ރާއްޖެއަށް މިހާރު ކުރަމުން އަންނަ މޫސުމީ ވިއްސާރައިގައި މޯލްޑިވްސް ނޭޝަނަލް ޑިފެންސް ފޯސް(އެމްއެންޑީއެފް) އިން މާލޭގޭ މަގުމަތިން 30.569 ޓަނުގެ ފެން ހިންދައިފިއެވެ.

އެމްއެންޑީއެފުން މިއަދު ބުނީ މާލޭ ސިޓީގެ މަގުތަކުން ފެން ހިންދުމަށް އިއްޔެ 11:37 ހާއިރުން ފެށިގެން ކުރަމުން ދިޔަ މަސައްކަތުން މިއަދު 08:30 ހާއިރު ވަނީ މަގުތައް އާންމު ހާލަތަށް ގެނެވިފައި ކަމަށެވެ. އަދި އެ އޮޕަރޭޝަންގައި 30،569 ޓަނުގެ ފެން ހިންދާފައިވާކަމަށް އެމްއެންޑީއެފުން ބުނެފައި ވެއެވެ.

މާލޭގެ މަގުތަކުގައި ފެން ބޮޑުވެގެން، ފެން ހިންދުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން، މާލޭގެ 6 ސަރަހައްދެއްގައި 16 ޕަންޕު ބަހައްޓައިގެން އިއްޔެ ވަނީ މަސައްކަތްކޮށްފައެވެ.

މީގެ އިތުރުން އެމްއެންޑީއެފުން ބުނީ ފެން ހިންދުމުގެ މަސައްކަތްކުރަމުންދިޔަ ރަށްތަކުގެ ތެރެއިން ގިނަ ރަށްތައް މިހާރު އާންމު ހާލަތަށް ގެނެވިފައިވާ ކަމަށާއި މާލޭގެ އިތުރުން، ފެން ހިންދުމުގެ މަސައްކަތް މިވަގުތު ކުރިއަށްދާ ރަށްތަކަކީ ކ.ގުރައިދޫ، ކ.ހުރާ، އަދި، ށ.ނަރުދޫ ކަމަށެވެ.