫލާގެ ސަރުކާރުން އެކަން ސިފަކޮށްފައިވަނީ ކިޑްނެޕް ކުރުމެއްގެ ގޮތުގައެވެ. އަދި އެއީ އިންސާނީ ކަރާމަތަށް އަރައިގަތުން ކަމުގައި ސިފަކުރައްވައި އެ މައްސަލަ އ ދ އަށާއި ކަމާއި ގުޅުންހުރި އެހެނިހެން ބައިނަލް އަގްވާމީ އިދާރާތަކަށްވެސް ހުށައަޅާނެކަމަށް ވެނެޒޫލާއިން ވަނީ ހާމަކޮށްފައެވެ.