ރޯޑް ޑިވެލޮޕްމަންޓް ކޯޕަރޭޝަން(އާރުޑީސީ)ގެ ހިޔާނާތުގެ މައްސަލައާ ގުޅިގެން އެ ކުންފުނީގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ)އާއި އޭރުގެ ޗީފް ފައިނޭންޝަލް އޮފިސަރު ޔާސިރު ހަސަންގެ ގެ ބަލައި ފާސްކޮށްފިއެވެ.
އެގޮތުން މި މައްސަލައާ ގުޅިގެން ކޯޓު އަމުރެއްގެ ދަށުން ފުލުހުން ވަނީ ރޭ ތިން ތަނެއް ބަލާ ފާސްކޮށްފައެވެ.
ކްރިމިނަލް ކޯޓުން ނެރުނު އަމުރުގައި ބުނީ އާރުޑީސީގެ އެމްޑީގެ މަގާމުގައި ހުންނެވިއިރު މޫކޭ އެ ކުންފުނީގެ ފައިސާއަށް ހިޔާނާތްތެރިވެ، އެ ފައިސާ ލޯންޑާކޮށް، އަމިއްލަ މަންފާ ހޯދާފައިވާ ކަމަށް ފުލުހުންނަށް ތުހުމަތު ކުރެވޭކަމަށެވެ. އެހެންކަމުން މި މައްސަލައިގެ ތަހުގީގަށް މޫކޭގެ ހަށިގަނޑާއި،މޯބައިލް ފޯނުތަކާއި، އިލެކްޓްރޯނިކް ޑިވައިސްތަކާއި، ސިމްކާޑުތަކާއި އަދި ހެއްކާ ގަރީނާގެ ގޮތުގައި ބެލެވޭ އެހެނިހެން ތަކެތި ފުލުހުންގެ ބެލުމުގެ ދަށަށް ގެންދިއުމުގެ ހުއްދަ ދީފައިވާ ކަމަށެވެ.
ފުލުހުން ބުނީ އާރުޑީސީއާ ގުޅޭ ގޮތުން ތަހުގީގު ކުރަމުން އަންނަ މައްސަލައިގެ ބޭނުމަށް ދިރިއުޅުއްވާ ތަނާއި ޔާސިރުއާ ގުޅުން ހުރި ދެ ތަނެއް ބަލައި ފާސްކޮށް އިލެކްޓްރޯނިކް ސާމާނުތަކެއް ގެންގޮސްފައިވާ ކަމަށެވެ.
ފުލުހުން ބަލައި ފާސް ކޮށްފައި ވަނީ މާލޭގައި މޫކޭ ދިރިއުޅުއްވާ ގެއަކާއި ހުޅުމާލޭގައި ހުންނަ ޔާސިރްގެ އެޕާޓްމަންޓަކާއި މޫކޭގެ އަނބިކަނބަލުން ދިރިއުޅުއްވާ ވިނަރެސް ފްލެޓްގެ އެޕާޓްމަންޓެކެވެ.
