ކަލަންޑަރުގައިވާ ގޮތުން މި އަހަރުގެ މާރޗް މަހުގެ އެއްވަނަ ދުވަހަކީ 1446 ވަނަ އަހަރުގެ ރަމަޟާން މަހުގެ ފުރަތަމަ ދުވަސް ކަމުގައި ވާނެ ކަމަށް ބެލެވެއެވެ. މި ފުރުސަތުގައި ސަންދާނު ކިއުންތެރިންނަށް ރަމަޟާންމަހުގެ ތަހުނިޔާ ދެންނެވުމަށް އަޅުގަނޑުމެން އަވަސްވެ ގަންނަމެވެ.  

ރޯދަމަހުގެ މާތްކަން އަޅުގަނޑުމެންނަށް އޮޅުންފިލުވާ ދެއްވުމަށްޓަކައި ދަންނަބޭކަލުން ދެއްވަމުން ގެންދަވާ ފިލާވަޅުތަކަށް ޝުކުރުވެރިވަމެވެ. އެބޭފުޅުންގެ ފިލާވަޅުތައް އަޅުގަނޑުމެންނަށް ފަހުމް ކުރެވުނު މިންވަރަކުން އަޅުގަނޑުމެންވެސް އެ ފިލާވަޅުތައް ތަކުރާރުކުރުމަކީ އެބޭފުޅުން އެންމެ ރުހިވަޑައިގަންނަވާގޮތް ކަމުގައިވާނެއެވެ. ކުރީ ޒަމާނުގައި އިންޓަރނެޓްގެ ވަސީލަތްތައް ދިވެހިރާއްޖޭގެ އެންމެހާ ކަންކޮޅުތަކަށް ލިބިފައި ނެތުމާއެކުވެސް ރޯދައިގެ މާތްކަން ބަޔާންކޮށްދެއްވުމަށްޓަކައި އެބޭފުޅުން ބުރަ އުނދަގޫތަކެއް ވަނީ އުފުއްލަވާފައެވެ.  މިއަދު އެ ވަސީލަތްތައް އެންމެ ފުރިހަމަގޮތުގައި ބޭނުންކުރުމަށް އަޅުގަނޑުމެންނަށް ފުރުސަތު މިވަނީ ލިބިފައެވެ.       

ރޯދަ މަހަށް މަރުހަބާ ކިއުމުގެ ގޮތުން ދެއްވި ދަރުސެއްގައި ދާދިފަހުން އިލްމުވެރިޔަކު ވިދާޅުވެފައި ވެއެވެ. އަހަރުގެ 12 މަސް ދުވަހުގެ ތެރެއިން 11 މަސްދުވަހަށް އަރަބި ކަރައިގެ ރަށްވެހިން ވަނީ ނަންދީފައެވެ. އެހެންނަމަވެސް ރަމަޟާން މަހުގެ ނަން އެއީ ކީރިތި ގުރާނުގައި މާތް ﷲ ބާވާލައްވާފައިވާ ނަންފުޅެކެވެ. މިއީ ރޯދަމަހުގެ މާތްކަން ދެނެގަތުމުގައި ވަރަށް ޚާއްސަ ފާހަގައެއްކަމަށް ވިދާޅުވެފައި ވެއެވެ. ރަމަޟާން މި ބަހުގެ މާނައަކީ އަންދާލުން ކަމަށާއި ހެޔޮ ގޮތުގައި ހިފާ ރޯދައިގެ ސަބަބުން ތިމާއާށް ކުރެވިފައިވާ ކުށްފާފަތައް އަންދާލެވޭނެކަން މިއިން އެނގިގެންދާކަމަށްވެސް ވިދާޅުވިއެވެ.                                                

އަޅުގަނޑަކީ އަޅުގަނޑުމެންގެ ތެރޭގައި މިހާރަކަށް އައިސް ރޯދަ ހިފުމުގެ އާދަތައް ހުރިގޮތާއި އިލްމުވެރިންގެ ދަރުސްތަކުގައި އެ ވިދާޅުވާ ފާފަތައް އަނދައިގެންދިއުމާ ހުރި ގުނުމުގެ މައްޗަށް ވާހަކަދެއްކުމުގެ ގާބިލުކަން ލިބިފައިވާ މީހަކީމެއް ނޫނީ މުއެވެ. އެހެންނަމަވެސް އިލްމުވެރިންގެ ދަރުސްތަކުން ކިތަންމެ ކުޑަމިންވަރެއްވިޔަސް ލިބިގަނެ ތިމާގެ ރޯދަހިފުން ހެޔޮ މަގުގައި ސާބިތު ކުރެވިއްޖެނަމަ އަޅުގަނޑުގެ މަގްސަދުން ބައެއް ނަމަވެސް ހާސިލު ކުރެވުނީއެވެ. އަޅުގަނޑުގެ މި މަގްސަދުގައި ކުރިއަށް ދިއުމަށް އަދިވެސް އެހެން ދަރުސެއްގެ ކުޑަ މިންވަރެއް ނަމަވެސް ހިއްސާ ކޮށްލާނަމެވެ.                                            

އެއްދުވަހަކު މޫސާގެފާނު މާތް ﷲ ގެ ހަޟްރަތުގައި ދެންނެވިކަމަށް ބުނެވެއެވެ. އިނބަ އިލާހު ތިމަން އަޅާއަށް ބަސް ވަހީ ކުރައްވައި އަދި މިއަޅާއަށް އިނބަ ﷲ ގެ ހަޟްރަތުގައި ބަސްދެންނެވުމުގެ މަތިވެރި ފުރުސަތު ވަނީ ދެއްވާފައެވެ. މިއަޅާއަށްވުރެން އިނބަ ﷲ އާއި ކުއްތަންވެގެންވާ އެހެން އަޅަކު ހުރެދާނެކަން އެނގުމުގެ އެދުންވެރިކަމުގައިހުރެ ދެންނެވީމެވެ.  އެވަގުތު މޫސާގެފާނަށް މާތް ﷲ ވަހީ ކުރެއްވިކަމަށްވެއެވެ. ފަހު ޒަމާނުގައި ތިމަން އިލާހުގެ އެންމެ ފަހުގެ ނަބިއްޔާ މުޙަންމަދުގެފާނު ދުނިޔެއަށް ފޮނުއްވޭނެއެވެ. އެ ނަބިއްޔާގެ އުންމަތުގެ މީހުން ބަނޑުހައި ހޫނު ކަމާއި ފެންބޮވައިގެންފައިވާހާލުގައި ރޯދަ ހިފާނެއެވެ. އެ ރޯދަ ވީއްލާހިނދު އެ އަޅުތަކުން ތިމަން އިލާހަށް ކުރާ ދުއާ އެއްވެސް ފަރުދާއެއްނެތި ތިމަން އިލާހު އައްސަވާވޮޑިގެންވާނަމެވެ. އޭ މޫސާގެފާނެވެ. ކަލޭގެފާނުގެ ދުއާ ތިމަން އިލާހުގެ ހަޟްރަތަށް އައުމަށްޓަކައި 70 ފަރުދާ ހުރަސްކުރަން ޖެހޭނެއެވެ.        

މާތް ﷲ މި އަޅަމެންގެ އުންމަތަށް ދެއްވާފައި މިވާ އަގުހުރި ނިއުމަތް އެންމެ ފުރިހަމަގޮތުގައި ލިބިގަންނަ ބަޔަކު ކަމުގައި މި އަޅަމެން ލައްވާށިއެވެ. އާމީން!