އަޒަރުބައިޖާނުގައި ބުދަދުވަހު ހިނގި މަތިންދާބޯޓު ވެއްޓުމުގެ ހާދިސާ ތަހުގީގު ކުރުމަށް ޙާއްސަ ކޮމިޝަނެއް ހަދައި،އެކަން ކުރުމަށް އެ ޤައުމުގެ ރައީސް އިލްހާމް އަލިޔާވް އަންގަވައިފިއެވެ.
އަޒަބައިޖާން އެއާލައިންސް ފްލައިޓް 8432ބުދަދުވަހު ވެއްޓިފައިވަނީ ކަޒަކް ސިޓީއެއް ކަމަށްވާ އަކްތައު ގައި އިމަޖެންސީ ކޮށް ޖައްސަން އުޅުމުގެ ތެރޭގައެވެ.
އަޒަރުބައިޖާނުގެ ރައީސް އޮފީހުން ނެރުނު ބަޔާނެއްގައި ރައީސް އަލިއާވް ވިދާޅުވި ގޮތުގައި އަލަށް އެކުލަވާލެވޭ ކޮމިޝަންގެ މަސައްކަތަކަށްވާނީ ބޯޓު ވެއްޓެން ދިމާވި ސަބަބު ފުރިހަމަޔަށް ބަލާ ތަހުގީގު ކުރުމަށްފަހު ރައީސް އަށާއި އަދި އާންމުންނަށް މައުލޫމާތު ފޯރުކޮށް ދިނުމެވެ. ބޯޓު ވެއްޓެން ދިމާވި ސަބަބާމެދު ސަރުކާރުން ވަކި ކަމަކަށް ޝައްކު ކުރާކަން ހާމަ ނުކުރިނަމަވެސް ރައީސް ވިދާޅުވެފައިވަނީ ސަބަބު ފުރިހަމަޔަށް ބަލާ ހޯދުން ވަރަށް މުހިންމު ކަމުގައެވެ.
ބޯޓުވެއްޓެން ދިމާވެދާނެ އެތައް ތިއަރީތަކެއް ހުރިނަމަވެސް ސީދާ ވަކި ސަބަބެއް އަދި ސާފުނުވާކަމަށް ރައީސް ވިދާޅުވެފައި ވެއެވެ.
އަޒަރުބައިޖާންގެ ބައްކޫއިން ފުރައިގެން ރަޝިޔާގެ ގްރޮޒްނީއަށް ދަތުރުކުރި ބޯޓް ވެއްޓުމުގެ ހާދިސާގައި 38މީހުން މަރުވެފައިވާއިރު 29 މީހަކު ވަނީ މަރުނުވެ ސަލާމަތް ވެފައެވެ.
ބޯޓުވެއްޓުމުގެ ހާދިސާ ހިނގިއިރު، ރައީސް އަލިއާވް ވެސް ގެންދެވީ ދަތުރެއް ކުރައްވަމުންނެވެ.ރައީސް ދަތުރުކުރެއްވީ ރަޝިޔާގެ ސޭންޓް ޕީޓާސްބާގްގައި ބާއްވަން އޮތް ކޮމަންވެލްތު އޮފް އިންޑިޕެންޑަންޓް ސްޓޭޓްސްގެ ވެރިންގެ ބައްދަލުވުމުގައި ބައިވެރިވެ ވަޑައިގެންނެވުމަށެވެ.
އަލިއާވް ވިދާޅުވީ އެ ހިތާމަވެރި ހާދިސާގެ ހަބަރު ބޯޓުގައި އިންނަވަނިކޮން ލިބިވަޑައިގެންނެވުމާއިއެކު،ދަތުރު ބަދަލުކޮށް ބައްކޫ އަށް އަނބުރާ ދިއުމަށް އެންގެވި ކަމަށެވެ. އަދި ބޮޑުވަޒީރާ މަޝްވަރާކުރައްވާ ރެސްކިއު މަސައްކަތް ކުރިޔަށް ގެންދާނެގޮތުގެ އިރުޝާދު ދެއްވި ކަމަށް ވިދާޅުވިއެވެ.
