ޓްރަމްޕް ސޮއި ކުރެއްވި ބައެއް އަމުރު ތަކަށް ބަލާލުމެއްއެމެރިކާގެ 47 ވަނަ ރައީސްގެ ގޮތުގައި ހޯމަ ދުވަހު ސަރުކާރާ ހަވާލުވެވަޑައިގެންނެވި،45 ވަނަ ރައީސްގެ ގޮތުގައި ކުރިންވެސް ރައީސްކަން ކުރައްވާފައިވާ ޑޮނަލްޑް ޓްރަމްޕް، ހަމަ އިއްޔެ ވަނީ ގިނަ އަދަދެއްގެ އެގްޒެކެޓިވް އޯޑަރ ނުވަތަ އަޅުއްވާނެ ފިޔަވަޅުތަކުގެ އަމުރު ގައި ސޮއި ކުރައްވާފައެވެ.
އަލުން ވެރިކަމާ ހަވާލުވެވަޑައިގެންވުމަށްފަހު ގެންނަވާނެކަމަށް ވިދާޅުވި ބޮޑެތި ބަދަލުތައް،އޯވަލް އޮފީހުގެ ފުރިހަމަ ބާރުވެރިކަން ބޭނުންކުރައްވައިގެން، ހަމަ ފުރަތަމަ ދުވަހުންފެށިގެންވެސް ވަނީ ގެންނަވަން ފައްޓަވާފައެވެ.ޓްރަމްޕް ފުރަތަމަ ދުވަހު ސޮއި ކުރެއްވި އަމުރުތަކަށް ބަލާއިރު:-
- ޕެރިސް ކްލައިމެޓް އެގްރީމަންޓުން އެމެރިކާ ވަކިވުން
- ދުނިޔޭގެ ސިއްހަތު ޖަމިއްޔާއިން އެމެރިކާ ވަކިވުމުގެ ޕްރޯސެސް ފެއްޓުން
- ދެކުނުން މެކްސިކޯއާއި ގުޅޭ އިމުގައި ނެޝަނަލް އިމަޖެންސީ އިއުލާން ކުރުން .އަދި ނުގަވާއިދުން އެމެރިކާއަށް ހިޖްރަ ކުރާ މީހުންގެ މައްސަލަޔަށް އަވަސް ހައްލެއް ހޯދުން
- 2021 ވަނަ އަހަރުގެ ޖެނުއަރީ 6ވަނަ ދުވަހު ހިންގި ކެޕިޓަލް ރަޔަޓް ގައި ބައިވެރިވި 1500 އަށް ވުރެގިނަ މީހުންނަށް މައާފް ދެއްވުން
- އިންސާފުވެރި އިންތިހާބަކަށް ހުރަސްއެޅިކަމަށް ތުހުމަތުކުރެވޭ ކުރީސަރުކާރުގެ އިސްއޮފިޝަލުންނާ ދެކޮޅަށް ފިޔަވަޅު އެޅުން
- މިނިވަންކަމާއެކު ޚިޔާލު ފާޅުކުރުން ސެންސަރކުރުން ހުއްޓުވުމަށް ފެޑަރަލް ސަރުކާރަށް އަމުރު ކުރެއްވުން
- ޑިޕާޓްމަންޓް އޮފް ގަވަންމަންޓް އެފިޝަންސީގެ ނަމުގައި ޚާއްސަ އެޑްވައިޒަރީ ބޯޑެއް އުފެއްދުން . މިބޯޑަކީ ސަރުކާރުގެ ރަސްމީޑިޕާޓްމަންޓެއް ނޫން ކަމަށް ވަނީ ނިންމާފައެވެ.
- އައު ސަރުކާރަށް ފުރިހަމަ ކޮންޓްރޯލް ލިބެންދެން،ވަކިވަކި ބިއުރޯކްރެޓުން ނުވަތަ ވެރިން އައު ގަވާއިދުތަކާއި އަމުރުތައް ނެރުން ހުއްޓުވާލުން
- ދިރިއުޅުމުގެ ޚަރަދުތައް މައްޗަށްދާ މައްސަލަޔަށް ހައްލުހޯދުމަށް ސަރުކާރުގެ ކޮންމެ ޑިޕާޓްމަންޓަކުން އަދި އެޖެންސީ އަކުންވެސް މަސައްކަތް ކުރުމަށް އެންގުން
- ޓިކްޓޮކް މަނާ ނުކޮށް ބާއްވާނެ އިތުރު 75 ދުވަހުގެ މުއްދަތެއް ކަނޑައެޅުން
އަމުރުތަކުގައި ސޮއި ކުރައްވަމުން ގެންދެވިއިރު ޓްރަމްޕް ގެންދެވީ ނޫސްވެރިންކުރާ ސުވާލުތަކަށް ޖަވާބުދެއްވަމުންނެވެ. ޣައްޒާ ހަނގުރާމަ މެދުކަނޑާލުމާބެހޭގޮތުން ނޫސްވެރިޔަކު ދެންނެވި ސުވާލުގެ ޖަވާބުގައި ޓްރަމްޕް ވިދާޅުވީ ހަމަލާތައް ހުއްޓާލުމުގެ އަމުރު ދަމަހައްޓާނެކަމަށް އޭނާއަށް ގަބޫލު ނުކުރެއްވޭ ކަމުގައެވެ.ޓްރަމްޕް އިތުރަށް ވިދާޅުވީ ހަނގުރާމައިގައި ހަމާސްގެ ބާރު މިހާރު ކުޑަ ކުރެވިފައިވާ ކަމަށާ،އަދި ޣައްޒާ މިހާރު ހީވަނީ ޑިމޮލިޝަން ސައިޓެއް(ތަޅާ ނައްތާލާފައިވާ ތަނެއް) ހެން ކަމުގައެވެ.
އަމުރު ތަކުގައި ސޮއި ކުރެއްވުމުގެ ރަސްމިއްޔާތަށް ފަހު ޓަރަމްޕް ގެ ދެމަފިރިކަނބަލުން ވަނީ ރޭ ތިން ބޯލް ނުވަތަ ޕާޓީގައި ބައިވެރިވެވަޑައިގެންފައެވެ.
