ރެކޯޑު މިންވަރަކަށް ވާރޭ ވެހި މާލެއާއި ރަށްތަކުގައި ފެންބޮޑުވެއްޖެއެވެ.
އެގޮތުން މިހާރު ރާއްޖެއަށް ކުރަމުން އަންނަ މޫސުމީ ވިއްސާރައިގައި މިއަދު ހެނދުނުން ފެށިގެން މެދުނުކެނޑި ވެހެމުންދާ ވާރޭގައި މާލޭގައި ފެންބޮޑުވެ ގެތަކާއި ފިހާރަތަކަށް ފެން ވަނުމުން ފުލުހުންނާއި ސިފައިން އަންނަނީ މާލޭގައި ފެންހިންދުމުގެ މަސައްކަތް ކުރަމުން އާންމުންނަށް އެހީތެރިކަން ފޯރުކޮށްދެމުންނެވެ.
ފުލުހުން ކުރި ޕޯސްޓެއްގައި ބުނީ މިހާރު ކުރަމުންދާ ވިއްސާރައިގައި މާލޭގެ ގޭގެއަށާއި ފިހާރަތަކަށް ފެން ވަނުމުން ރައްކާތެރިކުރުމަށް ވެލިބަސްތާ ޖެހުމާއި ފެން ވަދެފައިވާ ގޭބިސީތަކުން ފެން ހިންދުމުގައި ފުލުހުން ހަރަކާތްތެރިވަމުން އަންނަ ކަމަށެވެ. އެހީތެރިކަމެއް ބޭނުންފުޅުވާނަމަ 911 އަށް ގުޅުމަށްވެސް ފުލުހުން ވަނީ އެދިފައެވެ.އަދި އާންމުހާލަތަކަށް މަގުތައް އަންނަންދެން ހަތަރުފުރޮޅުލީ ބަރު އުޅަނދުފަހަރު ނުދުއްވުމަށް ފުލުހުން ވަނީ އެދިފައެވެ.
މީގެ އިތުރުން މި ވިއްސާރާގައި ބޯކޮށް ވާރޭވެހި ރަށްރަށުގައި ފެންބޮޑުވެ ބައެއް ގެއްލުންތައް ވެފައި ވާއިރު ފުލުހުން ބުނީ ރަށްރަށުގައި މަސައްކުރާ ފުލުހުންވެސް ދަނީ ފެން ނުވަންނާނޭހެން ވެލިބަސްތާ ޖެހުމާއި ފެން ހިންދުމުގެ މަސައްކަތުގައި ހަރަކާތްތެރިވަމުން ކަމަށެވެ.
ހަމައެހެންމެ މި ވިއްސާރައިގެ ސަބަބުން ބައެއްރައްތަކަށް ބޮޑެތި ގެއްލުންތައް ވަމުން އަންނައިރު ނަރުދޫއާއި ރ. އިނގުރައިދޫއަށް ވަނީ ވަރަށްބޮޑަށް އުދައަރާފައެވެ. އަދި ފ. ނިލަންދު އާއި ފ. މަގޫދު އާއި ދ. ކުޑަހުވަދޫ އަދި ދ. މީދޫގައި ވަނީ ވާރޭވެހިގެން ފެންބޮޑުވެފައެވެ.
މޫސުން ގޯސްވުމުގެ ސަބަބުން މެޓް އޮފީހުން ވަނީ މިރޭ 19:00 އިން ފެށިގެން މިރޭ 23:00އާ ހަމައަށް ބ. އަތޮޅުން ފެށިގެން ތ. އަތޮޅަށް އޮރެންޖު ސަމާލު ނެރެފައެވެ.
