އިންޑިއާގެ ކުރީގެ ބޮޑުވަޒީރު، ޑރ.މަންމޯހަން ސިންހް އުމުރުފުޅުން 92 އަހަރުފުޅުގައި އަވަހާރަވެއްޖެއެވެ.
އިންޑިއާގެ 13 ވަނަ ބޮޑުވަޒީރު ޑރ މަންމޯހަން ސިންހް މިއަދު ހަވީރު އަވަހާރަވެފައިވާކަން އިއުލާން ކުރީ މިރޭ 9:51 ހާއިރު އެވެ.
މީޑިއާ ރިޕޯޓުތައް ބުނާގޮތުން މިރޭ ދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އައިމްސް)ގެ އެމާޖެންސީ ވޯޑުގައި ސިންހް ވަނީ އެޑުމިޓުކޮށްފައެވެ.ނަމަވެސް މިކަމުގެ އިތުރު ތަފްސީލެއް ހާމަކޮށްފައެއް ނުވެއެވެ.
ޑރ މަންމޯހަން ސިންހް ވަނީ ޔޫޕީއޭގެ ސަރުކާރުގައި ދެ ދައުރެއް ވަންދެން އިންޑިއާގެ ބޮޑުވަޒީރުކަން ކުރައްވާފައެވެ. އެއީ2004އިން 2014އަށެވެ.2024 ވަނަ އަހަރުގެ އޭޕްރީލް މަހު ރިޓަޔާ ކުރުމާ ހަމައަށް އެ މަނިކުފާނު ހުންނެވީ ރާޖް ސަބާގެ މެންބަރެއްގެ ގޮތުގައެވެ. ފޯބްސް މެގަޒިންގައި ރިޕޯޓުކޮށްފައިވާގޮތުން ޑރ މަންމޯހަން ސިންހް އަކީ 2011 ވަނަ އަހަރު ދުނިޔޭގެ 19 ވަނަ އެންމެ ބާރުގަދަ ލީޑަރެވެ. ހަމައެހެންމެ 2012 ވަނަ އަހަރު ދުނިޔޭގެ 20 ވަނަ އެންމެ ބާރުގަދަ ލީޑަރުގެ މަޤާމު އަދި 2013 ވަނަ އަހަރު ދުނިޔޭގެ 28 ވަނައަށް އެންމެ ބާރުގަދަ ލީޑަރުގެ މަޤާމު އެ މަނިކުފާނު ވަނީ ހޯއްދަވާފައެވެ.
