ކޮންމެވެސް ރަށެއްގައި ޒުވާންފުރައިގެ ދެމަފިރިންނާއި އުމުރުން ދުވަސްވީ ދެމަފިރިން އަވަށްޓެރިންގެ ގޮތުގައި އުޅެން ދިމާވިއެވެ. މިގޮތުގައި އުޅެމުން ދިޔައިރު ޒުވާން ދެމަފިރިންގެ ހިތުގައި މުސްކުޅި ދެމަފިރިންގެ މައްޗަށް ކުލުނާއި ހަމްދަރުދީ އުފެދި،އެކުވެރިކަން ބަދަހި ކުރަމުން ގެންދިޔައެވެ.

މިގޮތުން ކޮންމެ ހަފްތާބަންދެންގައި މުސްކުޅި ދެމަފިރިންގެ ގެޔަށް ގޮސް ކޮފީއެއް ނުވަތަ ސައިތައްޓެއް ބޯލާ ހަދާލުމަކީ އެދެމަފިރިންގެ އާދަޔަކަށް ވަނީ ހަދާފައެވެ.
މިގޮތުން އެގެޔަށްދާދުވަސްތަކުގައި،މުސްކުޅި އަންހެންމީހާ އައިސް ކޮންމެވެސް ފުޅިއެއްގެ ނޫނީ ދަޅެއްގެ މަތި ނަގަން މުސްކުޅިފިރިހެން މީހާ އަތަށް ދޭކަން ޒުވާން ދެމަފިރިންނަށް ފާހަގަ ކުރެވުނެވެ.އެހެން ކަމުން އެހީއެއް ވެދިނުމަށް ވިސްނާ ދެންދިޔަދުވަހު ޒުވާން ދެމަފިރިން ދިޔައީ ފުޅިއާއި ދަޅުގެ މަތިނެގުމަށް ބޭނުންކުރާ އެއްޗެއް(ގެޖެޓެއް) ހިފައިގެންނެވެ.ގޮސް ސިއްރު ސިއްރުން އޭތި އަންހެން މީހާއަތަށް ދިނުމަށްފަހު ބޭނުން ކުރާނެގޮތް ކިޔާދިނެވެ.
ނަމަވެސް ދެން ދިޔަ ދުވަހުވެސް މުސްކުޅި އަންހެންމީހާ،އޭނާގެ ފިރިމީހާގެ އަތަށް ކޮފީފުޅީގެ މަތިނަގަން ދިނެވެ.ޒުވާން ދެމަފިރިން ހިތަށް އެރިއެވެ. ގެޖެޓް ބޭނުން ކުރަން ހަނދާން ނެތުނީބާވައެވެ. އަންހެންމީހާ ކައިރީ އެކަނި އަހާލެވޭ ގޮތަކަށް ދިމާވުމުން އަހާލިއެވެ.“ގެޖެޓް ބޭނުންކުރަން ހަނދާން ނެތުނީ ހެއްޔެވެ؟“
މިހެން އެހުމުން ހެވިލާފަހުރެ އަންހެންމީހާ ދިން ޖަވާބުން ޒުވާން ދެމަފިރިން ހައިރާން ވިއެވެ.“ގެޖެޓާ ނުލާވެސް އަހަރެންނަށް ފުޅިހުޅުވޭނެއެވެ.އަހަރެން އޭނާ ލައްވާ ހުޅުވަނީ އެކަމުން އޭނާ އަށް ޚާއްސަ އިހުސާސްތަކެއް ދިނުމަށް ޓަކައެވެ.އޭނާއަކީ ވަރުގަދަ މީހެއްކަމުގެ އިހުސާސް އެވެ.ގޭގެ އިސްމީހާ އަކީ އޭނާ ކަމުގެ އިހުސާސްއެވެ.ހާއްސަކޮން އޭނާއަކީ ގޭތެރޭގެ ކަންކަމުގައި އަހަރެންނަށް ބޭނުންތެރި މީހެއް ކަމުގެ އިހުސާސް އެވެ. އަހަރުމެން ދެމަފިރިން މިގޮތަށް އެކުގައި އުޅެން ދެން މާގިނަ ދުވަހެއް ނެތެއްނޫން ހެއްޔެވެ.އެހެން ވީމާ މި ދުވަސްކޮޅުގެތެރޭގައި އޭނާއަށް އެ އިހުސާސްތައް ދިނުން،ފުޅިއެއް ހުޅުވުމަށް ވުރެ އަހަރެންނަށް މާ މުހިންމެވެ.“
މުސްކުޅި އަންހެން މީހާ ބުނި ބަހުގެ މާނަ ޒުވާން ދެމަފިރިންނަށް ވިސްނުނީ ދެނެވެ.
އުމުރުން ދުވަސްވީ މީހުންގެ ބޭނުން،ހިފެން އޮތް ގޮތަކަށް ހިފަމުން ގެންދާށެވެ. މުސްކުޅިވުމުން،ބޭނުމެއް ނުހިފޭބަޔަކަށް ހަދާ އެމީހުން އެކަހެރިކޮށްނުލާށެވެ. އެމީހުންގެ ތަޖްރިބާ އަށް ބިނާކޮށް ދޭ ނަސޭހަތްތަކާއި މަގުދެއްކުންތައް އަޑުއަހާށެވެ.
މޭވާއަޅާ ގަހަކަށް ނިސްބަތް ކުރާއިރު، ގަހުގައި މޭވާއެޅުން ހުއްޓުނު ނަމަވެސް އެގަހުގެ ހިޔާ އެތައް ހިސާބަކަށް ފެތުރިފައި ވެއެވެ.
އުމުރުން ދުވަސްވީ މީހުންނަށް ޚިދުމަތް ކުރުމަކީ ބުރައެއް ކަމަށް ނުބަލާ އެއީ ނިއުމަތެއް ކަމުގައި ބަލާށެވެ.