ސަރުކާރަށް ނިސްބަތްވާ ސިޔާސީ ވެރިން ރައީސްގެ ނަންފުޅުގައި ތަފާތު ވައްތަރު ވައްތަރުގެ ލިސްޓްތައް ތައްޔާރުކޮށް ގާނޫނުތަކާއި ގަވާއިދުތައް މުގުރާލާ އުސޫލުން ބޭރުން އެކިފަރާތްތަކަށް ބިން ވިއްކުމާއި ރިޝްވަތު ހިމެނޭ ގޮތަށް މަޝްރޫޢުތައް އެކި ފަރާތްތަކަށް އެ ގެންދަނީ ދެމުންނެވެ. އަދި ޖަލުތަކުގައި ތިބޭ މީހުންނަށް ކާންދިނުމަށް ބިޑަށް ލައި ބިޑު ހުޅުވައި އެބިޑު ކާމިޔާބު ކުރާފަރާތަށް އެ ކޮންޓެކްޓް ވެސް ޙަވާލު ކުރަނީ އެތައްލައްކަ ރުފިޔާއެއް އަތުލުމަށްފަހުގައި ކަމަށް މިފަދަ ބިޑެއް ކާމީޔާބު ކުރި ފަރާތަކުން ސޯސަލް މީޑިޔާގައި ވަނީ ވާހަކަ ދައްކާފައެވެ.

ރައްޔިތުން ބުނަމުން އަންނަ ގޮތުގައި ރައީސް އާއި ގާތް އަދި ތިމާގެ މީހުން ސަރުކާރުގެ މަގާމްތައް ފުރުއްވާ ބޭފުޅުންގެ ތެރޭގައި ގިނައިން ތިބުމަކީ ސަރުކާރުގެ ތެރެއިން އެފަދަ ޖަރީމާ ހިންގުމަށް އިތުރު މަގުތައް ފަހިވެގެންދާ ސަބަބެކެވެ.
އެއީ ރައީސް އަރިހުން ގިނަގިނައިން ޢާންމު ރައްޔިތުނަށް ފެންނަ ބޭފުޅުން ރައީސްގެ ނަންފުޅުގައި ދައްކަވާ ވާކަފުޅުތަކާއި ކުރާ ކަންތައްތައް ގަބޫލުކުރަން ރައްޔިތުންނަށް ފަސޭހަވާނެތީއެވެ.
ސަރުކާރުގެ ތެރޭގައި އާދަޔާޚިލާފަށް ވަގުން ގިނަވެއްޖެނަމަ ދައުލަތުގެ ވަސީލަތް ނަހަމަގޮތުގައި ބޭނުންކުރުން އިތުރުވެ ވައްކަމާއި ރިޝްވަތު ޢާންމުވެ ރައްޔިތުން ނާށިގަނޑު ހިފައިގެން ސަލާމް ޖަހާ ހިސާބަށް ހިނގައިދާނެއެވެ. ބުއްދިވެރިއެއްގެ ގާތުގައި ވަލީޢަހުދަކު ވިދާޅުވިއެވެ. ތިމަން ވަލީ ޢަހުދު ރަސްކަމާއި ޙަވާލުކުރެވޭ ދުވަހަކު ތިބާ ބޭނުންވަނީ ކޮންއެއްޗެއް ހެއްޔެވެ.
ބުއްދިވެރިޔާ ބުންޏެވެ. އެއްވެސް އެއްޗެއް ބޭނުމެއް ނޫނެވެ. އެހެނަސް ރަސްގެފާނު ރައްޔިތުންނާއި ބައްދަލު ކުރައްވާއިރު ރަސްގެފާނުގެ ކަންފަތްޕުޅު ދަށުގައި ސިއްރުވާހަކަ ދެންނެވުމުގެ ހުއްދަ ދެއްވަނިކޮށް އެ ނިމުނީއެވެ. މިނޫން އެހެން ކަމެއްބޭނުމެއް ނޫނެވެ.
ވަލީޢަހުދު ވިދާޅުވިއެވެ. ތިކަން ކުރުމުގެ އިޚުތިޔާރު އެދުވަހު ތިބާއަށް އޮންނާނެއެވެ.
ކޮންމެއަކަސް މާގިނަ ދުވަސްތަކެއް ނުވެ އޭރު ހުންނެވި ރަސްގެފާނު އަވަހާރަވެ ވަލީއަޙުދާއި ރަސްކަން ޙަވާލު ކުރެވިއްޖެއެވެ. އޭގެ ފަހުން ރަސްގެފާނު ރައްޔިތުންނާއި ބައްދަލު ކުރަވަން ވަޑައިގަންނަވާއިރު ބުއްދިވެރިޔާ ހުންނަނީ ރަސްގެފާނުގެ އަރިހުގައެވެ. ދޭތެރެ ދޭތެރެއިން ރަސްގެ ފާނުގެ ކަންފަތްޕުޅު ދޮށުގައި ކޮންމެވެސް ސިއްރުވާހަކައެއް ދަންނަވާ މަންޒަރު ރައްޔިތުންނަށް ފެނެއެވެ.
މިގޮތުގެ މަތިން ރަސްގެފާނު ބޭރަށް ވަޑައިގަންނަވާނަމަ ބުއްދިވެރިޔާ އަރިހުގައި ގެންދަވައެވެ. ބުއްދިވެރިޔާ އަކީ ރަސްގެފާނު ތުއްޕުޅުއިރު އެކުގައި ކުޅެން އުޅުނު މީހެކެވެ. އެހެން ކަމުން ބުއްދުވެރިޔާ ރަސްގެފާނާ ވަރަށް ބޮޑަށް ގާތްކަން އޮވެއެވެ. އޭގެ ސަބަބުން ވިޔާފާރިވެރިންގެ އަތުން ރަނާ ޖަވާހިރާ ފައިސާ ބޭނުންވަރަކަށް ރަސްގެފާނުގެ ނަންފުޅުގައި ބުއްދިވެރިޔާ ގެންދަނީ ނަގަމުންނެވެ. ބުއްދިވެރިޔާއާއި ރަސްގެފާނާ ދެމެދު އޮންނަ ގުޅުމުގެ ނާޖާއިޒް މަންފާ ބުއްދިވެރިޔާ ގެންދަނީ ހެސްކިޔާފައި ނަގަމުންނެވެ. އެހެނަސް ރަސްގެފާނާއި ބުއްދިވެރިޔާއާއި ދެމެދު އޮންނަ ގުޅުން ވަރުގަދަ ކަމުން އެފަދަ ވާހަކައެއް ބުއްދިވެރިޔާ އާއި ދެކޮޅަށް ދަންނަވަން ކެރޭ ރައްޔިތަކު އެ ގައުމަކު ނެތެވެ.
މިއީވެސް ބައެއް ސިޔާސީ ވެރިން ކަންކުރާ ގޮތެކެވެ.
ޒަމާން ބަދަލުވެއްޖެއެވެ. ރައްޔިތުން ހޭލުންތެރި ވަމުންދާ ނިސްބަތުން ވެރިންވެސް ގެންދަނީ ވައްކަންކޮށް ރިޝްވަތުނެގުމުގެ ޗާލާކީ އުޞޫލުތައް ޒަމާނާއެއްގޮތަށް ފަޅާ ނާރަނޭހެން ބަދަލުކޮށްފައެވެ.
އަދި ފަޅާއެރިޔަސް އެ ކަންކަން ނުބެލޭނޭހެން މައްސަލަ ބަލަންތިބޭ ފަރާތްތައްވެސް އެވެރިން އޮންނަނީ ގަނެލާފައެވެ.
މި ސަރުކާރަށް މިވީ އެެއްއަހަރު ތެރޭގައި އެތަކެއް ވައްކަމާއި އެތަކެއް ޚިޔާނާތް ވަނީ ފަޅާއަރާފައެވެ. މިގޮތުން ދާދި ފަހުން އެޗްޑީސީގެ ތެރެއިން ހިންގާފައިވާ ޚިޔާނާތުގެ މައްސަލަތަކާއި ކަސްޓަމާއި ނޫމަޑި ޕޮލިސް ޕްރެކްޓް އަށް ކަޅި ހިންގާލުމުން ރައްޔިތުން އެދައްކަވާ ވާހަކަތަކަށް ބާރު ލިބޭނޫންތޯއެވެ.
ދައުލަތުގެ ތަޙުގީގީ އިދާރާތައް ދަށުޖަރައިގެ ވެރީންގެ މުށުތެރޭގައި ވާކަން މިފަދަ މައްސަލަ ތަކުން އެކަނިވެސް ހާމަވެގެންދޭ ނޫންތޯއެވެ. ރައްޔިތުން ސަރުކާރެއް ބަދަލު ކުރަން ޖެހޭ އެއްޙާލަތަކީ ދައުލަތަކީ ރައްޔިތުންގެ މުޅި މިލްކިއްޔާތު ކަމަށްވެފައި އެ މިލްކިއްޔާތުގެ ބޭނުން ނަހަމަ ގޮތުގައި ސަރުކާރުން ހިފަން ފެށުމެވެ. އަނެއް ޙާލަތަކީ ދައުލަތުގެ މުދަލާ ފައިސާއިން ވައްކަންކޮށް ގައުމު ދަރަނިވެރި ކުރުވުމެވެ. ދެން އޮތް އަނެއް ޙާލަތަކީ ރައްޔިތުން ހައިހޫނުކަމާއި ކުރިމަތިލާންޖެހުމެވެ. މިއިން ކޮންމެ ޙާލަތަކީވެސް ސަރުކާރު ބަދަލުކުރަން ޖެހޭ ހާލަތްތަކެވެ.

އެހެންކަމާއެކު މި ސަރުކާރު ބަދަލުކުރެވެން އޮތްގޮތަކަށް ރައްޔިތުން ނުކުމެ ގައުމީ ވާޖިބު އަދާކޮށް މި ސަރުކާރު ބަދަލުކުރަން ޖެހިއްޖެ ކަމުގައި އިދިކޮޅުން އެބަ ބުނެދެއެވެ. އެއީ ދިވެހި ޖުމްހޫރިއްޔާގެ ގާނޫނުއަސާސީން ރައްޔިތުންނަށް މުތުލަގަށް ދީފައިވާ ޙައްގެއް ކަމަށް ވާތިއެވެ. ސަރުކާރަކުން ގައުމު ލޫޓުވަމުންދާއިރު އަނގަނަގައިގެން އަޅާނުލާ ތިބެއްޖެނަމަ ގައުމުގެ މާދަމާގެ މުސްތަގްބަލް ސުންނާފަތިވެ އަންނާންއޮތް ޖީލުތަކާ ހަމައަށް ގައުމު ރައްކާތެތިކަމާއެކު ގެންދިއުމަށް ކޮންމެ ރައްޔިތެއްގެ ކޮނޑުގައި އެޅިފައިވާ މައްސޫލިއްޔަތަށް އިހުމާލުވުން ކަމުގައި ބެލެވޭނެތިއެވެ.

ގާނޫނީ އިމުގެ ތެރެއިން ވެރިކަން ބަދަލު ކުރަން ބަލާއިރު އެކަން ކުރުމުގެ ގާނޫނީ ބާރު ގާނޫނުއަސާސީ އިން މަތިކޮށްފައިވާ ފަރާތަކީ ރައްޔިތުންގެ މަޖިލީހެވެ. ކަން މިހެން ހުރިނަމަވެސް ރައްޔިތުން މަޖިލިސްގެ ބާރު އެ ވަނީ ގާނޫއަސާސީގެ ރޫޙާއި މުޅިން ޚިލާފުވެ ވެރިކަމުގެ ބާރާއި ގުޅުވާލާފައެވެ.
ގައުމުގެ މާދަމާގެ މުސްތަގްބަލަށްޓަކައި ގައުމު ރައްކާތެރިކޮށް އަންނާންއޮތް ޖީލުތަކާ ހަމައަށް ގައުމު ގެންގޮސް ދިނުމަކީ ދިވެހި ކޮންމެ ރައްޔިތެއްގެ މައްޗަށް އޮތް ގައުމީ އަދި ދީނީ ފަރުޟެއްވެސް މެއެވެ.