އިންޑިޔާގެ ކޮލްކަތާގައި ޖޫނިއަރ ޑޮކްޓަރަކު ރޭޕްކޮށް އަދި މަރާލިކަމަށް ކުށް ސާބިތުވި މީހާއަށް އުމުރު ދުވަހުގެ ޖަލު ހުކުމެއް އިއްވައިފިއެވެ.މިކަން ކޮށްފައިވަނީ ވޮލަންޓިއަރެއްގެ ގޮތުގައި މަސައްކަތް ކުރުމަށް އެހޮސްޕިޓަލް،އާރުޖީ ކަރް މެޑިކަލް ކޮލެޖް އަށްދާ ސަންޖޭ ރޯއީ ކިޔާ މީހެކެވެ.

މުޅިއިންޑިޔާ ސިއްސުވާލި ރޭޕްގެ މިމައްސަލައިގެ ޝަރީއަތް ފަށައިގެން ނިމުނުއިރުވެސް ސަންޖޭ ރޯއީ ގެންދިޔައީ ކުށަށް އިންކާރު ކުރަމުންނެވެ.އެހެންކަމުން މިއަދުގެ ހުކުމް އިސްތިއުނާފް ކުރާނެ ކަމަށް ބެލެވެއެވެ.މައްސަލަބެލި ފަޑިޔާރުވަނީ މަރުގެ ހުކުމް އިއްވުމަށް ދެކޮޅުހަދާފައެވެ.ނަމަވެސް އޭނާ މުޅި އުމުރަށްވެސް ހުންނާނީ ޖަލުގައި ކަމަށް ބުނެފައިވެއެވެ.
މަރާލެވުނު ޑޮކްޓަރުގެ އާއިލާއިން ބޭނުންވީ މަރަށް މަރު ހިފުމަށެވެ.އަދި ހަމަ އެކަނި ޖަލު ހުކުމެއް އިއްވުމުން ޝޮކެއް ލިބުނު ކަމަށް ބުނެފައިވެއެވެ.މިމަރުހަލާގެ ޝަރީއަތް ނިމުނު ނަމަވެސް އަދިވެސް އިންސާފް ލިބެންދެން މަސައްކަތް ހުއްޓާނުލާ ކުރިޔަށް ގެންދާނެ ކަމަށް އާއިލާއިން ބުނެފައި ވެއެވެ.
އުމުރުން 31 އަހަރުގެ ޓްރެއިނީ ޑޮކްޓަރ ރޭޕްކޮށް މަރާލާފައިވަނީ އޭނާ މަސައްކަތްކުރާ ހޮސްޕިޓަލް ތެރޭގައި،ދިގު ޑިއުޓީ އަކަށްފަހު އަރާމު ކޮށްލުމަށް ޖައްސާލައިގެން އޮއްވައެވެ.
ތަޙްޤީޤަށް ހާމަވެފައިވާ ގޮތުގައި ސަންޖޭރޯއީ އެރޭ ހޮސްޕިޓަލް އަށް ގޮސްފައިވަނީ މަސްތުގެ ހާލުގައި ހުރެގެންނެވެ.އަދި ޑޮކްޓަރު އޮތްތަނަށް އޭނާ ވަދެ ގިނަ އިރުތަކެއް ވެފައިވާކަން ވަނީ ހާމަވެފައެވެ.
ބޮޑެތި އަނިޔާ ތަކެއް ދީފައިވާ ޑޮކްޓަރުގެ ހަށިގަނޑު ފެނިފައިވަނީ އަނެއް ދުވަހު ހެނދުނު އެކުގައި މަސައްކަތް ކުރާ އެހެން ޑޮކްޓަރަކަށެވެ.
މިހާދިސާއަށް ފަހު ޑޮކްޓަރު މަރުވީ އަމިއްލަޔަށް ކަމަށް ހޮސްޕިޓަލްގެ ފަރާތުން އާއިލާއަށް ގުޅާ ބުނެފައިވާ ކަމަށް ވެއެވެ.އެހެން ކަމުން މި ރަހުމުކުޑަ އަމަލު ހިންގި މީހާ ހިމާޔަތް ކުރުމަށް ހޮސްޕިޓަލްގެ އިސްވެރިން މަސައްކަތް ކޮށްފައިވާކަން ވަނީ ހާމަވެފައެވެ.އަދި މުޅިގައުމުގެ ސަމާކަމަށް އެހާދިސާ އައިސް،ގިނަ އަދަދެއްގެ ޑޮކްޓަރުންނާއި ކިޔަވާކުދިން އިހުތިޖާޖަށް ނިކުތީ މިސަބަބަށް ޓަކައެވެ.