ބުޅަލަށް ބަރޑްފްލޫ ނުވަތަ ދޫނިރޯގާ ޖެހުމުގެ ފުރުސަތު ބޮޑުކަމަށް ނިއުސްވީކުން ހަދާފައިވާ ރިޕޯޓެއްގައި ކަމުގެ މާހިރަކު ވިދާޅުވެއްޖެއެވެ. މިހެން ވިދާޅުވެފައިވަނީ އެމެރިކާގެ ވެޓެނިރަރީ މެޑިކަލް އެސޯސިއޭޝަން(އަވްމާ)ގެ އައު ރައީސް މައިކަލް ބެއިލީ ޔޫއެސްއޭ ޓުޑޭ އަށް ދެއްވި އިންޓަރވިއުއެއްގައި ކަމަށް ރިޕޯޓްގައި ބުނެފައި ވެއެވެ.

ބުޅަލަކީ އޭގެ ޒާތުގައި ދޫނި،ކުކުޅުހާ މީދާފަދަ އެއްޗެތި ހިފައިގެންކާ ޖަނަވާރެކެވެ. މިބާވަތްތަކަކީ އާންމުކޮން ދޫނިރޯގާގެ ވައިރަސް އުފުލާ ނުވަތަ ވާރުތަކުރާ ބާވަތްތަކެވެ.ހުކުރުދުވަހު އޫއެސްއޭ ޓުޑޭއިން ނެރުނު ބަޔާނަކާ ހަވާލާދީ ބުނެފައިވަނީ ބުޅާ އާންމުކޮށް އުޅެނީ ދޫނިތަކާ އެއް މާހައުލެއްގައި ކަމުން ވައިރަސް ބުލަލަށް ވާސިލް ވުމުގެ ފުރުސަތު ބޮޑު ކަމުގައެވެ.
”އެޗްފައިވް އެންވަން“ އަދި ”އެޗްފައިވް އެން އެއިޓް“ ވައިރަސް އިން ފެތުރޭ ދޫނިރޯ އަކީ އިންފްލުއެންޒާގެ ވައްތަރެކެވެ.ބަލި އާންމުކޮން ފެތުރެނީ ބަލިޖެހިފައިވާ ކުކުޅުހާ އަސްދޫނި ފަދަ ދޫންޏަކުން އެފަދަ އެހެން ދޫންޏަކަށެވެ.ނުވަތަ ބަލިޖެހިފައިވާ ދޫންޏެއްގެ ނަޖިހުން އެހެން ދޫންޏަކަށެވެ.
ދޫނީގެ ފުށުން އިންސާނުންނަށް ދޫނިރޯގާޖެހުނީ އަދި މަދު ފަހަރަކު ނަމަވެސް ބަލިޖެހިފައިވާ ދޫނިތައް އޮޅުބުޅާ ނުވަތަ އެހެންވެސް އޮޅުޖަނަވާރުތަކާ ކޮންޓެކްޓް ވާން ދިމާވާނަމަ މިފަދަ ޖަނަވާރުތަކަށް ބަލި އަރާކަމަށް ވެއެވެ.މީގެ އިތުރުން ދޫނިރޯގާޖެހިފައިވާ ކުކުޅުހާލުގެ މަސް މިފަދަ ޖަނަވާރުތަކަށް ކާންދޭނަމަވެސް ބަލިޖެހޭ ކަމަށް ވެއެވެ.
ބަލިން ސަލާމަތް ކުރުމަށްޓަކާ އޮޅުޖަނަވާރުތައް ބަލިދޫންޏާ ކޮންޓެކްޓް ނުވާނެކަން ޔަގީން ކުރަން ޖެހެއެވެ. ”އަވްމާ“ އިން ބުނެފައިވާ ގޮތުގައި ބުޅަލަށް،ޚާއްސަކޮން އޮޅުބުޅަލަށް ދޫނިރޯގާ ޖެހޭ މައިގަނޑު ގޮތަކީ ކާއެއްޗެތީގެ ޒަރިއްޔާއިންނެވެ. މިގޮތުން ރޯކިރު،ނުކައްކާ ނުވަތަ ކުޑަކޮން ކައްކާފަހުންނަ އެއްގަމުމަސް ކާން ދިނުމުންވެސް ބުޅަލަށް ދޫނިރޯގާ ޖެހެއެވެ.މީގެ އިތުރުން ކްރީމް ފަދަ ”ޕެސްޗަރައިޒް“ ނުކުރާ ކިރުގެ އުފެއްދުންތަކުންނާއި ބަލިޖެހިފައިވާ ވަލު ދޫނި ކެއުމުންނާއި، ބަލި ފެނިފައިވާ ފާމްތަކުގައި މަސައްކަތްކުރާ މީހުންގެ ހެދުމުގަ ހޭކިފަ ހުރެދާނެ ނަޖިހާ އެފަދަ ތަކެތިން ވެސް ”އޮޅު“ ބުޅަލަށް ދޫނި ރޯގާ ޖެހުމުގެ ފުރުސަތު ބޮޑު ކަމަށް ވެއެވެ.
އެމެރިކާގެ ޑިޕާޓްމަންޓް އޮފް އެގްރިކަލްޗާ އިން ހާމަކޮށްފައިވާ ގޮތުގައި މިދިޔަ އަހަރު އެމެރިކާގެ 16 ސްޓޭޓެއްގެ 900އެއްހާ ގެރި އައިނަށްވެސް ދޫނިރޯގާގެ އިންފެކްޝަން ޖެހިފައިވެއެވެ.
ވަލު ދޫންޏާ ކުކުޅުހާ އަސްދޫނި އަދި ގެރިބަކަރީގެ އިތުރުން ބޮޑެތި ބައެއް ޖަނަވާރުތަކަށްވެސް ވަނީ ދޫނި ރޯގާ ޖެހިފައެވެ. ވޮޝިންގޓަންގެ ސެންކްޗުއަރީ އަކުން މިދަޔަމަހު ހާމަ ކޮށްފައިވާ ގޮތުގައި އެތަނުން ބަލަހައްޓަމުން އައި ބޮޑެތި މިނިކާ ޖަނަވާރު ތަކުގެ ތެރެއިން 20 ޖަނަވާރުވަނީ ދޫނިރޯގާ ޖެހުމުގެ ސަބަބުން މަރުވެފައެވެ. އިންޑޮނީޝިޔާގައިވެސް ދޫނިރޯގާޖެހިގެން މިފަދަ ބިޔަ ޖަނަވާރުތަކެއް ވަނީ މަރުވެފައެވެ.
ކުކުޅުހާ އަސްދޫނިފަދަ ދޫނިތަކުން ބުޅާފަދަ ޖަނަވާރުތަކަށް ބަލިއެހާފަސޭހައިން އަރަމުން ދާނަމަ،އޮޅުބުޅަލުން ނުވަތަ ޝެލްޓާތަކުގައި ތިބޭ ބުޅަލުން އިންސާނުންގެ ގަޔަށް ބަލި އަރަން ފެށުން އޮންނާނީ ދާދި ގާތުގައި ކަމަށް ސައިންސް ޖާނަލް ތަކުގައި ބުނެފައި ވެއެވެ.