ކޮންމެވެސް ރަށެއްގައި އުޅުނު ދެމަފިރިންގެ ތެރެއިން ފިރިހެން މީހާ އެއްދުވަހަކު އޭނާގެ އަންހެނުންނަށް ފޯނުން ގުޅާލާފައި ބުންޏެވެ. ހަނީ އެވެ.އޮފީސް މީހުން ދާ މަސް ދަތުރުގައި ދިއުމަށް އަހަރެން ނަށް ދައުވަތު ލިބިއްޖެއެވެ. ދަނީ އޮފީހުގެ ހުރިހާ ފިރިހެނުންނެވެ. ”ހަނީ“ ކޮށްދޭންވީ ކަމަކީ އަހަރެން އޮފީސް ނިންމާފަ ގެޔަށް ދާންވާއިރަށް، ގަރާޖު ތެރޭގައި އަހަރެން ބާއްވާ ފިޝިންގ ކިޓް ގައި އެއްޗެތި ހަމަތޯ ބަލާލާފަ ކިޓް ރަގަޅަށް ތައްޔާރު ކޮށްލަދޭންވީއެވެ. އަދި ދެދުވަހަކަށް ވާވަރަށް ދެޓީޝާޓަކާ ދެސޯޓު އަދި ދެތިން ބޮކްސަރު ތުވާލި ދަތް އުގުޅާ ސާމާނު މިފަދަ ބޭނުންވާނެ އެއްޗެތި ލާފަ ކުޑަ ސޫޓްކޭސް އެއްވެސް ތައްޔާރު ކޮށްލަދޭށެވެ. އަދި އެންމެ ފަހުން ”ހަނީ“ އަހަރެންގެ ބާތުޑޭގަ ދިން ސިލްކް ޕިޖާމާ ނިދާހެދުންވެސް ރީތިކޮން ފަތް ޖަހާލާފައި ސޫޓްކޭސް އަށް ލާދެއްޗެވެ.
އޭނާގެ އަންހެނުން އެކަންތައް ކޮށްދޭނެ ކަމަށް ބުނުމުން ފޯނު ބާއްވައިފިއެވެ.
ފިރިމީހާ އެދުވަހު އޮފީހުން ގެޔަށް އައިއިރު ހުރީ ވަރަށް ހިތް އަވަސް ވެފަ ކަހަލަ ގޮތަކަށެވެ. ތެޅިގަނެފަ އަވަހަށް ދާން ހަދައިގެން އަންހެނުންނަށް ބާއި ކިޔާލަންވެސް ހަނދާނެއް ނުވިއެވެ.
ފިރިމީހާ ދިއުމުން ގޭތެރޭގެ ބައެއްކަންކަން ނިންމާލުމަށްފަހު ފެންވަރާލައިގެން އަންހެންމީހާ ދިޔައީ ބަދިގެޔަށް ބޭނުންވާ ބައެއްސާމާނު ގަނެލުމަށްޓަކައި ކައިރީގަ ހުންނަ މޯލް އަށެވެ. އެތަނުގައި އުޅެނިކޮށް ފިރިމީހާ އޮފީހުގެ ދެތިން ފިރިހެނުންވެސް ބާޒާރު ކުރަން އެތަނަށް ގޮސްގެން އުޅެނިކޮށް ފެނުނެވެ.އޭނާ ހިތަށް އެރިއެވެ. މިވެރިން އޮފީސް މަސްދަތުރު ނުދަނީ ތާއެވެ. އެކަމަކު އޮފީހުގެ ހުރިހާ ފިރިހެނުން ދާކަމަށް ފިރިމީހާ ބުނީ ކީއްވެގެން ބާވައެވެ.
މަސްދަތުރު ނިންމާލުމަށްފަހު ތިންދުވަސް ފަހުން ފިރިމީހާ ގެޔަށް އަތުވެއްޖެއެވެ. އައި އިރު އޭނާގެ މޫނު މަތިން ތަފާތު ކަމެއް ފެންނަން ހުރިހެން އަންހެން މީހާއަށް ހީވިއެވެ. އޭނާ އާއި ހަތަރުކަޅި ބައްދަލް ނުކުރަން އުޅޭ ހެންވެސް ހީވިއެވެ. ގޯހެއް އުޅޭ ކަމަށް ޝައްކެއް ހިނގި ނަމަވެސް އެކަމާ ފުރަތަމަ އޭނާ އަޅައެއް ނުލައެވެ.އަދި ފޮށިއަތުލަމުން ސުވާލު ކޮށްލިއެވެ. ކޮބާ ދަތުރު ވަރަށް މަޖާ ދޯއެވެ.
މިހެން ބުނުމުން ފިރިހެން މީހާ ހީވީ މެޓާ ފިހާރަޔަކަށް ވައްދާފަ ހުރި ކުޑަކުއްޖެއް ހެންނެވެ. އެއްފަހަރާ އެތައްވާހަކައެއް ކިޔާދޭން އުޅުނު ކަހަލައެވެ. އާނ މަޖާކަމުގެ ކޮޅެއްވެސް ނެތް ކަމަށާ،މަސް ފަށެއް ބޭނި ކަމަށާ، އެންމެނަށް އެންމެ ކަމުދިޔައީ އޭނަގެ މަސްބާނާ ކިޓް ކަމަށް އޭނާ ބުންޏެވެ. އަންހެންމީހާ ހެވިފަ ހުރެ އެއްޗެތި ތަންތަނަށް ލާ ހަދަނިކޮށް ފިރިހެން މީހާ ސުވާލު ކުރިއެވެ. ނިދާ ޕިޖާމާ ނުލީ ކީއްވެގެން ހެއްޔެވެ.އަހަރެން އޭތީ ހޯދާ ނުފެނުނެވެ. މިހެންބުނުމުން އަންހެން މީހާ ބުންޏެވެ. މަސްބާނާ ކިޓްގައި،ކޮތަޅަކަށް ލާފައި ޕިޖާމާ އޮންނާނެއެވެ. އެއްފަހަރުވެސް ކިޓް ހުޅުވާލިނަމަ އޭތި ފެންނާނެއެވެ.
އެހާ ހަމައިން ޝައްކު ޔަގީން ވިއެވެ.
