އަޅުގަނޑު މިލިއުން ގެނެސްދިނުމުގެ ބޭނުމަކީ ބޮޑާކަމާއި ކިބުރުވެރިކަމުގެ ސުންޕާ ބަލިމަޑުކަން އަޅުގަނޑުމެންގެ ތެރޭގައިވެސް އާންމު ވަމުންދާތީވެ އަޅުގަނޑުވެސް ހިމެނޭ ގޮތުގައި އަޅުގަނޑުމެންގެ ނަފުސްތައް އިސްލާޙްކުރަން ހަނދާންކޮށްދިނުމުގެ ބޭނުމުގައެވެ. ކުރިއަށްއޮތް ރަމަޟާންމަހުގެ ދަރުމައާއި ސަވާބު އެންމެ ހެޔޮ ގޮތުގައި ލިބިގަންނަ ބަޔަކު ކަމުގައި އަޅުގަނޑުމެން ލައްވާށިއެވެ. އާމީން!
ތާރީޚު އިލްމުން އެނގިފައިވާ ގޮތުގައި އާދު ބާގަޔަށް ނިސްބަތް ކުރެވޭ ޝައްދާދަކީ މިހާރު ވުޖޫދުގައި ފެންނަންނެތް އިރަމް އޮފް ޕިލާރސްގެ ވަރަށް ޖައްބާރު ރަސްކަލެކެވެ. އިރަމް އޮފް ޕިލާރސް އަކީ މިހާރުގެ ޔަމަނާއި އުމާނާއި ދެމެދުގެ ސަރަހައްދެކެވެ. އަދި އެއީ މިހާރުގެ އަދަނާއި ކައިރި ސަރަހައްދެއް ކަމަށް ތާރީޚު އިލްމުވެރިން ބުނެފައިވެއެވެ.
ތާރީޚީ އިލްމުވެރިންގެ ލިއުންތަކުން އެނގޭ ގޮތުގައި ޝައްދާދުގެ މަޝްހޫރު ސުވަރުގެ ބިނާކޮށްފައިވަނީ ރަނާ ރިއްސާއި ޖަވާހިރާއި އަދި އަގުބޮޑުހާ މައުދަންތައް ބޭނުންކޮށްގެންނެވެ. އެ ސުވަރުގެ ފުރިހަމަ ކުރުމަށްޓަކައި 12 އަހަރު ދުވަސް ހޭދަވެގެން ދިޔަ ކަމަށްވެއެވެ. ޝައްދާދު ނިންމާފައިވަނީ އެ ސުވަރުގެ ފުރިހަމަ ވުމަށްފަހުގައި ނޫނީ އެތަން ބަލާލަނެވެސް ނުދިއުމަށެވެ.
އިލްމުވެރިންގެ ދަރުސްތަކުން އެނގޭގޮތުގައި ޝައްދާދުގެ ވެރިކަން ޔަމަނުން ފެށިގެން އިރާގާ ހަމަޔަށް ފެތުރިގެން ދިޔައެވެ. އަދި ބައެއް ރިވާޔަތުގައި އީރާނާހަމަޔަށް ދިޔަކަމަށްވެސް ބުނެފައިވެއެވެ. އެއީ އޭގެކުރިން ދުނިޔެ ދެކިފައި ނުވާފަދަ ޖައްބާރު ރަސްކަމެއް ކަމަށް ތާރީޚް އިލްމުގައި ސިފަކޮށްފައިވެއެވެ. އިސްލާމީ ތާރީޚުގައި އާދު ބާގާ މީހުންނޭ ބުނެވެނީ ޝައްދާދުގެ ގައުމުގެ މީހުންނަށެވެ. އެ ގައުމުގެ މީހުންގެ ގާތަށް މާތްﷲ ހޫދުގެފާނު ފޮނުއްވިއެވެ.
ޝައްދާދަކީ އާދުގެ 2 ފިރިހެން ދަރިންގެ ތެރެއިން ހަގު ދަރިއެވެ. އޭނާގެ ބޭބެ ނަމަކީ ޝަދީދު ކަމަށް ބުނެވެއެވެ. ޝަދީދު މަރުވުމަށްފަހު ރަސްކަން ލިބުނީ ޝައްދާދަށެވެ.
މައުލާނާ ތާރީގް ޖަމާލުގެ ދަރުސެއްގައި ވިދާޅުވެފައި ވެއެވެ. ”މާތްﷲ އެންމެހާ ކަންތައް އެންމެ މޮޅަށް ދެނެވޮޑިގެންނެވުމާއެކުގައިވެސް އެއްދުވަހަކު މަލަކުލް މައުތު ހަޒްރަތު އިޒްރާއީލުގެ ފާނަށް ވަޙީ ކުރެއްވިއެވެ. އޭ އިޒްރާއީލުގެ ފާނެވެ! އެއްވެސް ފުރާނައެއް ހިއްޕެވުމުގައި ކަލޭފާނަށް ހަމްދަރުދީ އިހްސާސް ކުރެވުނު ހެއްޔެވެ؟ މަލަކުލް މައުތުގެފާނު ދެންނެވި ކަމަށްވެއެވެ. 2 ފަހަރެއްގެ މަތިން އެފަދަ އިޙްސާސެއް ކުރެވުނެވެ. އެކަމަކު އެއީ އިނބަ އިލާހުގެ އަމުރުފުޅު ތަންފީޒުކުރުމަށް ހުރަސް އަޅާފާނެ ސަބަބަކަށް ނުވިއެވެ. މާތްﷲ ދެން ވަހީ ކުރެއްވިކަމަށް ވެއެވެ. އެއީ ކޮން 2 ހާދިސާއެއް ހެއްޔެވެ؟ އިޒްރާއީލުގެފާނު ދެންނެވިއެވެ. ފުރަތަމަ ހާދިސާއަކީ ކަނޑުދަތުރުކުރަމުން އައި އުޅަނދެއް ކަނޑުގަދަވެ ޣަރަގުވެދާނެ ކަމުގެ ބިރުވެރިކަން އުފެދިފައިވީ ވަގުތު އެ އުޅަނދުގައި އިން ބަލިވެ އިނދެ ވިހަން ކައިރިވެފާ އިން އަންހެނަކުގެ މަރު ހިއްޕެވުމަށް އަމުރުކުރެއްވި ވަގުތު އެ އަންހެންމީހާއޮތީ ކަނޑުވެފައިވާ އުޅަނދުގެ ބައެއްގެ މަތީގައި ހޭނެތިފައެވެ. އޭނާ ވިހެއި ކުޑަ ދަރިފުޅު އޭނާކައިރީގައި އޮތެވެ. އެ ހިނދު އެ އަންހެންމީހާގެ މަރު ހިއްޕެވުމުން ކުޑަކުއްޖާގެ ހާލަތާމެދު ހަމްދަރުދީ އިޙްސާސް ކުރެވެނެވެ. ދެވަނަ ހާދިސާއަކީ ޝައްދާދު ސުވަރުގެއެއް ބިނާކުރުމަށްފަހު އެތަން ދުށުމުގެ ކުރިން އެތަނުގެ ދޮރުމަތީގައި އޭނާގެ މަރު ހިއްޕެވުމަށް އަމުރު ކުރެއްވިހިނދު އޭނާ އެ ސުވަރުގެއަށް ވަމުނަށް ފުރުސަތަކަށް އެދި ރޯއި ހޭރުނު ވަގުތެވެ. އެހެންނަމަވެސް އިނބަ އިލާހުގެ އަމުރުފުޅާއެއްގޮތަށް އޭނާގެ ސުވަރުގޭގެ ދޮރުމަތީގައި އޭނާގެ މަރު ހިއްޕެވީމެވެ. އެ ހިނދު އިޒްރާއީލުގެ ފާނަށް މާތް ﷲ ވަހީ ކުރެއްވިއެވެ. ކަނޑުވެ ދިޔަ އުޅަދުގައި ޔަތީމްވި ކުޑަކުއްޖާއަކީ ޝައްދާދެވެ. ތިމަން އިލާހު އޭނާ ސަލާމަތް ކުރައްވައި ފުރިހަމ ސިއްހަތާއީ އާރާއި ބާރާއެކު ގަދަފަދަ ވެގެންވާ ވެރިކަމެއް ދެއްވީމެވެ. އެކަމަކު އޭނާ ކިބުރުވެރިކަމާއި ބޮޑާކަމުގެ އިންތިހާއަށް ގޮސް ތިމަން އިލާހުގެ އަމުރުފުޅުތަކަށް އުރެދި ގައުމުގެ މީހުން މަގުފުރައްދައި އަދި ތިމަން އިލާހަށް ސަޖިދަކުރުން މަނާވެ ގެންފިއެވެ.“
މައުލާނާ ތާރިގް ޖަމީލު ވިދާޅުވެފައިވަނީ މި ރިވާޔަތަށް ބާރު ލިބިދޭފަދަ އިތުބާރުކުރެވޭ ދަލީލުތަކެއް ލިބިފައި ނެތް ކަމަށެވެ.
ކޮންމެއަކަސް ޝައްދާދަށް އޭނާ ބިނާކުރި ސުވަރުގެއަށް ވަނުމުގެ ފުރުސަތު ނުލިބި މާތްﷲގެ އަމުރުފުޅަށް އޭނާގެ ފުރާނަ މަލަކުލް މައުތު ހިއްޕެވީއެވެ. އަދި އެއަށްފަހު ޖިބްރީލްގެފާނު ވަޑައިގެން އެ ސުވަރުގެ ހުރި ބިމުގައި ޖެއްސެވުމާއެކު އެބިން އަޑިއަށްގޮސް އަދިއަދަށްދާންދެން އޭގެ ނިޝާނެއްވެސް ފެންނާކަށް ނެތެވެ.
