އެމެރިކާގެ ރައީސް ޑޮނާލްޑް ޓްރަމްޕްގެ ރިޔާސަތުގައި ޓްރާންސް އެޓްލާންޓިކް ޔޫރަޕްގެ ގައުމުތަކާއެކު އޮންނަ ގުޅުމުގައި ރެނދުއަޅާފައިވާ މިންވަރު ރަޝިޔާއިން ޔޫކްރެއިނަށް އަރާގަތް ކަމަށް ބުނެ ޔުނައިޓެޑް ނޭޝަންސްގެ ޖެނެރަލް އެސްމްބްލީއަށް ހުށައަޅާފައިވާ މައްސަލާގައި އިއްޔެ އެ ޖަމާއަތުން ނެގި ވޯޓުން ހާމަވެގެން ހިނގައްޖެއެވެ.
ރަޝިޔާއާއި ޔޫކްރެއިނުން ކުރަމުންގެންދާ ހަނގުރާމަ ހުއްޓުވުމަށް ހުށައަޅާފައިވާ 3 ގަރާރުގައިވެސް ރަޝިޔާ ބަދުނާމު ކުރަން އެމެރިކާއިން ވަނީ ދެކޮޅު ހަދާފައެވެ. ރަޝިޔާއިން ޔޫކްރެއިނަށް އަރައިގަތުން ކުށްވެރިކޮށް ޔޫކްރެއިނާ ދެކޮޅަށް ރަޝިޔާއިން ކުރަމުންގެންދާ ހަނގުރާމަ ވަގުތުން ހުއްޓާލުމަށް ޔޫރަޕްގެ ގައުމުތަކުން ޔުނައިޓެޑް ނޭޝަންސްއަށް ހުށައެޅި ގަރާރުގައި ބުނެފައި ވެއެވެ.
އެ ގަރާރަށް އެމެރިކާ ވޯޓުދޭން ބޭނުން ނުވިއިރު ފަރަންސޭސީ ވިލާތުގެ ރައީސް މެކްރޯން ހުންނެވީ ރައީސް ޓްރަމްޕް އަރިހުގައި ވޯޝިންގޓަނުގައެވެ. މީގެ ކުޑަ ދުވަސްކޮޅެއްފަހުން އިނގިރޭސި ވިލާތުގެ ބޮޑުވަޒީރުވެސް ވޯޝިންގޓަނަށް ވަޑައިގަންނަވާގޮތަށް ވަނީ ހަމަޖެހިފައެވެ. އެހެންނަމަވެސް އެމެރިކާއާއި އިނގިރޭސި ވިލާތާ ދެމެދު ވަނީ ވަރަށް ގިނަ ދެބަސްވުންތަކެއް އުފެދިފައެވެ.
ޔުނައިޓެޑް ނޭޝަންސް ޖެނެރަލް އެސެމްބްލީއިން ފާސްކުރާ ގަރާރުތަކަށް މެމްބަރު ގައުމުތަކުން ތަބާވުން ލާޒިމް ނުކުރާ ނަމަވެސް އެ މަޖްލިސްގައި ނެގޭ ވޯޓުތަކުން ދުނިޔޭގެ ސިޔާސީ ވެރިން ބައިބައިވެފައިވާ މިންވަރު އެނގިގެންދެއެވެ.
ޖެނެރަލް އެސެމްބްލީއަށް ޔޫރަޕްގެ ގައުމުތަކުން ހުށައެޅި ގަރާރަށް ވޯޓު ނުދީ އެމެރިކާއިން ބޭނުންވީ އެ ގައުމުން ޔުނައިޓްޑް ނޭޝަންސް ގެ ސަލާމަތީ މަޖިލީހަށް ހުށައަޅާފައިވާ ގަރާރު ފާސްކުރުމަށެވެ. 19 މެމްބަރުން ހިމެނޭ ސަލާމަތީ މަޖިލީހުގައި އެ ގަރާރަށް 5 މެމްބަރު ގައުމަކުން ވޯޓުދޭން ބޭނުމެއް ނުވިއެވެ. އެ ގައުމުތަކަކީ ފަރަންސޭސި ވިލާތާއި އިނގިރޭސި ވިލާތާއި ޑެންމާރކާއި ގްރީކާއި އަދި ސްލޯވީނިޔާއެވެ. ސަލާމަތީ މަޖިލީހުގެ ގަރާރުތަކަށް މެމްބަރު ގައުމުތަކުން ތަބާވުން ލާޒިމް ކުރާނެއެވެ.
މި 2 ގަރާރާއި ގުޅިގެންވެސް އެމެރިކާއާއި ޔޫރޕްގެ ގުޅުން ބަނަވަމުންދާކަން ފާހަގަކުރެވެއެވެ. ހަނގުރާމައިގެ ދުވަސްވަރުގައި ޔޫކްރެއިންގެ ރިޔާސީ އިންތިޚާބު ނުބޭއްވުމުން ރައީސް ޒެލެންސްކީއަކީ ޑިކްޓޭޓަރެއްކަމަށް ރައީސް ޓްރަމްޕް ވަނީ ވިދާޅުވެފައެވެ. ރައީސް ޓްރަމްޕް މިހެން ވިދާޅުވިއިރު ޔޫކްރެއިން ވަށާލައިގެން ރަޝިޔާ ސިފައިން ތިބިކަން ހަނދުމަފުޅު ނެތްކަމަށާއި ރައީސް ޓްރަމްޕް އުޅުއްވަނީ ރަޝިޔާއިން އުފައްދާފައިވާ ދޮގު މައުލޫމާތުގެ ޖައްވެއްގައި ކަމަށް ވިދާޅުވެ ރައީސް ޒެލެންސްކީ ވަނީ ރައްދު ދެއްވާފައެވެ.
ރަޝިޔާއާއި ޔޫކްރެއިންގެ ހަނގުރާމަ ހުއްޓުވުމަށް އެމެރިކާއިން ކުރަން ނިންމާފައިވާ މަޝްވަރާތަކުގައި ޔޫކްރެއިނާއި އެ ގައުމަށް ތާއީދުކުރަމުންގެންދާ ޔޫރަޕްގެ ގައުމުތައް އެއްފަރާތްކޮށް އެ މަޝްވަރާތައް ކުރާނީ ހަމައެކަނި އެމެރިކާއާއި ރަޝިޔާއިން ކަމަށް އެމެރިކާގެ ރައީސް ޑޮނާލްޑް ޓްރަމްޕް މިދިޔަ ހަފުތާގައި ނިންމެވި ހިސާބުން ޔޫރަޕްގެ ގައުމުތަކާއެކު އެމެރިކާއިން އުފެދިފައިވާ އެކުވެރިކަމާއި އެއްބައިވަންތަކަމަށް ބައިބައި ވުމުގެ އަސަރުތަކެއް ކުރަން ފަށައިފިއެވެ.
ޖެނެރަލް އެސެމްބްލީގައި ނެގުނު ވޯޓުގައި މެމްބަރު ގައުމުތަކުން ޔޫކްރެއިންގެ ކޮޅަށް ބުރަވުން ކުޑަވަމުން ދަށްވަމުންދާކަން ފާހަގަ ކުރެވުނެވެ. މީގެ ކުރިން ނެގުނު ވޯޓުތަކުގައި ރަޝިޔާއާއި ދެކޮޅަށް 140 މެމްބަރު ގައުމުން ވޯޓު ދީފައިވާއިރު މިފަހަރުގެ ވޯޓުގައި އެ އަދަދުވަނީ 93 އަށް ވެއްޓިފައެވެ. 65 މެމްބަރު ގައުމުން ވަކިކޮޅަކަށް ވޯޓުދޭން ބޭނުމެއް ނުވިއެވެ.
ޔުނައިޓެޑް ނޭޝަންސްގައި ނެގުނު ވޯޓަށްފަހު މި ވޯޓުތައް ރަޝިޔާއިން ކާމިޔާބު ކޮށްފިނަމަ އަހަރެމެން އުޅެންޖެހޭނީ އަޑުގަދަމީހާގެ ރުއްގިނަ ދުނިޔެއެއްގައި ކަމަށް ވިދާޅުވެ އިނގިރޭސި ވިލާތުގެ ސަފީރު ބާރބަރާ ވޫޑްވާރޑް ވަނީ އިންޒާރު ދެއްވާފައެވެ. އެހެންނަމަވެސް އެ ޖަމާއަތުގައި ނެގުނު ވޯޓުތަކަށްފަހު އެމެރިކާގެ ސަފީރުގެ ނައިބު ޑޮރޯތީ ޝީ ވިދާޅުވެފައިވަނީ މީގެކުރިން މި ޖަމާއަތުން ރަޝިޔާއާ ދެކޮޅަށް އެތައް ގަރާރުތަކެއް ފާސްކުރި ނަމަވެސް ލިބުނު ކާމިޔާބެއް ނެތެވެ. އޭގެ ބަދަލުގައި އިތުރު އެތައް ބަޔަކު މަރުވެ އެ ހަނގުރާމަ މިއޮތީ މުޅިދުނިޔެއަށް ކުރިމަތިވެފައިވާ މުސީބާތަކަށް ވެފައެވެ. މިއިން އެނގިގެންދަނީ މައްސަލަ ހައްލުކުރަން ކުރެވެމުންދާ މަސައްކަތުގެ މިސްރާބު ރަނގަޅު ނޫންކަމެވެ.
