އެމެރިކާގެ ކުރީގެ ރައީސް ޖިމީ ކާޓަރ އުމުރުފުޅުން 100 އަހަރުގައި އަވަހާރަވެއްޖެއެވެ. ކާޓަރ އަވަހާރަވީ ޖޯޖިޔާގައި ހުންނަ އޭނާގެ އަމިއްލަ ގެކޮޅުގައެވެ.
ޕީނަޓް ހެއްދުމުގެ މަސައްކަތުން އާމްދަނީ ހޯއްދަވަން ފެއްޓެވި ކާޓަރ ވެރިކަން ކުރައްވާފައިވަނީ 1977އިންފެށިގެން 1981 އަށެވެ.
ޖިމީކާޓަރ ގެ ވެރިކަމުގެ ހަތަރު އަހަރުވަނީ ގިނަ ގޮންޖެހުން ތަކަކާ ކުރިމަތިލައްވާ، އަދި ކާމިޔާބީ ތަކެއް ހާސިލް ކުރައްވާފައެވެ. މިގޮތުން މެދުއިރުމައްޗަށް ސުލްހަ ގެނައުމަށް ކުރެއްވި މަސައްކަތް ޕުޅުގެ ދަށުން އިސްރާއީލާ މިސްރާ ދެމެދު ސުލްހައިގެ އެއްބަސްވުމެއްގައި ވަނީ ސޮއިކުރުވާފައެވެ.މީގެ އިތުރުން އޭރު އީރާން ރަހީނުކުރި އެމެރިކާގެ 52 ރައްޔިތުން މިނިވަން ކުރުމުގެ މަސައްކަތުގައި އިސް ދައުރެއް އަދާކުރައްވާފައިވެއެވެ.
ރައީސް ކަމުގެ ދެވަނަ ދައުރަކަށް ކުރިމަތިލެއްވިނަމަވެސް ދެން ވާދަކުރެއްވި ރޮނަލްޑް ރޭގަން، ކާޓަރ ގެ މައްޗަށް ކުރި ހޯއްދެވުމުން ވަނީ އިންތިހާބް ގެއްލިފައެވެ. އެދުވަސްވަރު އެމެރިކާގެ އިގްތިސާދަށް ކުރިމަތިވި ގޮންޖެހުންތައް ވެގެންދިޔައީ ކާޓަރ ގެ މަގްބޫލުކަން ގެއްލުމަށް ދިމާވި މައިގަޑު ސަބަބު ކަމުގައެވެ.
ވެރިކަމުން ވަކިވެވަޑައިގެންނެވުމަށްފަހުވެސް ޖިމީ ކާޓަރ ގެންދެވީ އިންސާނީ ހައްގުތައް ހިމާޔަތް ކުރެއްވުމުގެ ރޮގުންނާއި ސުލްހައަށް ވަކާލާތު ކުރެއްވުންފަދަ ރޮގުތަކުން ވަރުބަލިކަމެއްނެތި މަސައްކަތް ކުރައްވަމުންނެވެ.އަދި އޭނާ ކުރެއްވި އިންސާނީ އެހީގެ މަސައްކަތް ތަކަށް ވަނީ 2002 ވަނަ އަހަރު ނޯބެލް އިނާމުވެސް ލިބިވަޑައިގެންފައެވެ.
އުމުރުފުޅުގެ ފަހުގެ އަހަރުތަކުގައި ޖިމީ ކާޓަރ އަށް ވަނީ ސިއްހީ ބޮޑެތި މައްސަލަ ތަކެއް ކުރިމަތިވެ ވަޑައިގެންފައެވެ.ހާލުކޮޅު ދެރަވި ނަމަވެސް ހޮސްޕިޓަލުން އިތުރު ސިއްހީ ފަރުވާ ނުހޯއްދަވާ އަމިއްލަ ގެކޮޅުގައި ހޮސްޕިސް ހިދުމަތް ހޯއްދެވުމަށް 2023ވަނަ އަހަރު ނިންމެވިއެވެ.
ޖިމީ ކާޓަރ އަވަހާރަވުމާއި ގުޅިގެން އެމެރިކާ އާއި ދުނިޔޭގެ ލީޑަރުން ގެންދަވަނީ ތައުޒިޔާގެ މެސެޖްތައް ފޮނުއްވަމުންނެވެ.ރައީސް ޖޯބައިޑަން ވިދާޅުވެފައިވަނީ ޖިމީ ކާޓަރ އަކީ އުސޫލުތަކުގައި ވަރުގަދަޔަށް ހިހެއްޓެވި،ދީނީ ކަންކަމަށް އިސްކަމެއް ދެއްވި އަދި ހިތްތިރި ބޭފުޅެއް ކަމުގައެވެ.އަދި އިންތިހާބީ ރައީސް ޑޮނަލްޑް ޓްރަމްޕް ވިދާޅުވެފައިވަނީ އެމެރިކާގެ ރައްޔިތުން ކާޓަރ އަށް ޝުކުރުވެރި ވުމުގެ ދަރަންޏެއް(ޑެޓް އޮފް ގްރެޓިޓިއުޑް) އެބައޮތް ކަމުގައެވެ.
