ތުރުކީއާއި އީރާނުގެ ދެކޮޅުވެރިކަމުގެ އާ ފެށުމަކަށް އިރާގު ވެދާނެބާ!

Loading

February 28, 2025
profile
Facebook
Twitter
WhatsApp

މެދުއިރުމަތީގެ ގައުމުތަކުގެ ވެރިންގެ ވިސްނުމާއި ފިކުރަށް އަންނަމުންދާ ބަދަލުގައި މެދުއިރުމަތީގެ ހާލަތު ބަދަލުވަމުންދާއިރު ތުރުކީއާއި އީރާނުގެ ދެކޮޅުވެރިކަމުގެ އާފެށުމަކީ އިރާގު ކަމުގައި ވެދާނެ ބާވައެވެ! ފާއިތުވެގެން ދިޔަ އަހަރެއްހާ ދުވަހު ހަމާސް އާއި ހިޒްބު އާ ދެކޮޅަށް މިލިޓްރީ ގޮތުން އިސްރާއީލުން ހޯދި ކާމިޔާބާއި ސީރިޔާގައި ބައްޝާރުލް އަސަދުގެ ވެރިކަން ނިމުމަކަށް އައުމުން މެދުއިރުމަތީގައި އީރާނުގެ މުހިންމުކަން ކުޑަވެއްޖެކަމަށް ބެލެވެއެވެ. އީރާނުގެ މިހާލަތު ރަނގަޅުކުރަން ޖެހިފައިވާއިރު ތުރުކީން މިހާރު ވަނީ ސީރިޔާގެ އާ ސަރުކާރާއެކު ވަރުގަދަ ގުޅުމެއް އުފައްދާފައެވެ. އަދި ތުރުކީގެ ޕީ ކޭ ކޭ  ހަނގުރާމަވެރިންނާ ގުޅުންހުރި އިރާގުގެ ސަރުކާރާއި ވަކިވެގަތުމަށް މަސައްކަތްކުރާ ކުރުދީންނާއި ދެކޮޅަށް އެކުގައި މިލިޓްރީ ހަރަކާތަތައް ހިންގުން ވެސް ހިމެނެއެވެ.  

                                                             

ތުރުކީއާއި އީރާނުންވެސް އިރާގުގެ ސިޔާސީ މައިދާނަށް ނުފޫޒު ފޯރުވުން ވަރަށް މުހިންމު ވާނެއެވެ.         

ފަހަކަށް އައިސް ތުރުކީގެ ޚާރިޖީ ސިޔާސަތަށް ގެނައި ބަދަލުތަކަކާއެކު މެދުއިރުމަތީގެ ވެށި ތުރުކީގެ ފަރާތަށް ބުރަވެފައިވާކަން ފާހަގަކުރެވެއެވެ. ސީރިޔާގެ މިހާރު ސަރުކާރާއެކު ތުރުކީން ވަނީ ވަރަށް ރަނގަޅަށް ގުޅުން ގާއިމް ކޮށްފައެވެ.  އަދި ވަރަށް ފަހުން ތުރުކީގެ ޚާރިޖީ ވަޒީރު  ހަކާން ފިދާން އިރާގަށް ވަޑައިގެން އެކުވެރިކަމުގެ އަތްޕުޅެއްވަނީ ދިއްކޮށްލައަވާފައެވެ. އަންކާރާ އާއި ބަޣްދާދުންވެސް ދެކޭގޮތުގައި ދެ ފަޅީގައިތިބި ވަކިވެގަންނަން މަސައްކަތްކުރާ ހަނގުރާމަ ވެރިންނަކީ 2 ސަރުކާރަށް މެދުވެރިވެފައިވާ ތޫނު ކައްޓެކެވެ.                

ސީރިޔާއާއި ލެބަނަންގައި އީރާނުގެ ބާރު ކުޑަވެގެންދިއުމާއެކު ސަރަހައްދީ ނުފޫޒު ދެމެހެއްޓުމަށް ޓަކައި އިރާގަކީ އީރާނަށްވެސް ވަރަށް މުހިންމު ބައިވެރިއެކެވެ. ހަމަ އެފަދައިން އިރާގުގައި އީރާނަށް އޮތް ތާއީދަކީ ތުރުކީއަށް މެދުއިރުމަތީގައި ދިމާވެފައިވާ ސިޔާސީގޮތުން ބޮލު ރިހުމެކެވެ.                                

ދާދިފަހުން ތުރުކީގެ ޚާރިޖީ ވަޒީރު ފިދާން ތެހެރާނަށް ޒިޔާރަތް ކުރައްވައި ޕީކޭކޭ (ތުރުކީއާއި ވަކިވެ ގަންނަން މަސައްކަތްކުރާ ހަނގުރާމަވެރި ޖަމާއަތް) ގެ ސަބަބުން ތުރުކީއަށް ދިމާވެފައިވާ އުނދަގޫތައް ހައްލުކުރުމުގައި އީރާނުގެ ބައިވެރުވުން ބޭނުންކަމަށް ލުއި ބަހުރުވައަކުން ވަނީ ވާހަކަފުޅު ދައްކަވާފައެވެ. މީގެ ކުރިންވެސް ތެހެރާނުންވަނީ ތުރުކީގެ އެދުމަށް ޕީކޭކޭގެ ދެކޮޅުވެރިކަން ހައްލުކުރުމަގައި ބައިވެރިވެ ދީފައެވެ.         

ކުރުދީން ދެކޭގޮތުގައި މީގެ ކުރިން ތެހެރާނުން ކޭޑީޕީ  (ކުރުދީންގެ ޑިމޮކްރެޓިކް ޕާރޓީ) އަށް ދިން ހަމަލާތަކުގެ މާނައަކީ ތެހެރާނުން ކުރުދީންގެ ސަރަހައްދުގައި މިނިވަން ދައުލަތެއް ގާއިމްކުރުމަށް ތާއީދު ކުރުމެވެ. އަންކާރާގެ ދެކޮޅުވެރި ޕީ ކޭ ކޭ ހަންމަތަ ކުރުމަށްޓަކައި އަންކާރާގެ ތާއީދު އޮންނަނީ ކޭޑީޕީ އަށެވެ. އެހެންނަމަވެސް ކުރުދީންގެ ނަމުގައި އެންމެ ބޮޑަށް ވަކާލާތު ކުރަމުން ގެންދަނީ ޕީކޭކޭ އިންނެވެ.        

ތުރުކީއާއި އީރާނުގެ މަސްރަހް ގައި ހަމަނުޖެހުން އުފެދިފައިވާއިރު މިހާރުވެސް ތުރުކީން ގެންދަނީ ސީރިޔާގެ އިރުމަތީ ސަރަހައްދުގައި ސީރިޔަން ޑިމޮކްރެޓިކް ސިފައިންނާ ހަނގުރާމަކުރަމުންނެވެ. އެހެންނަމަވެސް ސީރިޔާގެ އިރުމަތީ ސަރަހައްދުގައި ތިބި އީރާނުގެ ސިފައިން ވަނީ ބައްޝާރުގެ ވެރިކަމުގެ ފަހު ދުވަސްކޮޅު ސީރިއަން ޑިމޮކްރެޓިކް ސިފައިންނަށް މަގުފަހިކޮށްދިނުމުގެ ބޭނުމުގައި ފަހަތަށް ޖެހިފައެވެ. ތުރުކީއާއި އީރާނުގެ ގުޅުމަށް މިކަމުގެ ސަބަބުންވެސް ނުތަނަވަސްކަން ލިބިފައިވާކަމަށް މެދުއިރުމަތީގެ ހާލަތު ދިރާސާކުރައްވަމުންގެންދަވާ މުހައްލިލު ހާމިދް ރިޒާ އަޒީޒީ ވިދާޅުވެފައި ވެއެވެ.

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް