އިސްރާއީލުން ޣައްޒާއަށް ދިން ހަމަލާގައި ޝަހީދުވި 11 މީހުންގެ ތެރޭގައި ހަމާސްގެ ޕޮލިސް ޗީފް ހިމެނޭކަމަށް މީޑިއާތަކުން ރިޕޯޓުކޮށްފިއެވެ.
މީޑިއާ ރިޕޯޓުތައް ބުނާ ގޮތުން އިސްރާއީލު ސިފައިން ފަލަސްތީނުގެ ޣައްޒާއަށް މިއަދު ދިން ހަމަލާތަކެއްގައި ހަމާސްގެ ޑިރެކްޓަރު ޖެނެރަލް އޮފް ޕޮލިސް މަހުމޫދު ސަލާހާއި އޭނާގެ އެހީތެރިޔާ ހުސާމް މުސްތަފާ ޝަވާން ވަނީ ޝަހީދުކޮށްލާފައެވެ.
މަހްމޫދު ސަލާހު ޝަހީދުވެފައި ވަނީ ޣައްޒާގެ ދެކުނުގެ ޚާން ޔޫނިސްގެ އަލް މަވާސީ ޑިސްޓްރިކްޓްގައި ހުންނަ ފަލަސްތީނުގެ ރެފިއުޖީންގެ ޓެންޓްތަކަށް ދިން ވައިގެ ހަމަލާއެއްގައެވެ.
މީގެ އިތުރުން ފަލަސްތީނުގެ މީޑިއާތަކުން ރިޕޯޓުކޮށްފައިވާ ގޮތުގައި އަލް މަވާސީ ސަރަހައްދުގައި ފަލަސްތީނުގެ ރެފިއުޖީންގެ ޓެންޓްތަކަށް އިސްރާއީލުން ދިން މި ހަމަލާގައި ހަމާސްގެ ޕޮލިސް ޗީފް ހިމެނޭހެން ފަލަސްތީނުގެ 11 މީހަކު ޝަހީދުކޮށްލާ 15 މީހަކު ވަނީ ޒަހަމްކޮށްލާފައެވެ.ޝަހީދުވި މީހުންގެ ތެރޭގައި ތިން ކުޑަކުދިންނާއި ދެ އަންހެނުން ވެސް ހިމެނޭ ކަމަށް ރިޕޯޓްތައް ބުނެއެވެ.
މީގެ އިތުރުން އަހަރު ފެށުނު ދުވަހު ޣައްޒާގައި އިސްރާއީލުން ދިން ހަމަލާތަކުގައި ފަލަސްތީނުގެ 12 މީހަކު މަރުވެފައިވާއިރު، ގިނައީ އަންހެނުންނާއި ކުޑަކުދިން ކަމަށް އޮފިޝަލުންނާ ހަވާލާދީ މީޑިއާ ރިޕޯޓުތައް ބުނެއެވެ.
