2025 ވަނަ އަހަރަކީ ”ބޯހިޔާވަހިކަމުގެ އަހަރަށް“ ހައްދަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ މާލެ އަތޮޅު ގުޅިއަށް ވަޑައިގެން އެ ރަށުގެ ރައްޔިތުންނާ އިއްޔެގެ ހަވީރުގެ ވަގުތެއްގައި ބައްދަލުކުރައްވައި ވާހަކަފުޅުދައްކަވަމުންނެވެ.އެގޮތުން ރައީސް ވަނީ މި ފެށުނު 2025 ވަނަ އަހަރު ވެގެންދާނީ މާތް ﷲ ގެ އިރާދަފުޅާއެކު، ގެދޮރުގެ ދަތިކަމުގެ މައްސަލަ ޙައްލު ކުރުމުގައި ޢަމަލީ ގޮތުން އެއް އަހަރެއްގެ ތެރޭގައި އެންމެ ގިނަ މަސައްކަތް ހިންގާނެ އަހަރަށް ވާނެ ކަމުގެ ޔަޤީންކަން، ދިވެހި ރައްޔިތުންނަށް ދެއްވާފައެވެ.
މި ހިނގާ 2025 ވަނަ އަހަރަކީ ”ބޯހިޔާވަހިކަމުގެ އަހަރަށް“ ހައްދަވާނެ ކަމަށް ވިދާޅުވެ މާލެ ފިޔަވައި ރާއްޖޭގެ އެހެން ހުރިހައި ސަރަޙައްދެއްގައި ކުރިއަށް ގެންދަވާނެ ކަމަށް ވަޢުދުވެވަޑައިގެންފައިވާ ބޯހިޔާވަހިކަމުގެ ހުރިހައި މަޝްރޫޢުތައް ޢަމަލީ ގޮތުން ހިންގައިދޭނެ ފަރާތްތައް ހޯދުމަށް، މި މަހުގެ ތެރޭގައި އިޢުލާން ކުރައްވާނެ ކަމަށް ރައީސް ވަނީ ވިދާޅުވެފައެވެ.
މިގޮތުން އެކި ފަރާތްތަކާ މަސައްކަތްތައް ޙަވާލު ކުރެވޭ ތަރުތީބުން، މި އަހަރު ވެގެންދާނީ ގެދޮރުވެރިކަމުގެ ދާއިރާއިން އެއް އަހަރެއްގެ ތެރޭގައި ޢަމަލީ ގޮތުން އެންމެ ގިނަ މަޝްރޫޢު ހިންގޭނެ އަހަރަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބިން ހިއްކައި، ޖާގަ އިތުރު ކުރެވިފައި ވާ ރަށްތަކުގައިވެސް ކުރިއަށް ހުރި އަހަރުތަކުގެ ތެރޭގައި މިކަން ހިނގަމުންދާނެ ކަމަށް އެ މަނިކުފާނު ވިދާޅުވިއެވެ. ވެރިރަށް މާލެ ސަރަޙައްދުގެ މަޝްރޫޢުތައްވެސް އިޢުލާންކުރައްވާފައި ވާ ގޮތަށް ކުރިއަށްދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މާލެ އަތޮޅު ގުޅިއާ ދާދި ކައިރީގައި އޮތް ފަޅަކީ، އަދުގެ ސަރުކާރުން ހިންގާ ބޯހިޔާވަހިކަމުގެ އެންމެ މުހިންމު މަޝްރޫޢު ހިނގާ ސަރަޙައްދުކަން ފާހަގަކުރައްވައި ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، މާތް ﷲގެ އިރާދަފުޅާއެކު ”ރަސްމާލެ“ މަޝްރޫޢަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަޙައްދަކުން އެންމެ ބޮޑު ޙައްލެއް ލިބޭނެ މަޝްރޫޢުކަމުގައި ވިދާޅުވެފައެވެ. އެގޮތުން އެމަޝްރޫޢުގެ ބިން ހިއްކުމުގެ ޢަމަލީ މަސައްކަތްތައް މިހާރުވެސް ކުރިއަށްދާއިރު، އިތުރު ފަރާތްތަކާ ގުޅިގެން މަޝްރޫޢު ފުޅާކޮށް، މަސައްކަތުގެ ދުވެލި، ދެތިންގުނައަށް ހަލުވިކުރެވިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މަޝްރޫޢު ނިމިގެންދާއިރު މުޅި ރާއްޖެއަށް، އަދި ރަސްމާލެ ހިމެނޭ ސަރަޙައްދަށްވެސް ފައިދާތަކެއް ގެނެސްދޭނެކަމުގެ ޔަޤީންކަން އެބައޮތް ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މީގެ އިތުރުން މި އަހަރަކީ ތަރައްޤީގެ ޢަމަލީ މަސައްކަތާއި މާލީ ތަނަވަސްކަން އިޙްސާސްކޮށްދިނުމުގެ ޢަމަލީ މަސައްކަތްތައް ވަރަށް ފުޅާ ދާއިރާއެއްގައި، އެހާމެ ބާރަށް ހިނގާނެ އަހަރެއް ކަމަށެވެ. ކުރިއަށްދާންވީ މި ރޫޙާއި އުންމީދުގައި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
